Markos 9 - Saaho Cusub Cahde

¹ Yeesus lel: “Talle daw-yerhxeh yane maradde, Yallih nigsinna xaylaalih tamiitem yabliinindah rabaako dhacame wayo le mari adde yaniinim, rummah sinak arhxiyuk ane” akko yerhxe.

Anqayaayar

² Lixa lellecik sarrah Yeesus, Bithroos, Yacqoob kee Yohannis isheelih beyeh, sinni ulah wuli dherh koomalle ten yeyyeece. Ten afalle lel kaa xibar yinqiyyireyaako,

³ kaa sari lel zifishsham yekkeh, mangum caddowe, taginah lel baarholle walaa inketti micaddoysha.

⁴ Eliyaas kee Moosa lel amalle akah yumbulluynih Yeesuslih waanishak yinin.

⁵ Bithroos lel Yeesusuk: “Mudarris, nanu talle nanniyem mecem kinni. Talle adooxa daasa siraxnoo; tiya kottah, tiya Moosah, tiya lel Eliyaasah” akko yerhxe.

⁶ Amayim lel mangum birriigeenimhi sabbatah yarhxem sorheh kinni.

⁷ Camburre ten agoogishsheyaako lel, carsheeko wuli dhaw camburredde yemeeteh: “Tati yinkixxine yi Barha kinnik, kaa oobbaanta” yerhxe.

⁸ Gar-heeko gura-mizgalle kulux-yerhxin gedda lel, Yeesusko bextih walaa inketta maballinnooni.

⁹ Amaa koomaako oobak lel Xiyawti Barhi rabaako ugutandah, tamaa yubliinim walaa inkettah warishaanamko ten yeemere.

¹⁰ Amaymih ta gondo sinnedde yibbirhiinih, ta rabaakohi ugut hi macna ayim yakkem sitta esserak yinin.

¹¹ “Aymihi sercat dhiiceenit yookomeh yamaato leti Eliyaas kinni yarhxiinim?” yerhxiinih kaa esseren.

¹² Usuk lel: “Ummannim akah tineekah yadabbo rummah Eliyaas yookomeh yamaato alle tane. Aaginah kinniho Xiyawti Barhih sabbatah mango cazaab yablo kee ilaacimo alle tanem tunkuttubeh tanem?

¹³ Laakin Eliyaas yemeeteh yanem kee tamaa kaa sabbatah akah tunkuttubeekah, farhinnannim akko abeenim sinah warishak aniyo” akko yerhxe.

Najaasa-le ufaye le cindhookih urusnan

¹⁴ Katattaynitille yemeetin gedda lel, mango xiyawah makarimeenim yublin, sercat dhiiceenit lel tenlih yenkeexedin.

¹⁵ Akkanih amaa mango xiyaw kayya yublin gedda, mangum cibrah rabenyaako yerdiinih yemeetinyaako salaam akko yerhxin.

¹⁶ Usuk lel: “Ayimti sabbatah kinni tenlih ankeexeduk taniinim?” yerhxeh ten essere.

¹⁷ Amaa mango xiyawko wuliti lel: “Mudarris, naxar kaa wayshiisha ufayi kaa yibbirhemhi sabbatah yi barha kolle baaheh aniyo.

¹⁸ Kaa abbirhinnan gedda, kaa cida, afko caafo baahah lel ikok xarqam-ishah lel kafa. Amaymih ku katattaynit akah yayyaacoona ten essere, usun lel mirhiicinnooni” akko yerhxe.

¹⁹ Usuk lel: “Ko imaan malit kin ijow! Anu manda fanah sinlih sugo liyo? Manda fanah lel sinalle curo liyo? Talle yolle bah” akko yerhxe.

²⁰ Amaa cindhooka alle baahen. Amaa ufayi kayya yuble gedda, amaa cindhooka akkanih firigrig kaa ishe. Usuk baarholle radeh lel yombokookoleh afko caafo baahe.

²¹ Yeesus lel: “Tayim alle tekkemko ayidhdha kaleh yane?” yerhxeh kaa abba essere. Usuk lel: “Cindhaaneeko kinni.

²² Kaa yaylawo mangole gedda gira kee layedde kaa cida. Atu abto dhictam teellemko lel, nolle raxmat, ni xat” akko yerhxe.

²³ Yeesus lel: “‘Dhictemko yok arhxuk tane?’ Yaamineti ummannim dhiica” akko yerhxe.

²⁴ Akkanih lel amaa cindhookih abba wac-yerhxeyaako: “Aaminek, yi imaan wayto xat!” yerhxe.

²⁵ Yeesus mango xiyaw yerdiinih amiituk yuble gedda, amaa najaasa-le ufaye yoskoolofeh: “Ko naxar-male kee cokka-male kin ufaye, akko tewceyaako malammih caduruh adde orobe wayto, ku aamiriyuk ane” akko yerhxe.

