Waxye 12 - Saaho Cusub Cahde

Numa kee gaabbaa

¹ Caranalle lel naba ishaara tumbulluwe: ishi lel wuli ayrottadde agoogitte, alsa lel ishi ibahi geridde hayteyaako, xutukti lamman kee taman le bor amokke le numa kuuk tine.

² Ishi soonowa kuuk tine, umulto fadhdhemhi sabbatah lel umlaaloh waaxelsiitak tine.

³ Aki ishaara lel caranalle tumbulluwe: taykinna, naba casa gaabbaa, malxina amo kee tamana gashsha leh, babbarhi amomuk malxina cindhadhdhaa erherharh le bor leya kuuk tine.

⁴ Ishi lel caranalle yane xutukko sarrah hirigteh maddaxit af guba baarholle cidde. Amaa numa umulta gedda amaa zabalo tandhaco ciloh, amaa umulto fadhdhe numah nifille daw-terhxe.

⁵ Ishi lel umbuka wathun birti iloh yagzaw kuuk yine barha bahte. Yakko kibah, tee barha akkanih Yalla kee kaa nugus-kurse fanah simbaaceenih kaa beyen.

⁶ Amaa numa lel tamaa Yalli akah yisqirribe makaano alle luuk tine, 1,260 lellectiya alle baclayitto luuk tine zibo fanah kudde.

Sheethan carsheeko guba baarholle ciddite

⁷ Carshelle dhiba tekke, Mikaa-eel kee kaa malaykut amaa gaabbaalih yengeecin. Amaa gaabbaa kee kaa malaykut lel sinne balih aalih yengeecin.

⁸ Yakko kibah, amaa gaabbaa timsiccire, carshelle lel toyek sarrah cara wayen.

⁹ Amaa naba gaabbaa, kalxit caroora kinya, umbuka caalam doolabe ibliis hido Sheethan akko yerhxinya, guba baarholle cidditte. Kaa malaykut lel kaalih cidditen.

¹⁰ Carshelle lel taginah wac-yarhxe dhaw oobbe: “Kado garger, xayla, ni Yallahi nigsinna kee kaa Masiixhi reeza temeeteh tane. Amayim lel, tamaa bar kee lellecih ni Yallahi nifille akko ashtikuuk ni saculhi qarim kuuk yineti guballe cidditeh yanemhi sabbatah kinni.

¹¹ Usun lel amaa Leemi biilo kee sinni shahaadahi waanittah kaa yisciriinih yanin. Amayim lel usun sinni aniina yikxiniinih walaa rabaako gantah misuumutinnoonimhi sabbatah kinni.

¹² Amaydo, carshe kee amalle martamak xedenanta! Baarho kee badak laakin, ibliis kaa waqhti urhurh tiya kinam yaarhigemhi sabbatah, naba kuraalih sinalle oobeh yanek, sin careyta!”

¹³ Amaa gaabbaa baarholle cidditteh tanem tuble gedda, amaa barha bahte numa hadante.

¹⁴ Amaa numa laakin amaa carooraako kuddeh adooxa iggida kee abrha amalle dhawurhumto kee baclaa alle geyta zibo fanah firto ciloh, naba lacanehi lamma gali akah yomxoye.

¹⁵ Amaa caroora nahaar balih laye afko sarradde akko xadhdhe. Amayim lel amaa numa weecah weecitto ciloh kinni.

¹⁶ Baarho laakin amaa numahi xatoh temeeteyaako, amaa baarho af fakteh amaa gaabbaa afko xadhdheh tine nahaar tundhuce.

¹⁷ Sarrah, amaa gaabbaa amaa numaalih mangum kurrayteyaako, amaa numat zaraako ractemlih dhibbayto tedee, amaa mari lel Yallih amre dhawudhdhem kee Yeesus shahaada tibbirhem kinon.

¹⁸ Usuk lel amaa badti gimamalle tine xootsalle daw-yerhxe.