Waxye 15 - Saaho Cusub Cahde

Malxina bala le malxina malaykatto

¹ Sarrah, carshelle nabah cibra kin aki ishaara uble. Yallih kura tenadde bakittemhi sabbatah, amaa abayshimat malxina bala yibbirhe malxina malaykatto kuuk yinin.

² Badti bitro giraalih tengeegelleh higgidya uble. Amaa alluulatto, kaa misle kee kaa migac hi nibrooko yimlike mari gantah, Yallih kiraar yibbirhiinih, amaa badti bitrohi agaagalle daw-arhxuk yinin.

³ Yallih khaddaam kin Moosa kee amaa Leemi horra horrishak tahe arhxuk yinin: “Ku abittot nabah cibra kinni, Ko Nabamko Naba Maddara kin Yalla! Ku arux xaqqe kee rumma kinni, Ko wathunti nuguso!

⁴ Miyatto kinni kok mashshiitinnixeti, yi Maddarawo, ku migac lel aynabinnixeti? Amayim lel quddus kinti kotta bisa kinamhi sabbatah kinni. Umbuka wathun yemeetiinih, kottah yacbadoona kinon, amayim lel xaqqe kin ku abittot yimidhdhigeh yanemhi sabbatah kinni.”

⁵ Taymik sarrah, kulux-erhxeh, Yallahi reedo shahaada tiya kin macbad carshelle fakkiteh uble.

⁶ Amaa malxina bala yibbirhe malxina malaykatti amaa macbadko yewce. Usun lilic-tarhxe qarce-le bafta sariteenih, naxarak lel dahab mooren hashshiiteenih yinin.

⁷ Amaa affara ufaylettaako inketti lel umman gedda kee umman gedille marta Yallih kuraako yemmeege malxina dahab shaxun amaa malxina malaykattoh yoxoye.

⁸ Amaa macbad lel Yallih nabne kee xaylaako yamiite tikah yemmeege. Amaa malxina malaykattohi malxina bala bakittandah lel amaa macbadadde walaa inketti orobo mirhiicinna.