Rooma 8 - Saaho Cusub Cahde

Ufayeddehi aniina

¹ Amaydo kado, Masiix kin Yeesusudde yane mari qitscat yaalloona makinooni.

² Amayim lel, Masiix kin Yeesus araxah Ufayi sercat aniina yaxayeya, zambe kee rabit sercatko finja koh yoxoyeh yanemhi sabbatah kinni.

³ Amayim lel, xazotta taanishshemhi sabbatah sercat abo taanem, Yalli abeh yane. Ishi Barha zambi beezza yakko zambe-le xazottat xibarah dhirhiyeh, zambe lel xazottadde yiqhtsice.

⁴ Amayim lel, Ufayi araxah kibah, xazottat araxah adiinnixe marak, amaa sercat farhshiisha xaqqi nottadde yakmalo ciloh kinni.

⁵ Inkoh tamaa xazottat araxah yadiye mari, amaa xazottaatim kinni xangaladde loonim. Tamaa Ufayi araxah yadiye mari laakin, Ufayim niyadde lon.

⁶ Xazottaatim xangaladde yaxeesebiinim raba kinni, Ufayim xangaladde yaxeesebiinim laakin aniina kee maaxiyo kinni.

⁷ Xazottat xangal Yallih didde kinni; Yallih sercat miyaabbe, yaabbo lel mirhicta.

⁸ Xazottadde yane mari lel Yalla xedenishoona mirhiicaana.

⁹ Atin laakin, Yallih Ufayi rummah sin addadde sigah yekkemko, Ufayedde kibah xazottadde mitaniini. Masiix Ufaye hinti kaa tiya maki.

¹⁰ Masiix sin addadde yinniyemko, walaa sin nabsi zambi sabbatah rabo kibah, Ufayi xaqqi sabbatah aniina sinah yaxaye.

¹¹ Tamaa Yeesus rabaako uguse tiyahi Ufayi sinadde sigemko, tamaa Yeesus rabaako uguseti sin addadde siga ishi Ufayehi araxah rabe sin nabseh aniina akah yaxaw kinni.

Masiixlih waarish yakkiinim

¹² Amaydo, yi sacul, xazottat araxah marno ciloh, xazottat cida malino.

¹³ Xazottat araxah marteenimko, rabtoona kitin, nabsi abitto Ufayeh tigdifiinimko laakin martoona kitin.

¹⁴ Amayim lel inkoh Yallih Ufayi santisha mari, Yallih cindham kinoonimhi sabbatah kinni.

¹⁵ Atin tamaa, “Abba! Wobba!” narhxeh akah deecimna Yallih cindham akah takkin Ufaye kinni kabbatteenim kibah, mashshidde sin yadabbe garuuzinnat ufaye maki kabbatteenim.

¹⁶ Nanu Yallih cindham kinom Yallih Ufayi isheh ni ufayelih yakkeh kinni yashhidem.

¹⁷ Amaydo, Yallih cindham nekkemko, Yallih waarish kino, Yallih waarish nekkemko lel inkidde Masiixlih waarish kino. Kaalih waaxelta nengelemko gantah kaalih nanabem takke.

Niiroohit nabne

¹⁸ Ta kado adde nanino waqhtehi waaxelti, tamaa nottah tamballaw le nabneelih kabkabbot malem balih kinni lowam.

¹⁹ Makhaaliqho lel amaa Yallih cindham adde yambulluwin max mango hambereeroolih ilaalak tane.

²⁰ Amaa makhaaliqho lel ishi farhih akkekkah, tamaa abshiisha tiyahi sabbatah hannas tekkeh tane, laakin cag yane.

²¹ Amaa cag lel, makhaaliqho isheh ishi abrasti madhdhuwaako finja geyto kinni, finja kee Yallahi cindhamhi nabnelle lel tamaato kinni.

²² Umbuka makhaaliqho umlaalot waaxeltah balih kado fanah inkidde araadishak tanem naarhige.

²³ Amaa makhaaliqho bisa akkekkah, tamaa Ufayi afti daro le marak nanu gantah ninneh, Yallih cindham nakko kee ni nabsi muuca geyo addaako araadishak hambereeroolih ilaalak nane.

²⁴ Amayim lel nanu ta cagadde gargeerimnemhi sabbatah kinni. Tambulluwemih cag abitaanam cag maki. Yablemih cag abita tiyah miyatti yane?

²⁵ Ablinnixinomuh cag abinnemko laakin, sabreelih ilalna.

²⁶ Amayim balih, Ufayi ni tantodde ni xata. Dhaaciminno akah nolle taneekah minaarhige, laakin Ufayi isheh waani hinnim yamoofoyeh ni idhdhadde yakkeh noh tillaaba.

²⁷ Amaa afcaado meecetih idhdhitati lel Ufayi xangaladde ayim yaxeesebem yaarhige. Amayim lel Ufayi Yallih farhi balih yinqiddise marahi idhdhadde tillaabamhi sabbatah kinni.

²⁸ Tamaa Yalla kixinah kaa xagara balih decsiime marah ummannim Yalli mecaanih akah abam naarhige.

²⁹ Usuk mango saculhi fanadde riish yakko ciloh, tamaa yookomeh yeerhege mara, kaa Barhahi misleh yammangadoona ciloh yookomeh yixiggire.

³⁰ Usuk tamaa yookomeh yixiggire marah gantah akah deecimeh, tamaa akah deecime mara yisxiqqiqheh, tamaa yisxiqqiqhe mara gantah yeynebe.

Umman geedit Yallih kaxano

³¹ Tayimhi sabbatah ayim narhxo kinni? Yalli nottaalih yekkek sarrah, ni didde yakko dhiicati miyatto kinni?

³² Ishi Barha umman nottah yaxaw suumutinnixeti, aaginah kaalih ummannim amaa ginah noh axaye waya?

³³ Yalli dooreh yane mara taksisem miya kinni? Yalla kinni ku yasxiqqiqheti.

³⁴ Amaa yaqhtsiceti lel miyatto kinni? Tamaa rabeti, amayimko ziyaada lel, rabaako uguteti, Yallih mizgi gabooko yaneti, ni idhdhadde lel noh tillaabati Masiix kin Yeesus kinni.

³⁵ Masiix kaxanooko ni barhishati miyatto kinni? Cazaab, qadaab, hadaano, hido culul, hido casno, camaza hido sefi?

³⁶ “Ku idhdhadde max-yeenim ni agdifuk yanin; tamruxxude ciidodde loyyimne” yarhxiinim tunkuttubeh tane.

³⁷ Maale, umbuka taymidde, ni kixin tiyahi araxah tamaa yamlike maraako nashshe.

³⁸ Amaydo, hido rabi hido aniina, hido malaykut hido manabottit, hido kado tanem hido niiroh tamaato lem, hido xaylit,

³⁹ hido xafta, hido samta, hido akim umbuka ta makhaaliqhodde Yallih kaxano ni Maddara kin Yeesus Masiixidde linoyaako ni barhisho dhiicati miyanemih thummut kiyo.