Rooma 1 - Saaho Cusub Cahde

Salaamta

¹ Fartotta yakko decsiime, Yallih mece ware warroysho doorime, Masiix kin Yeesus garuzzo Bawlosko.

² Ta mece wari kalxaako Yalli ishi nobowat araxah abeh quddus kin Kutuubulle wacde akah saye tiya kinni.

³ Ta mece wari kaa Barhahi zacabah kinni. Usuk xazottah, Dawud zara kuuk yine.

⁴ Anqaddasti Ufayehi gabooko lel, Yallih Barha kinam rabaako uguteyaako, xaylah yuybulluwe. Usuk Yeesus Masiix ni Maddara kinni.

⁵ Umbuka Aki-marak yaamineh yaabbe mara akko abno ciloh, kaa migacalle nicma kee fartottoyishnan kabbatne.

⁶ Atin lel Yeesus Masiix mara yakkoona decsiime maraako kitin.

⁷ Inkoh Roomalle Yalli yikxineh yinqiddise mara takkoona decsiime marak: ni Abba kin Yalla kee Maddara kin Yeesus Masiixko nicma kee maaxiyo sinlih takkoo.

Bawlos Rooma yadaw hambereera

⁸ Erherhih, sin imaan umbuka caalamalle warreyemhi sabbatah, Yeesus Masiix araxah inni Yalla umbuka sinhi idhdhadde cawwatoyshita.

⁹ Daweena maleh umman gedda inni dhaacodde sin azgallemih, inni afcaadooko kaa Barhahi mece ware akko warroysha Yalli yi shaahid kinni.

¹⁰ Yallih farhi tekkemko, abayshimalle sina fanah amiitem takke arhxeh kinni, umman gedda inni dhaaco abitam.

¹¹ Sin aysarawo ciloh, Ufayi muttuxuwa sinlih xazziilito farhamhi sabbatah sin ablo hambereera.

¹² Amayim lel, sin kee yotta sittiyahi imaanah inkidde sittiya aydukumusno ciloh kinni.

¹³ Yi saculo, tamaa akuula Aki-maraalih geye fire, sinlih gantah geyeh orbisho ciloh, sinalle amaato mangole gedda ixiggirem (tayendah laakin deesimeh sugem) aarhigekkah ractoona mifarha.

¹⁴ Giriik xiyaw kee Giriik akkinnixe xiyaw, inkoh maarhagit kee sorheenitih warroysho cida liyo.

¹⁵ Amaymih, Roomalle tanemik gantah mece ware sinah warisho uguteh aniyo.

Mece Ware hi xayla

¹⁶ Aamininnanti inkoh, erherhih Yahuud, sarrah lel Giriik xiyaw gargeera Yallih xayla kinamhi sabbatah, yotta mece wari yi mixoolaysha.

¹⁷ Tamaa: “Xaqqi-wanna imaanah maro kinni” yarhxiinim tunkuttubeh akah taneekah, Yallih xaqqi erherhaako abayshima fanah imaanah caddoweh yane.

Yallih kura umaanille

¹⁸ Umbuka Yallih mashshih wayto kee xiyaw xaqqi-waytolle; amaye balih, sinni xaqqi-waytoh rumma dhuuna mara, Yalli ishi kura carsheeko ten yuybulluweh yane.

¹⁹ Yalli ten yuybulluweh yanemhi sabbatah, Yallih zacabah tamadhdhago dhictam akah caddoyteh tane.

²⁰ Amaa caalam tunkhulluqhemko taahe ambulluwinnixe Yallih thabiica; amayim lel umman geedit kaa xayla kee Yalli aymotta kinam, amaa usuk abemhi araxah meceetih caddoyteh tane. Amaymih takale adda hayaanam malooni.

²¹ Yalla yeerhegin hanuk, Yalla balih kaa miyaynabiini, hido kaa micawataana. Laakin, ten xisaab foyya yekkeyaako duudit kin ten afcaado dattoyte.

²² Usun kas loonim sinne yakkalin, laakin duudit yekkin.

²³ Rabinnixe Yallih nabne, raba xiyawto, kimbir, bahayim kee mexeltamhi xibar-le mislelle yiybiddilin.

²⁴ Amaymih, Yalli ten afcaadohi uma farhi balih sinne-sinneh xaraameh sinni nabse caynisha mara yakkoona akko yicdireh ten xabe.

²⁵ Amaa Yallih rumma ziraballe yiybiddiliinih, Yukhluqhe tiyahi idhdhadde lel yunkhulluqhe tiyah yucbudiinih yukhdumin. Usuk umman gedda baraka-le! Amin.

²⁶ Tayimhi sabbatah, Yalli akko yicdireyaako caybe kin farhi abitoona ten xabe. Ten saymari araxah labhaalih dhiinaanamhi idhdhah, sittiyaalih dhiinaanam labcaaden.

²⁷ Amayim balih labha lel, araxah sayyoolih dhiinaanam xabeenih sinne-sinneh sittiyahi farhih xararen. Labha aki labhalaalih xoola kinam abeenih, amaa aben qalathah lel farhshishsha qitscat sinni bukalle oobishen.

²⁸ Tamaa usun Yalla yaarhigiinim mifarhshishsham balih akah yubliiniikah, Yalli lel akko yicdireyaako caybe kinam aboona duhinnixe xangallih ten xabe.

²⁹ Usun umbuka caynah xaqqi-wayto, umaani, hirfe, xisdeh yemmeegiinih yinin. Ashshiino, gidfo, gica, siixo, kee zagaxaako temmeegem kuuk yinin. Xiyaw xamittam,

³⁰ xiyaw migac dattoyishsham, Yalla nicib mara, waatimeenit, yamnanabbe mara, falita mara, umaani cijaaja mara, dhaltoyya aabbinnixe mara,

³¹ duudit, yathlime mara, naxrurta hin mara kee biilo-malit kinon.

³² “Tayim abtamah rabi akah eedda” yarhxe xaqqe kin Yallih amre yaarhigin hanuk, tayim sinneh maabaana bisa akkekkah, aba mara gantah yassokootin.