Rooma 11 - Saaho Cusub Cahde

Israa-eel xiyawko raace mara

¹ Amaydo anu essero liyo, Yalli ishi xiyaw xine? Maale haye! Anu inneh Israa-eelto, Abraahim zara, Benjamiin kishooko kiyo.

² Yalli tamaa yookomeh yeerhege ishi xiyaw mixininna. Eliyaas zacabah Kutuub yarhxem, usuk lel Israa-eel xiyawhi diddeh Yallalle aaginah yathricem mitaarhigiini?

³ Usuk yerhxe: “Maddara, ku nobowa yigdifin, ku mazbax dumusen, anu lel inkettak raace, yi yagdafoona lel farhak yanin.”

⁴ Laakin Yallih medobba kaalle ayim kuuk tine? “Tamaa Bacalah kume waye maraako malxina shiix racsiiteh aniyo.”

⁵ Amaydo, kado gantah, nicmah doorimeh raace mari yanin.

⁶ Amaydo, nicmah kibah abittotuh maki, amayim akke wayemko nicma, nicma akke mirhaarho.

⁷ Ayim kinni haye? Israa-eel xiyaw farhak yiniinim migeyinnooni. Doorime mari geyen, raace maraako laakin akko tisriye.

⁸ Amayim lel taginah tunkuttubeh tane: “Yalli kaafa fanah diye ufaye akah yoxoyeh yane, Ten intit miyable, ten cokkak miyaabbe.”

⁹ Dawud lel tahe yarhxe: “Ten maaddi madfan kee machchawaadiya, andafo kee fida yakkoo;

¹⁰ Yabliinimko ten intit dattowoo, ten diiroora lel umman geddah gudduttoo.”

Aki-mari yamtikkilin

¹¹ Amaydo anu essero liyo, usun radoona ciloh kinniho andafiteenim? Maale haye! Yakko kibah, Israa-eel xiyaw ashshiinisho ciloh, ten umaanih araxah Aki-maralle garger yemeete.

¹² Amaydo, ten umaani ta caalamah gadda yekkemko, ten radnan lel Aki-marah gadda yekkemko, kaamil kin ten agle ziyaadah ayidhdhale gadda akke dhadhdhe?

¹³ Aki-maraw, anu sinlih waanishak aniyo. Anu Aki-maralle fartotta kiyom hidhdhah, inni khidma mangum assokoote,

¹⁴ amayim lel, yi mara kin Yahuud ashshiinisho kee tenko garo gargeero ciloh kinni.

¹⁵ Tena xabaanam ta caalamah wagare bahtam yekkemko, tena kabbaataanam rabaako aniinalle gaxaanam balih kibah aki macna leho?

¹⁶ Afti daroh yomxoye cagunko dagum tinqiddisem yekkemko, amaa cagun inkoh inkidde quddus kinni. Rimid quddus yekkemko, amaa xakuk lel quddus kinni.

¹⁷ Amaa xakukko gari yiggidileh, atu zibi oolacko kito hanuk, akimhi fanadde timtikkileyaako, yayteele oolactot rimid tengelemko,

¹⁸ tamaa xakukulle mifalitin. Amayim abtemko, rimid kinni ku yaaqhucem kibah, atu rimid mitaaqhucem xunsus.

¹⁹ Sarrah lel: “Anu adde amtakkalo kinni xakuk yiggidilem” tarhxo kito.

²⁰ Amayim rumma kinni. Sinni imaan waytohi sabbatah kinni yiggidiliinim, atu laakin imaanah tisbiteh daw-terhxe. Amaydo, mamnanabbinaaki, mashshit.

²¹ Amayim lel thabiicat xakukuh naxinnixe Yalli kottah gantah naxo makinamhi sabbatah kinni.

²² Amaydo, Yallih mecaani kee siraye macalsit; Yallih siraye too rade maralle kinni, kottah laakin Yallih mecaani, atu kaa mecaanidde katattaytemko koh tomxowweh tane. Akke wayemko, atu gantah taggaraco kito.

²³ Usun gantah, sinni imaan wayto katattayshe wayeenimko, Yalli malammih ten yatkalo xayla lemhi sabbatah yamtakkaloona kinon.

²⁴ Atu thabiicah zibi oolacto kin tiyaako tiggiriceh, ku thabiicaako akkinnixe dhaget oolactodde akko timtikkileya, thabiicaako ta oolactot xakuk kuuk tinem, amayimko ziyaada gaxeenih sinni oolactodde yamtakkaloona kinon.

Israa-eel xiyawhi garger

²⁵ Yi saculo, atin maarhagit sinne takkaliinimko, ta mashthir sodhdhoona sinak mifarha: Israa-eel xiyawko gari, tiraare yuybulluynim Aki-maraako yaamano missil mari inkoh orobaanandah kinni.

²⁶ Taginah lel Israa-eel xiyaw inkoh gargeerimoona kinon: “Mayyaaci Tsiyoonko yamaato kinni, Yacqoobko lel Yallih mashshih wayto akko kalo kinni.

²⁷ Ten zambe kala gedda, tayim tenlih yi cahde yakko kinni”, yarhxiinim tunkuttubeh tane.

²⁸ Mece warehi gabooko yekkemko sinah arhxuk cangit kinon. Doorot gabooko laakin, sinni abbubuh arhxuk yinkixxine mara kinon.

²⁹ Muttuxuwa kee Yallih deeco caazalle gaxtam maki.

³⁰ Tamaa atin wuli gedda Yalla akah aabbe wayteeniikah, kado lel ten xinayyoh raxma akah kabbatteeniikah,

³¹ tamaa atin kabbatten raxma usun gantah kabbaatoona ciloh, usun kado yaabboona xineenih yanin.

³² Umman tiyalle raxmato ciloh, Yalli umman tiya xinayyodde yurhuwe.

³³ Yallih gadda, kas kee irhga mangum adda fidina! Kaa firdi miyammirmire, kaa arux lel miyanqeese!

³⁴ “Maddari xangal miyatti yaarhige, hido kaa faysheena miyatti yekkeh yaarhige?

³⁵ Hido lel, Yalli yadabbo-le muttuxuwa Yallah yoxoye tiyah miyatti yane?”

³⁶ Ummannim kaako, kaa araxah kayyalle kinni. Umman gedda nabne kayyah takkoo! Amin.