Waxye 16 - Saaho Cusub Cahde

Yallih kurahi malxina shaxan

¹ Sarrah wuli naba dhaw amaa macbadko amaa malxina malaykattok: “Tedeynih amaa Yallih kurahi malxina shaxan baarholle xarhanta” akko arhxuk oobbe.

² Amaymih, erherh malaykatti yedeeh ishi shaxan baarholle xarhe. Amaa alluulatti tuumar le mara kee kaa mislih yucbude maralle fajce kee waaxelta le biyok alle yewce.

³ Malammit malaykatti ishi shaxan badadde xarhe. Amaa bad lel rashshi biiloh yimmingideh, amadde tine ufayle inkoh bakiten.

⁴ Maddaxit malaykatti ishi shaxan nahaaraat kee layet raxeenadde xarhe. Amayim lel inkoh biilo tekke.

⁵ Amaa layet manabotta kin malaykatti lel: “Yaneh yine Quddus kin tiyawo, atu xaqqe kito, amayim lel ta firde toxoyemhi sabbatah kinni.

⁶ Usun yinqiddise mara kee nobowat biilo xarheenimhi sabbatah, atu lel yaacaboona biilo akah toxoyeh tanito. Tenah eeddam kinni” arhxuk oobbe.

⁷ Amaa mazbax lel tahe arhxuk oobbe: “Yoo, Nabamko Naba Maddara kin Yalla, ku firdi rumma kee xaqqe kinni.”

⁸ Mafarrit malaykatti ishi shaxan ayrottalle xarhe. Ishe lel xiyaw girah xararishsho tee dhicshiishe.

⁹ Usun lel dhacuma lacnah xararen, amaa balat bukalle xayla le Yallah waatimen. Usun yotoobiinih kayya maynabinnooni.

¹⁰ Makawwanit malaykatti ishi shaxan amaa alluulatti nugus-kurselle xarhe. Kaa nigsinna lel dite tekke. Amaa xiyaw lel waaxeltah sinni anrub yeexetiinih,

¹¹ sinni waaxelta kee biyokti sabbatah lel carshi Yallah waatimen. Usun sinni abittotko maataabinnooni.

¹² Lix-ya malaykatti ishi shaxan Awufraathis nahaaradde xarhe. Amaa laye lel ayrommaaxaako tamiite nuguusah arax tasqarrabo ciloh kafte.

¹³ Acanah higgidin adooxa najaasa-le ufayi lel amaa gaabbaati af, amaa alluulatti af kee zirabti nabiihi afko awcuk uble.

¹⁴ Ta mari ishaarar aba junuun ufaye kinon. Usun tamaa Nabamko Naba Yallahi naba lellecih dhibah ten yaskattoona, umbuka caalamhi nuguusa fanah irolle tadiyem kinon.

¹⁵ “Taykinna, anu garceena balih amiitiyuk ane! Casiinih yadiyeh, kaa cawra xiyaw akko tablemko, dhiinekkah, ishi sara dhawrhak sugati baraka-le tiya kinni!”

¹⁶ Cibriyah “Armageddoon” akko yarhxin makaanolle lel ten yeskettin.

Malxin-ya shaxan

¹⁷ Malxin-ya malaykatti ishi shaxan cashshaballe xarhe. Naba dhaw macbadti nugus-kurseeko yemeeteh lel: “Abayshimte!” yerhxe.

¹⁸ Xankarha, angud diixiyo kee naba kirdidimo tekke. Xiyawti baarholle yunkhulluqhemko taahe lel ta gina le naba kirdidimo tumbulluweh mitaarhige.

¹⁹ Amaa naba daafo lel adooxalle xazzimte, aki wathunti daafof lel dume. Yalli lel naba Baabiloon xunsuuseyaako dhacuma kaa kuraako yemmeege waynit kobbaaya akah yoxoye.

²⁰ Juzur lel inkoh yelee, koomamko lel walaa inkettä misuginna.

²¹ Marootom kee koon kiilo giraam takkem inketti akko yakke naba barad lel caranko xiyawalle rade. Amaa bala fajce le tiyä kuuk tinemhi sabbatah, amaa barad balahi sabbatah Yallah waatimen.