Rooma 3 - Saaho Cusub Cahde

Yallih xaqqe

¹ Yahuuddo yakkiinimhi makko ayim kinni? Hido lel askok-kalum nafaaca lel ayim kinni?

² Umman ginah mangum kinni. Erherhih, Yallahi waani amaanah alle tomxoyem Yahuud kinni.

³ Tenko gari amaana hinam yekkiinimko ayim takke? Ten amaanat wayto Yallih amaana foyyayishsha?

⁴ Maale haye! Umbuka xiyawti barhi zirable kinni. Yalli laakin xaqqi-wanna kinamah tayim tunkuttubeh tane: “Ishi waanih tatxaqqaqho, tamfirride gedda lel taslago kito”

⁵ Ni xaqqi-wayto Yallih xaqqe taybulluwem tekkemko ayim narhxe? Yalli ishi kura xiyaalle oobishemko zaalim yakkeho? Xiyaw waanih kinni waanishak aniyom.

⁶ Maale haye! Tayim yakkeedo, Yalli caalam aaginah yafrado dhiica?

⁷ Yi zirabah Yallih rummi, kaa nabne taynabem yekkemko, anu aymih zambi-wanna akkeh amfirride?

⁸ Xiyawko gari caybishih: “Mecaanille tu tambiddileedo aymih umaani abe waynam?” narhxem balih waanishan. Ta marah yakke firdi xaqqe kinni.

⁹ Aymi haye? Nanu tenko adde nashshem linoho? Cadur haye. Nanu mece geddaako akah nuybulluweekah, Yahuud kee Giriik xiyaw inkoh zambi geridde kinni yaniinim.

¹⁰ Tayim lel tunkuttubeh tane: “Xaqqi-wanna miyane, walaa inketti miyane;

¹¹ Walaa inketti miyafhime; Yalla farhati miyane.

¹² Ummanti arax xabe; inkoh inkidde yekkiinih foyya yekkin. Mecaani abati miyane, walaa inketti.

¹³ Ten cumuti fakkite qabre kinni; sinni anrabah xiyaa doolaban. Ten wagubhi geridde datalitti xinzi yane.

¹⁴ Ten af abaaro kee cuureeko yemmeegeh yane.

¹⁵ Ten lakuk biilo xarho yarde;

¹⁶ ten aruxudde coona kee uma-bar yane,

¹⁷ Salaam arax lel yeerhegiinih miyaniini.

¹⁸ Ten intitidde Yallih mashshi adde mitane.”

¹⁹ Amaydo, inkoh umman tiyahi af sik-yarhxo ciloh kee umbuka caalam Yallahi firdih geridde tannaw akah eeddam tamadhdhago ciloh, sercat arhxinnannim, amaa sercat geridde yane marak yarhxem naarhige.

²⁰ Sercat yarhxem abeyaako Yallahi nifille yatxiqqiqheti miyane, laakin sercatah ninni zambe akah naarhige.

Imaanah yamiite xaqqe

²¹ Kado laakin, tamaa Sercat kee Nobowa akah yashhidiiniikah, Yallih xaqqi, sercat hinnim yimidhdhigeh yane.

²² Inkoh yaamine marah Yallih xaqqi, Yeesus Masiixidde lon imaanhi araxah akah yomxoyeh yane. Taymidde barhsi miyane.

²³ Inkoh zambe aben, Yallih nabne lel akko tunquse.

²⁴ Usun kaa nicma amaa ginah geyeenih yitxiqqiqhin. Tayim lel Masiix kin Yeesusko tamiite muucah kinni.

²⁵ Yalli lel imaanah kabbaatimo, xarhite kaa biiloh beezza yakko kayya kab-ishe. Tayim lel kaxlit zambeeko curtayyoh akko tillaabeh yinemhi sabbatah, Yalli ishi xaqqe yayballaw abem kinni.

²⁶ Tayim kadit waqhtedde abem lel ishi xaqqe yayballaw, xaqqi-wanna yekkeh lel tamaa Yeesusuh yaamine mara yasxaqqaqho ciloh kinni.

²⁷ Amaydo, ni falo ayim takke? Amayim racteh kinni. Awlih sercat hi sabbatah? Abina farhshiisha sercataha? Maale, imaan farhshiisha sercatah kinni.

²⁸ Xiyawti Sercat yarhxem abeh akkekkah, imaanah yatxiqqiqhem naarhige.

²⁹ Hido, Yalli Yahuud Yalla bisa kinniho? Aki-marahi Yalla gantah makini? Yoo, Aki-marahi Yalla gantah kinni.

³⁰ Yalli inketta kinni, askok-kalum abe tiya imaanah, askok-kalum abinnixe tiyak lel imaanah yisxiqqiqhe

³¹ Amaydo, sercat ninni imaanah cidak nane? Maale haye! Sercat aysibituk nane.