Rooma 6 - Saaho Cusub Cahde

Zambi xayli yiggidile

¹ Ayim narhxo kinni haye? Nicma tammango ciloh zambe abak marno?

² Maale haye! Zambeeko rabih barhsime marak, aaginah kaddih adde marna?

³ Inkoh Masiix kin Yeesuslih tiya nakko yimthimmiqhe marak, kaa rabidde tiya nakko ninthimmiqhe mitaarhigiiniho?

⁴ Amaydo, tamaa Abbat nabneh Masiix rabaako akah uguteekah, nanu lel cusub aniinadde marno ciloh, anthammaqhah rabidde kaalih numuccuge.

⁵ Kaa rabidde kaalih nengeleh ninniyemko, rabaakohi ugut hi max lel mudhdhuguh kaa rabaakohi ugutuh higgid rabaakohi ugutudde kaalih nangalo kino.

⁶ Tamaa zambi-wanna kin ni nabsi foyya yakko ciloh, kalxit ni nabsi kaalih masqalakke takarimtem naarhige. Tayek sarrah zambeh minangizziye.

⁷ Amayim lel tamaa rabeti zambeeko finja geyemhi sabbatah kinni.

⁸ Kado, nanu Masiixlih rabneh ninniyemko, kaalih marnamah gantah naamine.

⁹ Rabaako ugute Masiix, malammih caduruh rabo makinam naarhige; kamboh rabi kaa bukalle reeza maleya.

¹⁰ Usuk rabe rabi, inki gedda umman tiyah zambeh abe rabi kinni. Laakin, usuk mara aniina, Yallah aba aniina kinni.

¹¹ Amayim balih, atin gantah zambeeko rabih barhsimteenim kee Masiix kin Yeesus araxah Yallaalih aniina geyteenim balih sinne lowa.

¹² Amaydo, tamaa rabe sin nabsi kaa farhi akah abtoona sin yaamirek, zambi sin agziye wayo.

¹³ Sin karim xaqqi-waytot maysaalaxa yakko zambeh maaxayna. Laakin, rabaako aniinalle yewce mara balih Yallalle sinne uxuwa, sin karim lel xaqqi maysaalaxa yakko Yallah uxuwa.

¹⁴ Amayim lel nicmat geridde kibah sercat geridde mitaniinimhi sabbatah, zambi sin bukalle reeza yaallo maki.

Xaqqi garuuza

¹⁵ Ayim kinni haye? Nicmat geridde kibah sercat geridde minanemhi sabbatah zambe abno? Maale haye!

¹⁶ Akkinnan tiyalle tangizziye garuuza balih sinne toxoynimko, tamaa akah tangizziin tiyahi garuuza kitiinim mitaarhigiini? Hido rabille xiyaa baaha zambeh yangizziye mara takkoona dhictan, hido lel xaqqelle xiyaa baaha Yallah yangizziye mara takkoona dhictan.

¹⁷ Yallah xamde takko lel, zambi-wannun kuuk tiniinimko, sinah yomxoye darsi caynah afcaadooko yangizziye mara tekkiinih tanin.

¹⁸ Zambeeko finja geyteenih lel xaqqi garuuza tekkiinih tanin.

¹⁹ Anu xiyaw waanih sinlih waanishak aniyom, atin khulqaako litin ruktahi sabbatah kinni. Wuli gedda, sinni karim garuuza balih xaraame kee uma ciyyoh toxoyin. Tayim lel ziyaada uma ciyyolle sin baaha. Kado sinni karim garuuza balih xaqqelle uxuwa. Tayim lel anqaddasalle sin baaha.

²⁰ Zambi garuuza kuuk tinin gedda, xaqqi gabooko finja luuk tinin.

²¹ Kado akko xoolashshiitak taniinimko, ayimti fire akko geyteeni? Amayimhi abayshima lel raba kinni.

²² Kado laakin, zambeeko finja geyteenih Yallahi garuuza tekkiinih tanin. Atin geytan fire lel anqaddasalle xiyaa bahtam kinni, amayimhi abayshima lel umman geedit aniina kinni.

²³ Zambi casbi raba kinni, Yallahi muttuxuwa laakin, ni Maddara kin Yeesus Masiix araxah umman geedit aniina kinni.