Rooma 2 - Saaho Cusub Cahde

Xaqqe kin Yallih firde

¹ Amaydo, aketto yafride tiyak, farhe tiya tekkeh, takale malito. Atu garo akah tifridem isheh abtamhi sabbatah, tamaa inkoh aketto akah tafridemih isheh ishe akah aqhtsicuk tanito.

² Nanu lel ta gina lem aba maralle Yalli rumma kin firde alle oobisham naarhige.

³ Atu ta gina lem aba mara yafride tiyak, atu isheh lel tena balih aba tiyak, Yallih firdeeko tassaacehi kolle higgida?

⁴ Hido lel kaa mango mecaani, curtayyo kee sabre dhaytak tanito? Yallih mecaani tooballe ku bahto wagiitam mitaarhige?

⁵ Ishi kafna kee afcaadot tiraareh tamaa xaqqe kin Yallih firdi adde yambulluwe kurat lellecih, atu isheh ishelle kura ascukuruk tanito.

⁶ Yalli umman tiyah kaa-kaa abittot balih akah yaxaw kinni.

⁷ Tamaa mecaani abak nabne, xishma kee rabe wayaanam sabreelih wagiye marah, umman geedit aniina akah yaxaw kinni.

⁸ Too rumma xinayaako xaqqi-wayto kabbaatah, ishi nabse kixin maralle, kura kee xurtaame alle obto kinni.

⁹ Inkoh umaani abinnan tiyalle; erherhih Yahuuddolle, sarrah lel Giriiktolle, cazaab kee qadaab alle oobo kinni.

¹⁰ Inkoh mecaani abinnanti laakin, erherhih Yahuuddo, sarrah lel Giriikto, nabne, xishma kee maaxiyo geyoona kinon.

¹¹ Amayim lel Yalli ayfalaala malemhi sabbatah kinni.

Yallih firde kee Moosat sercat

¹² Inkoh Moosat sercat hinnim zambe abe mari, Moosat sercat hinnim yalawna kinon. Sercat luuk zambe abe mari lel amaa sercatah yamfarradoona kinon.

¹³ Yallih nifidde, sercat aba mara kinni tatxaqqaqho lem kibah, sercat yaabbeh abinnixe mara maki xaqqi-wannun.

¹⁴ Sercat hin Aki-mari, thabiicaako amaa sercatalle tanem aban gedda, usun sercat aalle wayoona kibah sinneh sercat kinon.

¹⁵ Tayimhi sabbatah sercat ten afcaadodde yunkuttubeh yanem yaybulluyin. Usun abaanam araxalle tanem makinam ten afcaadohi dhaw akah warishayaako, ten xisaab isheh ten yaksise hido akah caara.

¹⁶ Anu warroyshe mece wari akah yarhxeekah, Yalli Masiix kin Yeesus araxah xiyaw sirrit adde yafride maxadde, tayim takko kinni.

¹⁷ Atu laakin, Yahuuddo ishek abtemko, sercatadde cikkishitteh, Yallah falittemko;

¹⁸ sercat ku labcaadishemhi sabbatah, kaa farhi teerhegemko kee tashshem barhishshemko;

^19-20 tamaa sercatko kaamil kin irhga kee rumma litomhi sabbatah, atu isheh intit hin marahi santisheena kitom, ditedde yane marahi ifotta kitom, sorheenitih ustaaz, irroh lel mudarris kitom teemenemko,

²¹ atu amaydo, aki mara yayduruse tiyak, ishe mitayduruse? Garacaanamko tayduruseh, isheh garacta?

²² “Xiyawti yaznaw kaalle mitane” yarhxe tiyak, isheh tazniye? Asnaam akko nicibtoya, isheh maqhdas carwa garacta?

²³ Yallih sercatah falitta, sercat tagdileh Yalla tascundhuwe?

²⁴ Taymih lel: “Sin sabbatah Aki-marahi addalle Yallih migac wattiime” yarhxiinim tunkuttubeh tane.

²⁵ Askok-kalum yamficem sercat dhawudhdha gedda kinni. Sercat tigdilemko laakin, ku askok-kalum, askok-kalum abe waytem balih yakke.

²⁶ Amaydo, askok-kalum abinnixeti sercat akko yarhxem abemko, kaa askok-kalum wayto askok-kalumudde miloyyimta?

²⁷ Atu yunkuttube sercat litoh askok-kalum abteh tanito hanuk, sercat yagdile tiyak, nabsi askok-kalum abinnixeti, sercat dhawrhaya, ku yafrado kinni.

²⁸ Irooko bisa Yahuuddo yakkiinim Yahuuddo xiyaak maabta. Nabseeko bisa aban askok-kalum lel askok-kalum miyakke.

²⁹ Laakin Yahuuddo yakkiinim addaako kinni. Askok-kalum yakkem lel afcaadooko Ufayeh kibah, yunkuttube sercatah yakke askok-kalum maki. Ta gina le xiyawtih cawat lel xiyawko akkekkah Yallaako kinni.