Rooma 4 - Saaho Cusub Cahde

Abraahim imaanah yitxiqqiqhe

¹ Tamaa xazottah ni abba yakke Abraahim ayim geye narhxo kino?

² Abraahim abittotuh yixiqqiqheh yineh yakkeedo, akah falitam aalle dhaarhe, Yallih nifille laakin male.

³ Kutuub ayim yarhxe? “Abraahim Yallah yeemene, amayim lel xaqqedde akah loyyimte” yarhxe.

⁴ Kado, yashtuqhule tiyah kaa casbi eedodde kibah, muttuxuwadde maki akah loyyiimam.

⁵ Xiyawti mece abitto aalle wayeh, Yallih mashshi hin tiya yasxiqqiqhe tiya yeemenemko, kaa imaan xaqqedde akah loyyiima

⁶ Dawud ishi gabooko, abittotuh akkekkah Yalli isheh xaqqi-wanna akko aba tiyadde waanisha gedda tahe yarhxe:

⁷ “Ten uma ciyyo akah xabbimteh, ten zambi lel akah yumsutture mari baraka-lem kinon;

⁸ kaa zambe Yalli alle loolayishinnixeti baraka-le tiya kinni.”

⁹ Ta baraka askok-kalum abe marah bisa kinni woole, askok-kalum abinnixe marah gantaha? “Abraahimih kaa imaan xaqqedde akah loyyiime” nerhxeh nane.

¹⁰ Aaginah kinni akah loyyimtem? Askok-kalum abekkaha, woole abek sarraha? Abekkah kibah, askok-kalum abek sarrah maki.

¹¹ Askok-kalum abekkah, imaanah xaqqi-wanna yekkemhi maxtamah, askok-kalum tuumarah kabbaate. Amaymih lel, sinni imaanah xaqqi-wannunudde loyyiimoona ciloh, tamaa inkoh askok-kalum abekkah yeemene marah abba yakko ciloh kinni.

¹² Askok-kalum abe marahi abba gantah kinni. Amayim lel askok-kalum abeenimhi sabbatah bisa akkekkah, Abraahim askok-kalum abekkah luuk yine imaanhi darib katayaanamhi sabbatah kinni.

Imaanah geytimte wacde

¹³ Abraahim kee kaa zarah sayen wacdi, usuk caalamti waarish yakko kinam, sercatah makiiki, imaanah geytima xaqqe kinni kuuk yinem.

¹⁴ Sercatadde cikkishite mari yiwrishiinimko laakin, imaan foyya kinni, wacdi lel makko male.

¹⁵ Amayim lel sercat kura baaha, sercat alle anniinnixelle lel sercat yagdiliinim mitanemhi sabbatah kinni.

¹⁶ Amaydo, wacdi imaanah yamiite, Abraahim zari lel ta wacde nicmah thummutuh inkoh geye lon. Tayim lel sercat dhawrhe mara bisa akkekkah Abraahim imaan-le mari gantah kinni. Usuk lel umman nottahi abba kinni.

¹⁷ “Mango diikah abba kok abeh aniyo” yarhxiinim lel tunkuttubeh tane. Usuk akah yaamine Yallahi nifidde ni abba kinni. Yalli rabtemih ufaye yaxaye, anniinnixem lel aniinalle baaha.

¹⁸ “Ku zari amayim yakkoona kinon” akko yerhxin Abraahim, cag alle anniinnixelle cag abiteyaako, mango diikahi abba yakko kinamah yeemene.

¹⁹ Abraahim qabri gimam gufe tiya kuuk yinemhi sabbatah, mece geddaakoh mangum baarroweh yineya kee Saarat guze lel gedme kinam aarhiguk, kaa imaan mitaaninna.

²⁰ Yalli akah yoxoye wacdehi zacabah imaan wayeyaako milammaa-garbitinna. Laakin kaa imaan anabuk yenebeh, Yallah nabne yoxoye.

²¹ Akah saye wacde Yalli abo dhiicam thummutuh yeerhegeh yine.

²² Taymih kinni lel Abraahimih imaan “xaqqedde akah loyyimtem.”

²³ Tamaa “akah loyyimte” yarhxe waanin kayyah bisa maki yunkuttubemki,

²⁴ nottah gantah kinni. Tamaa ni Maddara kin Yeesus rabaako uguse tiyah yaamine marak, nottah gantah noh loyyimto kinni.

²⁵ Usuk ni umaanih rabo yomxoye, ni asxaqqaqhah lel rabaako ugute.