Waxye 1 - Saaho Cusub Cahde

Orbeena

¹ Ta waxyi, tamaa dhaye geddadde takko alle tanem ishi khaddamteh warisho ciloh Yalli akah yoxoye Yeesus waxye kinni. Usuk ishi malaykatto dhirhiyeh lel ishi khaddaam kin Yohannis yiyshidhdhige.

² Yohannis inkoh yublemhi ware baahe. Ta wari lel Yallahi waanitta kee Yeesus Masiix shahaadahi zacabah kuuk yine.

³ Tayim adde takkole waqhti kab-yerhxeh yanemhi sabbatah, ta nobowat waani wac-yarhxeh yaqhriyeti baraka-le tiya kinni. Amadde tunkuttubeh tanem yaabbeh dhawrha mari lel baraka-lem kinon.

Salaamta malxina kaniisalle

⁴ Yohannisko Aasiyalle tane malxina kaniisa fanah: tamaa yaneh, yineh, yamaato le tiyaako kee kaa nugus-kursehi nifille yane malxina ufaylettaako nicma kee maaxiyo sinlih takkoo.

⁵ Amayim balih umun kin shaahid, rabtemhi riish, baarholle lel nuguusat manabotta kin Yeesus Masiixko maaxiyo sinlih takkoo. Tamaa ni kixinah, ishi biiloh ni zambeeko ni naggoysheh,

⁶ nigsinna nok abeyaako, ishi Yalla kee Abbah sheekha nok abeh yanek, nabne kee reeza umman gedda kee umman gedih kayyah takkoo. Amin.

⁷ Taykinna, usuk darurlih amiituk yane, umman inti lel kaa tablo kinni, tamaa kaa mude mari gantah kaa yabloona kinon. Umbuka baarhohi kishosh lel amayimhi sabbatah yaxzanoona kinon. Yoo haye, Amin.

⁸ “Anu Alfa kee Oomeega kiyo” yarhxe Maddara kin Yalli: “Yane tiya, yine tiya, yamaato le tiya, Nabamko Naba tiya kiyo.”

Xiyawti Barhahi mablo

⁹ Anu, Yohannis sin sacal, waaxelta, nigsinna kee Yeesus araxah geytima curtayyo sinlih yangaleya, Yallih waanitta kee Yeesus shahaadahi zacabah, tamaa Batmos akko yarhxin jaziiralle iniyo.

¹⁰ Maddari lellecidde, Yallih Ufayi yi yibbirheh lel dhaaco abitak ine; inni caazadde lel thurumba balih kin dhacuma dhaw oobbe.

¹¹ Amaa dhaw: “Tablem kitaaballe uktubaaki malxina kaniisa fanah Efesos, Simurna, Bergamos, Tiyateyra, Sardis, Filadelfiya kee Lawdikeya fanah dhirhii” yok yerhxe.

¹² Sarrah tamaa yottaalih waanishak yine dhaw aabbo ufkune, afkuniyuk lel malxina dahab qandel-defeena uble.

¹³ Amaa qandel-defeenanhi fanadde lel wuli xiyawti barhah higgidinti, dherh sara sariteh, naxaralle dahab mooreena mooriteh yine.

¹⁴ Kaa amohi dagar lel ciidot dagar kee barad balih caddummih higgiduk yine. Kaa intit lel girat bolah higgiduk yine.

¹⁵ Kaa iboobi otonudde cebedishen naxas balih lilic-arhxuk yine, kaa dhaw lel mango laye balih goroxak yine.

¹⁶ Mizgi gabadde malxina xutukta yibbirheh yine, kaa afko lel lillig lamma af-le sef awcuk yine, kaa nif lel ishi xaylaako iffoyta ayrottah higgiduk yine.

¹⁷ Anu kaa uble gedda, rabe tiya balih iballe akko rade. Usuk laakin, mizgi gaba yolle hayeyaako tahe yok yerhxe: “Mimashshiitin, anu erhedhdho kee sarroorimta kiyo,

¹⁸ yane tiya lel kiyo. Rabeh iniyo. Taykinna lel umman gedda kee umman gedih marak aniyo, raba kee Hadees mafaatix lel liyo.

¹⁹ Amaydo, ta tubleh tanitom, tamaa tanem kee taymik sarrah takko lem uktub.

²⁰ Tamaa yi mizgi gabadde tuble malxina xutukta kee malxina qandel-defeenahi mashthir yekkemko, malxina xutukti malxina kaniisahi malxina malaykatto kinni, malxina qandel-defeena lel malxina kaniisa kinni.”