Waxye 10 - Saaho Cusub Cahde

Malaykatto kee cindhaa maqhaddamat

¹ Amaymik sarrah aki mangum sirii malaykatti, darurudde agoogiteh carsheeko oobak uble. Ishi amok robraat luuk yine, kaa nif lel ayrottah higgiduk yine, kaa lakuk lel girat camidih higgiduk yine.

² Ishi gabadde lel fakkitte cindhaa maqhaddamat luuk yine. Mizgi lak badalle, guri lak lel baarholle hayeh yine.

³ Goroxa lubak balih lel wac-yerhxeh deecime. Usuk deecime gedda, malxina angud angude.

⁴ Malxina angud angude gedda, aktabo farhe, laakin carsheeko: “Tamaa malxina angud yerhxeh yanem uxtum kibah, maktabin” yarhxe dhaw oobbe.

⁵ Tamaa anu bad kee baarholle soolak uble malaykatti ishi mizgi gaba carshelle xaf-isheh yine.

⁶ Umman gedda kee umman gedih yane, caran kee caranalle tanem, baarho kee baarholle tanem, bad kee badadde tanem yukhluqhe tiyahi migacalle dhiiwiteh: “Tayek sarrah caawino mitane” yerhxe.

⁷ Yakko kibah, tamaa malxin-ya malaykatti thurumbat dhaw yaatakoona kab adde yarhxin lelleecadde, tamaa kaa khaddamte kin nobowa akah yerhxiiniikah, amaa gedda tamaa Yallih mashthir yakmalo kinni.

⁸ Sarrah tamaa carsheeko oobbe dhaw malammih: “Aduu, tamaa bad kee baarholle daw-yerhxeh yane malaykattohi gabadde fakkitteh tane maqhaddamat bee” arhxuk oobbe.

⁹ Amaymih, amaa malaykattolle edeeh, amaa cindhaa maqhaddamat yoh yaxaw akah warishe. Usuk lel: “Beyaaki bet; ku garbadde cuure takko kinni, ku afadde laakin baska balih basak-tarhxo kinni” yok yerhxe.

¹⁰ Anu lel amaa cidhaa maqhaddamat malaykatti gabaako beyeh, beete. Yi afadde baska balih basak-terhxe, laakin beete gedda yi garbak cuure akko abte.

¹¹ “Mango xiyaw, wathun, waani kee nuguusat sabbatah malammih nabii balih waanishsho kolle tane” lel yok yerhxe.