Rooma 15 - Saaho Cusub Cahde

Masiix misaal

¹ Nanu sirii imaan-le marak, imaan tanto le mara xatno kinni nolle tanem kibah, ninne xedenishno maki.

² Nottaako ummanti ni zoobatti caro ciloh, mecaani akah abneh kaa xedenishno.

³ Tamaa: “Kottah waatima marahi waato yottalle obte” yarhxiinim akah tunkuttubeh taneekah, Yeesus ishe mixedenisho.

⁴ Tamaa Kutuubko geytima curtayyo kee aydukumusnan araxah cag abinno ciloh kinni, kalxa tunkuttubem inkoh ni santoh yunkuttubem.

⁵ Curtayyo kee aydukumusnan Yalli, Yeesus Masiix arax kataytan, sinne-sinneh inkidde akah martan samara sinah yaxaw.

⁶ Tayim lel Maddara kin Yeesus Masiix Yalla kee Abba inkidde inki xangalah kee inki dhawah taynaboona ciloh kinni.

⁷ Tamaa Masiix Yallih nabneh akah sin kabbaateekah, sittiya kabbata.

Masiix Yahuud kee Aki-marahi cag

⁸ Masiix tamaa abbubuh yomxoye cag yaysabato, ciloh Yalli lel umun kinam yayballaw ciloh askok-kalum abe marahi khaddaam yekkem sinah warisha.

⁹ Amayim lel Aki-mari kaa raxmah Yalla yaynaboona ciloh kinni. “Aki-marahi addadde ku faylisho, kee ku migacalle fayla qannisho kiyo” yarhxiinim tunkuttubeh tane.

¹⁰ Gabbaaceh lel: “Ko Aki-marawo, kaa xiyawlih tekkiinih xedena” yarhxe.

¹¹ Kataysheh lel: “Inkoh Aki-marak, Maddara faylisha, umbuka xiyaw lel kaa yassakaatoona” yarhxe.

¹² Malammih lel Isayas: “Yishxayko radati yamaato kinni, usuk uguteyaako Aki-marahi bukalle reezo kinni, Aki-mari lel kayyadde cag abitoona kinon” yarhxe.

¹³ Quddus kin Ufayehi xaylah sin cag meceetih yanabo ciloh, amaa cagti Yalli umbuka kayyah teemeniinimih xeden kee salaamah sin yamagoo.

Bawlos Aki-maralle yemeete fartotta

¹⁴ Yi saculo, mecaaniiko temmeegiinih, umbuka irhgah sittiya asuuso dhiica mara kitiinim anu inneh meceetih eemeneh aniyo.

¹⁵ Wuliilim sin xunsuuso, Yallaako yoh tomxoye nicmah sabbatah cadimbililih sinalle uktubeh aniyom,

¹⁶ Aki-maralle Masiix kin Yeesus khaddaam akko ciloh kinni. Amayim lel, Aki-marahi muttuxuwa Yallah kabbaatimto kee Quddus kin Ufayeh tinqiddisem takko ciloh, shekh ekkeh Yallih mece ware akhdume.

¹⁷ Amaydo, Yallih khaddaam kiyomuh Masiix kin Yeesusuh cafado inni gar liyo.

¹⁸ Aki-mari Yalla akah yaabbiiniikah akko abo, Masiix yi waani kee abittohi araxah abayshemko bextih anu akimidde waanisho mirhiica.

¹⁹ Tayim lel, ishaarar kee bexsishshamhi xaylah, Yallih Ufayehi xaylah tekkem kinni. Amaymih, Yerusaalemko erherhisheh, aykee Illirikon fanah Masiix mece ware kaamilik warroysheh aniyo.

²⁰ Aketti masarratalle ginamko ciloh lel tamaa Masiix migac alle miggacoyinnixelle mece ware warroysho naba farhi liyo.

²¹ Taginah lel tunkuttubem tane: “Tamaa kaa zacabah ware hin mari yabloona kinon, tamaa kaa zacabah aabbinnixe mari lel yafhamoona kinon.”

Bawlos Rooma yadaw yixiggire

²² Tayimhi sababah kinni sin fanah amiitemko mango-le gedda deesimem.

²³ Kado laakin, kamboh ta zoobaballe alle akhdume makaano mitane, sinalle amaato lel mango iggidit hambereerak sugemhi sabbatah,

²⁴ Ispaaniya adiye gedda tillaabak sinadde boodo kiyo. Dago gedda sinlih sugeh xedenek sarrah lel, atin meceetih yi sukuukuytoona cag liyo.

²⁵ Kado laakin, Yerusaalemille yane yinqiddise marah solaadi beyeyaako aduuk aniyo.

²⁶ Makedooniya kee Akhaaya, Yerusaalemille yinqiddise marahi addadde yane hin-marah xato yaxaynim yikxiniinih yanin.

²⁷ Eedo kinamhi sabbatah lel rummah yikxiniinih yanin. Aki-mari Ufayi baraka tenlih yengeliinik sarrah, usun lel maroona ten farhshishshamah tena yakhdumiinim akah eedda.

²⁸ Amaydo, anu tayim abayshah, tekettem tena gudduusa gedda, sinalle emeeteh Ispaaniya adaw kiyo.

²⁹ Sinalle amiite gedda lel, Masiix barakah emmeegeh amaato kiyom aarhige.

³⁰ Yi saculo, ni Maddara kin Yeesus Masiix kee Ufayi kaxanoh, yottaalih tekkiinih Yallalle yottah dhaacoh yottaalih tandafaloona sin amaanatishak aniyo.

³¹ Yahuudiyalle yane aamininnixe maraako dhawrhumo kee Yerusaalemille aba khidma amalle yane yinqiddise mari kabbaatoona dhaaco yoh aba.

³² Amayim lel, Yallih farhih xedenlih sinalle emeeteyaako sina goruh abiteh acrafo ciloh kinni.

³³ Salaam Yalli umbuka sinlih yakkoo. Amin.