Tiitos 1 - Saaho Cusub Cahde

Salaamta

¹ Yallih garuzza kee Yeesus Masiix fartotta, tamaa Yallah doorime marahi imaan kee ten Yallih mashshiilih tanseene rummi irhga warroysho ciloh deeco akah tekke Bawlosko.

² Ta irhga tenah umman geedit aniinahi cag taxaye. Tamaa caduruh zirabbitinnixe Yalli lel ta caalam erherhekkah wacde akah sayem tatiyä kinni.

³ Kaa waqhti gufe gedda lel, tamaa ni Gargeereena kin Yallahi amreh, amaanah yolle yomxoye warroyishnan araxah ishi waanitta caddoyshe.

⁴ Ta farto tamaa inkidde nangale imaanah rummaahit yi barha kin Tiitos fanah kinni. Abba kin Yalla, ni Gargeereena kin Masiix kin Yeesusko nicma kee maaxiyo kottaalih takkkoo.

Kaniisat naba mari yakkoona missilam

⁵ Kireetelle ku xabem, anu akah koh esxesseekah tamaa ractem tesxedeedereyaako, umman daafolle naba mara tayyaaco ciloh kinni.

⁶ Kaniisat naba tiya yakketi akah caddaalimam hin tiya yakko kee inki numah bacla yakko alle tane. Kaa cindham lel yaaminin mara kee fasaad hin mara hido akko yarhxiinim yaabbe mara akko kin tiya yakkoo.

⁷ Kaniisat bukalle macalso abati, Yallih masxadaadari akah kinniikah, akah caddaalimam hin tiya yakko kaalle tane. Yamnanabbe tiya, hido dheh kurraya tiya, hido sakraan, hido mangaaca, hido kasbi hirfe le tiya yakko kaalle mitane.

⁸ Laakin, gerha kixin tiya, mecaani kixin tiya, ishe yamlike tiya, xaqqi-wanna, yinqiddise tiya kee adabe le tiya yakko kaalle tane.

⁹ Usuk tamaa yaaminin darseh asxossa yaxaw ciloh, didde kin maralle lel araxah alle akah yadabbeekah dhiico ciloh, tamaa yudruse rummaahit mazhaballe yasbato kaalle tane.

¹⁰ Mango mari, fertoh lel tamaa askok-kalum mari, am-izzizinnixe mara, anrabaalit kee doolabeenit kinon.

¹¹ Usun uma maksab geyoona ciloh, yaydarasoona eedinnixoonim aydurusuk diika wahana mari, daw-yarhxoona tenalle tane.

¹² Tamaa Kireeteeti maraako inketti, ten nabii kuuk yineya: “Kireeteeti xiyaw umman gedda zirablit, uma alluula, hirfe-le bohosa kinon” yerhxeh yine.

¹³ Ta shahaada rumma kinni. Amaydo, rummaahit imaan yaalloonaaki dhacumaatih ten oskoolof.

¹⁴ Amayim lel, Yahuud tinem-tine kee rummaako ticrhiye xiyawhi amreh yadiyiinimko ciloh kinni.

¹⁵ Tsitstsii marah, ummanim tsitstsaye akah leya; masxittem kee aamininnixe marah laakin walaa inkim tsitstsaye akah male. Laakin inkoh ten xangal kee ten niya masxittem kinni.

¹⁶ Usun Yalla yaarhigiinimih yashhidin, sinni abittoh laakin kaa xinan. Usun batakna kin mara, akko yarhxiinim aabbinnixe mara kee mece abitto abo dhiicinnixe mara kinon.