Rooma 16 - Saaho Cusub Cahde

Salaamta

¹ Feeben ni sacla, Kenkhereyaati kaniisadde takhdumeya sinalle amaanatisha.

² Tamaa yinqiddise mari akah kabbaatimoona missil araxah Maddari migacalle tee kabbattoona kee sinko farhinnannim tee xattoona sinak farha. Amayim lel, anu adde gaxak, mango marah naba xato kuuk sugtemhi sabbatah kinni.

³ Tamaa Masiix kin Yeesus khidma yottaalih tangale Biriskilla kee Akiilak salaamat akko yoh erhexa.

⁴ Usun yottah sinni fillit tillaabishe mara kinonyaako, anu bisa maki ten cawwatoyshitamki, umbuka Aki-marahi kanaayis gantah ten cawwatoyshitan.

⁵ Ten caredde takatte kaniisak yakkeedo salaamat akko yoh erhexa. Aasiyaati zoobälle umman maraako basolle Masiixih yeemene kixiniyo Ebaynetosuk salaamat akko yoh erhexa.

⁶ Sirii ginah mangum sinah tukhdume Maryamak lel salaamat akko yoh erhexa.

⁷ Yottaalih xabshedde yine Andaronikos kee Yuniya, yi zamad kinyak salaamat akko yoh erhexa. Usun fartottit meceetih ten yaarhigiinih, yottaako basolle lel Masiixih teemenem kinon.

⁸ Yi Maddarih araxah kixiniyo Ambaliyatosuk, salaamat akko yoh erhexa.

⁹ Masiix khidma nottaalih tangale Urbanos kee kixiniyo Istakhusuk salaamat akko yoh erhexa.

¹⁰ Masiixih arhxuk cakanaako tillaabe Abelleesik salaamat akko yoh erhexa. Aristobulosti dikik salaamat akko yoh erhexa.

¹¹ Yi zamad kin Herodiyonuk salaamat akko yoh erhexa. Maddarah taamine Narkissos dikko kin marak salaamat akko yoh erhexa.

¹² Sirii ginah Maddarah tukhdume Turifayna kee Turifoosak salaamat akko yoh erhexa. Sirii ginah mangum Maddarah tukhdume kixiniyo Bersisik salaamat akko yoh erhexa.

¹³ Tamaa Maddari doore Ruufosuk, tee ina, yottah gantah ina balih kuuk tineyak yakkeedo salaamat akko yoh erhexa.

¹⁴ Asunkiritos, Filegoon, Hermees, Batrobas, Hermas kee tenlih tane saculuk salaamat akko yoh erhexa.

¹⁵ Filologos, Yuuliya, Neereyus kee kaa sacla, amayim balih Olumbas kee inkoh tenlih tane yinqiddise marak salaamat akko yoh erhexa.

¹⁶ Atin lel tinqiddise fugtoh sittiyak salaam-erhexa. Masiix kanaayis lel inkoh salaamat sinak yarhxe.

Abayshimat fawo kee salaamta

¹⁷ Yi saculo, atin tudrusin darsehi diddeh babbarhishnan kee andafof aba maraako mirix akko tarhxoona sinalle amaanatishak aniyo. Akko zeelita!

¹⁸ Amayim lel ta gina-le mari, sinni farhi kibah ni Maddara kin Yeesus miyakhdumiinih kinni. Usun mece anrab kee zirabti faylah gar-hite marahi afcaadod doolaban.

¹⁹ Sin thaaca ummanti yeerhegemhi sabbatah sinak xedeneh aniyo. Mecem kinamalle kas-le mara, umamko lel barii takkoona sinak farha.

²⁰ Maaxiyot Yalli, Sheethan sin ibahi geridde hayeyaako dafaco kinni. Ni Maddara kin Yeesus Masiix nicma sinlih takkoo.

²¹ Khidma yottaalih yangale Timoteyos, salaamat sinak arhxuk yane; amayim balih yi zamad kin Luukiyos, Yasoon kee Soosibatros salaamat sinak yarhxin.

²² Ta jawaab yuktube Tertiyosuk, Maddara kataa maraako inketta akah kiyookah, salaamat sinak arhxuk aniyo.

²³ Yotta kee umbuka ta kaniisa arxibishe Gaayos salaamat sinak yarhxe. Daafot solaadi yabbirhe Erastos kee Kowartos ni sacal salaamat sinak yarhxin. [

²⁴ Ni Maddara kin Yeesus Masiix nicma sinlih takkoo! Amin.]

Faylat dhaaco

²⁵ Tamaa dherh mudda sucuteh suge, kado lel yumbulluwe mashthir balih, tamaa anu warroyshe mece ware kee Yeesus Masiix warroysham balih abeh sin yaysaraw dhiica Yallah nabne takkoo.

²⁶ Kado laakin caddoweh yane. Amaa nobowat kutuubhi araxah, umman geedit Yallahi amre balih, yeemeniinih yathaacoona, umbuka diikalle yimidhdhigeh yane.

²⁷ Ulah xikma-le Yallah, Yeesus Masiix araxah, umman gedda nabne takkoo! Amin.