Waxye 11 - Saaho Cusub Cahde

Lamma shaahid

¹ Sarrah wuli ilot xibare le boxotti masfar yoh yomxoyeh tahe yok yerhxin: “Ugutaaki Yallahi macbad kee mazbax imittir, amalle cibaada aba mara lel loolayish.

² Amaa macbadti daarat laakin maamattarin; amakke xab, amayim lel amakke Aki marah tomxoyeh tanemhi sabbatah, amaa qiddisti kin daafodde marootom kee lamma alsiya adde yacatcatoona kinon.

³ Inni lamma shaahidih lel reeza akah axawo kiyo, usun lel guula sariteenih 1,260 lellectiya nabii balih waanishoona kinon.”

⁴ Ta mari lel tamaa baarhot Maddari nifille soolteh tane lamma oolactö kee lamma qandel-defeena kinon.

⁵ Akkinnanti ten biyaako farhemko, gira ten afko tacweh ten cange bakta. Akkinnanti ten biyaako farhemko, taginah rabo alle tane.

⁶ Usun nabii balih waanishak rob radamko, caran alifoona xayla lon. Laye biilolle yaybaddaloona, sinneh akah farhinnan ginah lel, farhinnan bala baarholle gamoona xayla lon.

⁷ Sinni shahaada abayshan gedda lel, tamaa adda dherh boozooko yawce alluulatti dhiba aalih abeyaako akko yimlikeh ten yagdafo kinni.

⁸ Ten rashshit lel tamaa ten Maddari masqalakke akko takarime naba daafohi shaaricille raaco kinni. Teyak lel misaalah Sodom hido Masri akko yarhxin.

⁹ Barhsimte xiyaw, kishosh, waani kee wathunko tekettem lel tamaa ten rashshitidde adooxa lellec kee abrha kulux adde yerhxiinih, yamuccugemko ten deesoona kinon.

¹⁰ Amaa lamma nabii tamaa baarholle mara marah geeri-cagarto akah kuuk yiniinimhi sabbatah, tamaa baarholle mara mari bukalle akko xedeneenih xafla abenyaako muttuxuwa sittiyah yaxawna kinon.

¹¹ Laakin adooxa lellec kee abrhak sarrah Yalli wafa adde yedebbeyaako, ibah daw-yerhxin. Tena yuble maralle lel naba gilix alle oobe.

¹² Sarrah wuli dhaw carsheeko wac-yerhxeyaako: “Talle ewecanta!” akko yerhxe. Usun lel darurudde gaxeenih carshelle awcuk, ten cangit ten yublin.

¹³ Amaa saacadde lel naba kirdidimo tekke, amaa daafooko lel taman-ya af akko rade. Amaa kirdidimoh lel malxina shiix xiyawko raben, ractem lel mashshiiteenih carshi Yallah nabne yoxoyin.

¹⁴ Malammit bala tillabte; taykinna, maddaxit bala dhaye geddadde tamaato kinni.

Malxin-ta thurumba

¹⁵ Sarrah malxin-ya malaykatti ishi thurumba yootoke, carshelle lel mango dhaw wac-yerhxeyaako: “Baarhot nigsinna ni Maddara kee kaa Masiixhi nigsinna tekkeh tane. Usuk lel umman gedda kee umman gedih yangaso kinni” arhxuk yine.

¹⁶ Amaa Yallih nifille sinni nugus-kuraasille defeyteh tine lamaatanna kee afar naba maraako lel baarholle kumeenih Yallah acbuduk yinin:

¹⁷ Usun lel: “Nabamko naba Maddara kin Yalla, xamde koh takkoo, yaneh yine tiya kito, ishi naba xayla beyteh tanitomhi sabbatah tangaso erherhishshe.

¹⁸ Wathun kurraye, laakin ku kura temeete, tamaa rabtem adde tafrideh, ishi khaddamte, nobowa kee tinqiddisem, tamaa ku migacko mashshiita mara, cindha mara kee naba mara adde taxkiseh, baarho yaylaye mara adde taylaye waqhti gufeh yane” lel arhxuk yinin.

¹⁹ Sarrah carshelle yane Yallahi macbad fakkiteh, kaa cahdi sanduq lel amaa macbadadde yumbulluwe. Amalle xankarha, angud diixiyo, kirdidimo tekkeh sirii barad rade.