Tiitos 2 - Saaho Cusub Cahde

Rummaahit mazhab uydurus

¹ Atu yekkemko laakin, rummaahit mazhablih tamseeneem uydurus.

² Labhat daacun himma-le mara, xishma le mara, adabe le mara, imaan, kaxano kee curtayyoh rummadde yane mara kinon.

³ Sayyot daacun lel amayim balih, yislixe mara, xamitinnixe mara, askirinnixe mara kinon. Usun mecem yaydurusoona tenalle tane.

⁴ Amaydo, cindha sayyo sinni baacil kee sinni cindham akah yakxiniiniikah ten labcaadishoonaa.

⁵ Adabe abitoona, tsitstsii mara yakkoona, cari ciyyo aboona, mece mara yakkoona kee sinni baacilih akah yam-izziziiniikah ten labcaadishoonaa. Amayim lel, Yallih waanitta wattimtamko kinni.

⁶ Amayim balih, burguude adabe le mara yakkoona ten fayish.

⁷ Umbukahimidde abittotuh misaal akah tekkeyaako, ishi mazhabadde lilla, xishma tuybulluweh,

⁸ cadale-hin kas-le waani waanish. Amayim lel, tamaa didde kin mari xoolashshiitoona kee ni sabbatah yarhxin umaani wayoona ciloh kinni.

⁹ Garuuza lel ummanimih sinni wannunuh yam-azzazoonaa; ten xedenishoona kibah, aalih ankeexede wayoona.

¹⁰ Ni Gargeereena kin Yallahi mazhab ummanimidde yaskxanoona ciloh, maylalayit akke wayoonaaki, ummanimidde meceetih yaaminin mara yakkoonaa.

¹¹ Yallih nicma umbuka xiyawah garger bahteyaako bilbilteh tane.

¹² Ta nicma, tamaa Yallih mashshi hinam kee caalamti uma farhi xabneyaako, ta yane waqhtedde adabe abinneh, mece araxah, Yallih mashshih wayto xabno ni tayduruse.

¹³ Taginah lel, tamaa baraka-le ni cag, naba ni Yalla kee Gargeereena kin Yeesus Masiix nabne caddoyto, ilaalak nane.

¹⁴ Usuk umbuka uma ciyyooko ni yayyaaco, abittotuh qeera le mara, isheh yabbuxute xiyaw yaytsatstsaw ciloh, nottah arhxuk ishi nabse tillaabishe.

¹⁵ Tayim warroyish; umbuka reezaalih fayishsheyaako oskoolof. Walaa inketti ku ilaace wayoo.