Rooma 12 - Saaho Cusub Cahde

Tane sadaqha

¹ Amaydo yi sacul, Yallih naxrurtahi araxah, sinni nabse tane sadaqha, quddus kee Yalli akah kabbaata araxah kab-ishshoona sin fayshak aniyo. Amaye lel rummaahit sin cibaada kinni.

² Sinni xangal tuscussubiinih inqiyyira kibah, ta caalamti thabiicah maadayna. Amaymih lel, Yallih farhi ayim kinam: kaa mecaani, xedenishshah naqhuse hin kaa farhi ayim kinam timirimiriinih seltoona kitin.

Nicmat muttuxuwa

³ Yoh tomxoye nicmah sinko umman tiyak arhxem liyo: tamaa Yalli sinko umman tiyah yoxoyeh yane imaanhi qiyaasalle, thummut kin firde yaxaye araxah yaxaasabo kibah, ishi sabbatah isheeko ziyaada aganalle yaxaasabo alle mitane.

⁴ Amaye lel inki nabsedde mango karim lino, amaa karim lel inkoh inki nafaaca malooni,

⁵ amaydo nanu, mangino hanuk, Masiixidde inki nabse kino, inkeekettah lel sittiyahi karim kino.

⁶ Tamaa noh tomxoye nicma balih, barhsimte muttuxuwa linok, natnaafacoo. Amaa muttuxuwa nabii balih waanisho yekkemko, amaati ishi imaanhi qiyaasalle aboo.

⁷ Khidma yekkemko, yakhdamo alle tane; aydaras yekkemko, yaydaraso alle tane;

⁸ fayishnan yekkemko, faysho alle tane; yaxaynim yekkemko, xindaalih yaxaw alle tane; santishnan yekkemko, aabboohosekkah santisho alle tane; raxma-le yekkemko, xedenlih raxmato alle tane.

Rummaahit kishtanti tuumar

⁹ Kaxani rummaahit tiya yakkoo. Umaani inciba; mecaani qath-ishanta.

¹⁰ Sacoolinni kaxanoh sittiya ikxina. Mangum sittiya xishmata.

¹¹ abinnannimidde mabbaahasina, ayqari le mara tika; Maddara ukhduma.

¹² Cag abitteenih xedena, tsabaabat waqhtedde sabre abita, salat mixabina.

¹³ Yinqiddise mara ten farhshishshamah ten xata. Gerha arxibishshoona wagiyanta.

¹⁴ Sin hadana marah dhaaco akah aba; dhaaco akah aba kibah ten maabaarina.

¹⁵ Xedena maraalih xedena, weeca maraalih weca.

¹⁶ Sittiyaalih samaraalih mara. Mamnanabbinantaaki, amnonobba-hin maraalih tika. Kas-le mara sinnek maabina.

¹⁷ Umman tiyahi intidde mecem kinam aba kibah, umaani umaanih mafdayna.

¹⁸ Dhiicimtemko, sinneh dhictaanam hidhdhalle, umman tiyaalih salaamah mara.

¹⁹ Yi kaxantoolito, “Xane yafdiinim yim kinni, ‘Anu afdaw kiyo’ yarhxe Maddari” yarhxiinim tunkuttubeh tanemhi sabbatah, Yallih kuralle ten xaba kibah, xane mafdayna.

²⁰ Laakin, “Ku cangi safriitemko kaa bettish, bakhaaritemko yaacubem akah uxuu; tayim abtak lel xoolah kaa xararishsho kito.”

²¹ Umaani mecaanih iscir kibah, umaanih mamsaccarin.