Rooma 9 - Saaho Cusub Cahde

Yallih dooro

¹ Masiixih rumma waanishak aniyom, zirabbitak maaniyom, Quddus kin Ufayehi araxah yi afcaadohi dhaw yoh warisha.

² Mango xazan kee bakitinnixe qadaab inni afcaadodde liyo.

³ Anu inneh xazottat araxah yi sacul kin yi zamadah arhxiyuk, abaaro-le akkeedo, Masiixko barhsimo farhe dhaarhe.

⁴ Usun Israa-eel xiyaw kinon, Yallih cindham yakkiinim, nabne, cahde, sercat kabbat, cibaada, kee wacde tenim kinon.

⁵ Abbub ten mara kinon, Masiix lel xazottah tenko rada. Usuk ummanimhi bukalle Yalla kinnik, umman gedda fayla geyoo! Amin.

⁶ Tayim laakin Yallih waanitta foyya tekkeh racte yarhxiinim maki. Tamaa Israa-eelko raddam inkoh Israa-eel makinooni.

⁷ Amayim balih, Abraahim zara kinoonimhi sabbatah inkoh kaa cindham kinon yarhxiinim maki. Laakin: “Isxaaq zaraako kinni ku migac xussuumo leyam” yarhxiinim tane.

⁸ Tayim yarhxiinim lel, xazottat cindham maki Yallahi cindham takkemki, wacdi cindham kinni zaradde loyyimtam.

⁹ Amayim lel: “Sarrat zaban ta max gaxo kiyo, Saara lel barha bahto kinni” yarhxe wacdi yinemhi sabbatah kinni.

¹⁰ Tayim bisa maki, Ribqa wuli ni abba kin Isxaaqko cindhamalle soonoyitte gedda,

¹¹ amaa cindham aabukekkah, mecaani yakko umaani lel abekkah, Yallahi doorot xagara katattayto ciloh, ten abittohi sabbatah akkekkah, tamaa deecimatiyahi sabbatah:

¹² “Nabati cindha tiya yakhdamo kinni” akko yerhxeh yine.

¹³ “Yacqoob kixiniyo, Ceesaw nicibiyo” yarhxiinim lel tunkuttubeh tane.

¹⁴ Ayim narhxo kinni haye? Yallaalih xaqqi-wayto taneho? Maale haye!

¹⁵ Yalli Moosak lel: “Raxma alle liyo tiyalle alle raxmato kiyo, xaaliyo akah liyo tiyah lel akah xaaliito kiyo” akko yerhxe.

¹⁶ Amaydo, tamaa raxma le Yallaako kibah, xiyaw farhiiko hido xawalko maki.

¹⁷ Fircawunuk: “Inni xayla kottalle ayballaw kee yi migac umbuka caalamalle warreyo ciloh kinni kotta ugusem” yarhxe Kutuub yane.

¹⁸ Amaydo, farhe tiyalle alle raxmatanta, farhe tiyalle lel alle yaytirire.

¹⁹ Amaydo: “Aymih kinni kaddih abar geyam? Miyatto kinni lel kaa farhi deeso dhiicati?” yok tarhxo kito.

²⁰ Laakin, ko xiyawto, Yallalle tadabbo, atu miyatto kito? Ginniimeti gine tiyak: “Aymih taginah yi abte?” yarhxeho?

²¹ Citror abati inki kallaako wuli citro naba nafaacah, akettö lel cindha nafaacah akko siraaxo amaa kallah bukalle reeza male?

²² Yalli ishi kura yayballaw kee ishi xayla yayshadhdhago farheyaako, liyah yinqirribe kurat citrorulle naba sabreelih curemko ayim kinni?

²³ Raxmat citror tamaa yookomeh nabneh siraaxeya, ishi nabneh gadda ten yayballaw ciloh,

²⁴ tamaa Yahuudko bisa akkekkah, Aki-maraako akah deecime marak nottah tayim gantah abemko?

²⁵ Yalli nabii Hosheecadde: “Tamaa yi xiyaw akkekkah yine marak: ‘Yi xiyaw’ akko arhxo kiyo, tamaa ankixxinekkah tine tiyak, ‘Yi kaxantoolë’ akko arhxo kiyo.

²⁶ Tamaa: ‘Yi xiyaw makitiini’ alle akko yerhxin makaanolle lel: ‘Yane Yallih cindhamah’ decsiimoona kinon” akko yerhxeh yine.

²⁷ Isayas Israa-eel cindhamhi zacabah wac-yerhxeyaako: “Israa-eel cindhamhi manga badti xootsa balih walaa takko kibah, tenko ractem bisa gargeerimoona kinon.

²⁸ Amayim lel Yalli baarholle caawitekkah ishi firde kaamilih abo kinamhi sabbatah kinni” yerhxe.

²⁹ Isayas: “Carshi maxaarhohi Maddari zara noh xabe wayeh yakkeedo, Sodom balih akke dhandhe, Camora lel ammingide dhandhe” yerhxeyaako yookomeh yerhxeh yine.

³⁰ Ayim narhxo kinni haye? Xaqqe wagiinnixe Aki-mari, imaanah yamiite xaqqe geyen;

³¹ Israa-eel xiyaw laakin xaqqelle yamaatoona sercat katayniyaako sinni bursaale migufinnooni.

³² Aymih? Abittotuh kibah imaanah miwagiinnoonimhi sabbatah kinni. Andafisha dhayittodde lel andafiten.

³³ “Taykinna, Tsiyoonulle andafisha dhaa kee xiyaa cidda duma oobishak aniyo; kayyah aamininnanti lel xoolashshiito maki” yarhxiinim tunkuttubeh tane.