²⁶ Zeereyaako dhacumaatih firigrig kaa ishemko sarrah akko yewce, amaa cindhooki lel rabe tiya balih yekkemhi sabbatah, tenko mango mari: “Rabe” yerhxin.

²⁷ Yeesus laakin gabadde kaa yibbirheyaako xaf kaa isheh, usuk lel daw-yerhxe.

²⁸ Usuk caredde orobe gedda lel kaa katattaynit ulah: “Aymihi nanu kaa nayyaaco tannem?” arhxuk kaa esseren.

²⁹ Usuk lel: “Ta gina le cayna-le ufayi, salaatko bextih walaa inkimih yawco mirhiica” akko yerhxe.

Yeesus malammih ishi rabi kee rabaakohi ugut yaakumeh warisha

³⁰ Amakkeeko yedeynih lel Galiilaati fantaako tillaaben. Tayim lel walaa inketti yaarhago mifarho.

³¹ Amayim lel ishi katattaynit: “Xiyawti Barhi xiyaw gabadde rado kinni, kaa yagdafoona lel kinon. Usun kaa yagdafoona kinon, maddaxit lellec lel rabaako uguto kinni” arhxuk ten aydurusuk yinemhi sabbatah kinni.

³² Usun laakin ta zirho duhoona mirhiicinnooni, kaa esseroona lel mashshiiten.

Ummannimko nabati miyatto kinni?

³³ Kafarnaxuumulle lel yemeetin. Usuk caredde orobe gedda lel: “Ayim kinni araxadde adde zattowak tiniinim?” yerhxeh ten essere.

³⁴ Ummannimko nabati miyatto kinamadde inkidde zattowak yiniinimhi sabbatah sik-yerhxin.

³⁵ Usuk lel defeyeyaako amaa lamman kee tamanah deecime. Akko yerhxe lel: “Akkinnanti erhedhdho yakko farhemko, umman tiyahi sarroorima kee umman tiyahi khaddaam yakko alle tane.”

³⁶ Wuli cindhooka baaheh lel fanadde kaa hayeyaako, xaraadde kaa yibbirheh:

³⁷ “Ta gina le cindhooka yi migacalle kabbaatinnanti, yi kabbaata, yotta kabbaatinnanti lel yotta makiiki kabbaatam, yotta fare tiya kinni” akko yerhxe.

Ni didde akkinnixeti nottah kinni

³⁸ Yohannis: “Mudarris, wuliti ku migacalle junuun ayyaacuk nubleyaako, notta mikataamhi sabbatah lel kaa desno nicikkine” akko yerhxe.

³⁹ Yeesus laakin: “Yi migacalle xayla-le abitto abayaako akkanih yi sabbatah umaani waanisho dhiicati miyanemhi sabbatah, kaa mideesina.

⁴⁰ Amayim lel ni didde akkinnixeti nottah kinamhi sabbatah kinni.

⁴¹ Atin Masiix mara kitiinimhi sabbatah taacaboona layet kobbaaya sinah axayinnanti, caduruh ishi casbe wayo makinam rummah sinak arhxiyuk ane.

Zambedde andafitaanam

⁴² Ta yottah yaamine cindha-maraako inketta zambedde sayshe tiyah, naba marhxan fillak akko gaxteyaako badadde cidditam akah ashshe dhadhdhe.

⁴³ Ku gaba zambedde ku sayishshemko, tee igric. Lamma gabaalih badinnixe jahannab gira fanah tadiyemko inki gabaalih aniinadde orobtam koh tashshe. [

⁴⁴ Jahannab, ‘kaa awwaaxa akko alayinnixe, kaa gira lel adde badinnixe’ makaano kinni.]

⁴⁵ Ku lak zambedde ku sayshemko, kaa igric. Lamma laklih jahannabadde ciddittamko taxinkisheh aniinadde orobtam koh tashshe, [

⁴⁶ Jahannab, ‘kaa awwaaxa akko alayinnixe, kaa gira lel adde badinnixe’ makaano kinni.]

^47-48 Ku inti zambedde ku sayishshemko, teyyeeceh cid. Lamma intiilih ‘kaa awwaaxa akko alayinnixe, kaa gira lel akko badinnixe’ jahannabadde ciddittamko inki intiilih Yallih nigsinnadde orobtam koh tashshe.

⁴⁹ Amayim lel ummanti mulxu-le girah qarcow kinamhi sabbatah kinni.

⁵⁰ Mulxu dhacam mece, laakin mulxu ishi muluuxa teyleemko, malammih mulux-ishshoona aaginah dhictaana? Sinnedde mulxu eellaanta, sinne-sinneh lel salaam aba” akko yerhxe.