Waxye 13 - Saaho Cusub Cahde

Afti alluulatto

¹ Wuli alluulatti badko awcuk uble, usuk tamana gashsha kee malxina amo luuk yine, amaa gashshushukke lel tamana cindhadhdhaa erherharh le bor, amomuk lel Yallahi waatohi migoc luuk yine.

² Tamaa anu uble alluulatti lel qabictah higgiduk yine; kaa iboobi dibbiitimih higgiduk yine, kaa af lel lubak tiyah higgiduk yine. Ayyih gaabbaa lel kayyah ishi xayla, ishi nugus-kurse kee naba reeza akah yoxoye.

³ Kaa amomko tiyä lel rabi guddussa biyaake luuk tine, amaa rabi guddussa biyaake laakin akah urteh tine. Umbuka caalam lel cibrah rabak sarradde akko katayen.

⁴ Usun lel amaa alluulattoh reeza toxoyemhi sabbatah amaa gaabbaah akah yucbudin. Usun amaa alluulattoh akah yucbudiinih: “Ta alluulattoh higgidin tiyah miyatti yane? Miyatti lel aalih yassarhaabarho dhiica?” arhxuk yinin.

⁵ Amaa alluulattoh amnonobbaati waani akah waanishah, Yallah akah waatima af akah yomxoyeh yine, ishi reeza marootom kee lamma alsiya yatnaafaco lel izni akah yomxoyeh yine.

⁶ Yallah waatimo, kaa migac kee kaa sigimah, amayim balih amaa carshelle martamah waatimo ishi af faake.

⁷ Amaa yinqiddise maraalih dhibbaw kee ten yascaro izne geyeh yine. Umbuka kishosh, xiyaw, waani kee wathunhi bukalle lel reeza akah tomxoyeh tine.

⁸ Baarho ankhulluqhekkahko taahe tamaa yumruxxude Leemahi aniinat kitaabadde ten migoc akko ankuttubinnixe mari inkoh baarholle martaya akah yacbadoona kinon.

⁹ Cokka aallinnanti yaabboo:

¹⁰ Akkinnanti yamxabbasho yekkemko, xabshedde yadaw kinni; akkinnanti sefih rabo yekkemko, sefih rabo alle tane. Tayim lel yinqiddise marahi curtayyo kee imaanhi deecoh takkem kinni.

Malammit alluulatto

¹¹ Aki alluulatti lel baarhooko awcuk uble. Usuk maruu balih lamma gashsha luuk yine, gaabbaa balih lel waanishak yine.

¹² Usuk tamaa afti alluulattohi reeza inkoh kaa idhdhadde atneefecuk yine. Baarho kee teyalle martam lel tamaa raba guddussa biyaake akah urte afti alluulattoh akah yacbudiiniikah aba.

¹³ Usuk naba ishaarar aba tiya kinni, caranko gantah gira baarholle tane xiyawhi nifille akah obtaakah abak yine.

¹⁴ Amaa baarholle martamah lel amaa sefih rabeh ure tiyahi misle siraaxoona akah warishe. Amaa afti alluulattohi hidhdhadde abo izni akko akah yoxoye ishaarar abak ten doolabak yine.

¹⁵ Inkinnah amaa afti alluulattohi misli waanisho kee inkoh amaa misleh acbudinnixe mara yagdafoona ciloh, amaa malammit alluulatti afti alluulattohi misleh wafa akah yaxaw izne geye.

¹⁶ Amayim gantah inkoh cindha tiya naba tiyah, inkoh gaddaale kee baaxenta, inkoh finja-le kee garuzzo, mizgi gaballe hido dambaralle maxtam alle akah gaxaakah abe.

¹⁷ Amayim lel tamaa alluulatti migac hido kaa migac hi nibro aalle wayemko, walaa inketti dhaamo hido yaabaxo akah wayaakah kinni.

¹⁸ Tayim kas farhshishsham kinni: amaa alluulattohi nibro xiyaw nibro kinnik, dhiicati yaxaasaboo. Amaa nibro lel 666 kinni.