Rooma 7 - Saaho Cusub Cahde

Sercatko yawciinim

¹ Yi saculo, sercat yaarhige marah kinni warishak aniyom; sercat xiyaw yarhuwem yaniinim fanah bisa kinam mitaarhigiini?

² Numa tee bacli yanem fanah kaalih sercatah tumudhdhuweh tane, usuk rabemko laakin, marcat sercatko tamfittixe.

³ Amaydo, tee bacli yane hanuk aki labhattoolih martemko zaaniya takke. Tee bacli rabemko laakin, amaa sercatko finja geyta, aki labhattodde marcishimtemko lel zaaniya mitakke.

⁴ Amayim balih, yi saculo, Yallah takke fire bahno ciloh, tamaa Yalli rabaako uguse tiyah takkoona ciloh, atin gantah Masiix nabseh sercatko rabih barhsimteenih tanin.

⁵ Amayim lel nanu xazottah marak nine gedda, zambi-wanna kin ni farhi sercatah uguugutteya, ni karimidde ciyyodde tinemhi sabbatah, rabah takke fire bahne.

⁶ Kado laakin, tamaa ni yurhuweh yine tiyaako rabneh barhsimnemhi sabbatah, seractko newceh nane. Amaydo kado, yunkuttube kalxit sercat araxah nadawo akkekkah, cusub Ufayehi aniina nakhdume.

Sercat kee zambe

⁷ Ayim narhxo kinni haye? Sercat zambe kinni narhxo? Maale haye! Laakin anu sercat hinnim zambe aarhige mirhaarhiyo. Sercat: “Garinam miduumutin” arhxe wayeh yakkeedo, garinam duumutaanam ayim kinam aarhige mirhaarhiyo.

⁸ Zambi laakin sercat araxah caashir geyeyaako umbuka caynah duume yodde uguse. Amayim lel sercat hinnim zambi rabeh yane.

⁹ Sercat anniye waak yinem balih marak iniyo gedda, amri yemeete gedda laakin zambi yane tiya yekke, anu lel rabe.

¹⁰ Tamaa aniina baaho kuuk yine amri yottah raba yolle baahe.

¹¹ Zambi amri araxah caashir geyeyaako, yi doolabeh kaa araxah yi yigdife.

¹² Amaydo, sercat quddus kinni, amri lel quddus, xaqqi-wanna kee mece tiya kinni.

¹³ Amaa mece tiya kinni yottalle raba baaheti? Maale haye! Raba yottalle bahtem zambe kinni. Zambi zambe kinam tamballaw ciloh kee, amri araxah nabaatih zambe yakko ciloh amaa mecaani kinamah abeh raba yolle baahe.

¹⁴ Sercat Yallih Ufayeko kinam naarhige, anu laakin zambi geridde yimibbixe xazooko yekke xiyawto kiyo.

¹⁵ Anu abam ayim kinam maarhige. Amayim lel anu tamaa nicibiyom kinni abam kibah, farham maki abam.

¹⁶ Kado, anu tamaa farhe wayam abemko, mece tiya kin sercatlih amseene.

¹⁷ Amaydo, tamaa yottadde yane zambe kinni amayim abak yaneti kibah, yotta maki.

¹⁸ Yottadde, yi xazottadde mecaani misigtam aarhige. Mecem abo farhi liyonkah, abo mirhiica.

¹⁹ Tamaa anu abo farha mecaani akkekkah, abo farhinnixiyo umaani kinni abam.

²⁰ Kado, tamaa abo farhinnixiyom abak inniyemko, yotta maki abak yanetiiki, yottadde mara zambe kinni.

²¹ Amaydo, mecem abo farha hanuk umaani yottaalih tane tiya kinamah ta dhinto geye.

²² Inni addadde, Yallih sercatah xedeneena kiyo.

²³ Laakin, yi xangal sercatlih yangaace aki sercat inni karimidde abliyuk ane. Amaa sercat yi karimidde yane zambi sercatah yi yurhuweh yane.

²⁴ Anu umaatih yane xiyawto kiyo! Ta rabit nabseeko miyatti yi yayyaaco kinni?

²⁵ Ni Maddara kin Yeesus Masiix araxah Yallah xamde takkoo! Amaydo, anu inneh inni xangalah Yallahi sercat akhdume, inni xazoh laakin zambi sercat akhdume.