Rooma 14 - Saaho Cusub Cahde

Sittiyalle mafradina

¹ Imaanalle tanto le tiya kaa kabbata kibah kaa mablolle alle mankaaxadina.

² Wuliti ummannim beeto dhiicamah yaamine tiya yakke gedda, imaan dagoti xalma bisa beeta.

³ Tamaa beetati beetinnixe tiya ilaace wayo, tamaa beetinnixeti lel, Yalli kaa kabbaateh yanemhi sabbatah, beeta tiya afride wayo.

⁴ Aketti khaddaamalle tafrado, atu miyatto kito? Usuk rade kee ugute yakkem ishi manabottih nifille kinni. Maddari kaa soolisho dhiicamhi sabbatah lel soolo kinni.

⁵ Wuliti wuli lellec aki lellecko yashshem balih yable, wuliti lel umman lellec lemih yable. Ummanti kaa inkoh xangal akah yeemenem aba.

⁶ Tamaa inki lellec xishmatati Maddarah arhxuk kinni abak yanem. Tamaa beetati lel Yallah xamde yaddabbemhi sabbatah Maddarah arhxuk kinni beetak yanem; tamaa beetinnixeti gantah, Maddarah arhxuk xabayaako, Yallah xamde yaddabbe.

⁷ Nottaako isheh arhxuk marati, isheh arhxuk lel raba tiyah nodde tanem male.

⁸ Marnemko Maddarah arhxuk marna, rabnemko lel Maddarah arhxuk rabna. Amaydo, rabneh rabe wayneh, Maddarim kino.

⁹ Masiix lel rabeh aniinalle akah gaxem, rabe mara kee yane marahi Maddara yakko ciloh kinni.

¹⁰ Aymihi ishi sacalalle tafridem? Hido atu, aymihi ishi sacal ilactam? Nanu firdi makaano Yallihiyahi nifille inkoh daw-narhxo kino.

¹¹ Amaymih: “Anu aniyomuh, yarhxe Maddari, umman gulub yoh gululluubo kinni, umman anrab lel Yallah yaalamo kinni” yarhxiinim tunkuttubeh tane.

¹² Amaydo, nottaako ummanti isheh abem Yallah warisho kinni.

Aketto mandafishin

¹³ Amaydo, kamboh ninne-ninneh sittiya afride waynoo, laakin sacal araxadde andafo hido deeso takkem haynamko lel selinnoo.

¹⁴ Akkinnannim xaraame takkem tamaa xaraame kinni yarhxeh yaxeesebe tiyalle kinni kibah, isheeko xaraame kinam mitanem Yeesus Masiix araxah eerhegeh eemeneh aniyo.

¹⁵ Atu bettam ku sacalalle aziya bahtam yekkemko, kaxano aybulluuk mitanito. Tamaa Masiix akah rabe tiya, atu bettamah kaa maylayin.

¹⁶ Amaydo, atin mecemih tabliinim aki mari akah ayrishaanaakah akko maabina.

¹⁷ Yallih nigsinna xaqqe, maaxiyo kee cafad Quddus kin Ufayedde yaneyah kibah, beetaanam kee yaacubiinimih maki.

¹⁸ Taginah Masiix yakhdume tiya Yalli kaa kixina, xiyaw lel kaa xishmatta.

¹⁹ Amaydo, maaxiyo bahtam kee ninne-ninneh alle carnam kataynoo.

²⁰ Foloh arhxitin, Yallih ciyyo midumusina. Rummah ummannim xalaale kinni, akkinnan tiya beetamah kaa andafishaanam eeddam maki.

²¹ Xazo beete wayaanam, hido wayni aacube wayaanam, hido farhinnannim ku sacal andafishshaya abe wayaanam, mecem kinni.

²² Atu lito imaan kotta kee Yallahi fanadde yakkoo. Rumma kinni yerhxeh abemih isheh ishe afridinnixeti baraka-le tiya kinni.

²³ Yakko kibah, lammaa-garbitak beetemko, tamaa betto imaanah maabinnamhi sabbatah yanqitstsice. Amayim lel imaanah akke waytem zambe kinamhi sabbatah kinni.