Rooma 10 - Saaho Cusub Cahde

¹ Sacul, yi afcaadoh farhi kee Yalla tenah akah dhaacam, usun gargeerimoona kinni.

² Irhgat araxah makih kibah, usun Yallahi qeera loonimih akah ashhide.

³ Yallih xaqqe sorheenih, sinni xaqqe dhishoona wagiyen, Yallih xaqqehi geridde lel sinne mihayinnooni.

⁴ Aamininnan tiyah xaqqe yakko ciloh, Masiix sercat abayshima kinni.

Gargerti farto umman tiyah

⁵ Sercat araxah yamiite xaqqi zacabah Moosa taginah yaktube: “Tayim abati taymih aniina geyo kinni.”

⁶ Imaanah yamiite xaqqi laakin tahe yarhxe: “Ishi afcaadodde: ‘Masiix ulluso, Carshelle korto lem miyatto kinni?’” marhxin.

⁷ “Hido lel: ‘Masiix rabtemko uguso, adda dherh boozodde oobo leti miyatto kinni?’” marhxin.

⁸ Ayim yarhxe lel? “Waanitta ku agaagalle tane, ku afadde kee ku afcaadodde tane” (amaye lel imaan waanitta nanu warroyishnaya kinni);

⁹ amayim lel Yeesus Maddara kinamah ishi afah teelemeh Yalli rabaako kaa ugusemih teemenemko gargeerimto kito.

¹⁰ Xiyawti ishi afcaadoh yaamineh yatxiqqiqhe, ishi afah yaalimeh lel gargeerima.

¹¹ Amaa Kutuub lel: “Kayyah aamininnanti caduruh xoolashshiito maki” yarhxe.

¹² Yahuud kee Giriik fanadde barhsi miyane; amaa inki Maddari umman tiyahi Maddara kinni, kaa deecinnan maradde lel mangaalih adde yabeereke.

¹³ Amayim lel: “Maddari migacah deecinnanti lel gargeerimo kinni.”

¹⁴ Akah aamine wayen tiya aaginah deecoona kinooni? Kaa sabbatah caduruh yoobbiinih sorhan tiyah aaginah akah yaamanoona kinooni? Akkinnanti akah warroyshekkah lel aaginah yaabboona kinooni?

¹⁵ Tamaa: “Mece ware warroysha marahi ibi ayidhdha carha mece!” yarhxiinim tunkuttubeh akah taneekah, farritime wayeenimko aaginah warroyshoona kinooni?

¹⁶ Laakin tamaa Isayas: “Maddara, nottaako yoobbem miyatti yeemene?” akah yarhxeekah, usun inkoh mece ware mikabbaatinnooni.

¹⁷ Amaydo, imaan maabbooko yamiite, maabbo lel Masiix waanittahi araxah tamiite.

¹⁸ Anu laakin esserak aniyo, yoobbiinih miyaniini? “Ten dhaw umbuka baarholle yewceh yane, ten waani lel caalamti abayshima gufteh tane” akah yarhxeekah rummah yoobbiinih yanin.

¹⁹ Anu laakin esserak aniyo, Israa-eel xiyaw mafhaminnooni? Yookomeh Moosa: “Dik akkinnixe maraalih sin ashshiinisho kiyo, duudit kin diklih lel sin kurraysho kiyo” yarhxe.

²⁰ Isayas lel cadimbililih: “Yi wagiye waye marah geytimeh aniyo, yotta esserime waye mara lel inne uybulluweh aniyo” yarhxe.

²¹ Israa-eel xiyawhi zacabah laakin: “Tamaa aabbinnixeh yi didde kin xiyawah umbuka max inni gabub akah iyfiddige” yarhxe.