Markos 8 - Saaho Cusub Cahde

Yeesus affara shiix bettiisha

¹ Amaa ayyamadde, malammih mango xiyaw yekettiinih beetaanam wayen gedda, ishi katattaynitih deecimeh:

² “Ta xiyaw adooxa lellec yottaalih kaleenih, beetaanam maloonimhi sabbatah, raxmah uluc yok xarhak yanin.

³ Safradde ten careh ten dhirhiyemko lel araxadde himma xaboona kinni” akko yerhxe.

⁴ Kaa katattaynit lel: “Ta zibo kin makaanolle tayidhdhole xiyaw folo bettiisho dhiicati yaneho?” akko yerhxin.

⁵ Usuk lel: “Atin ayidhdhale kinnas litiini?” yerhxeh ten essere. Usun lel: “Malxin” akko yerhxin.

⁶ Amaa xiyaw lel baarholle defeyoona ten yeemere. Amaa malxina kinnas beyeyaako, dhaaco abeh, yigdileyaako amaa mango xiyawah keloona amaa katattaynitille yoxoye. Usun lel amaa mango xiyawah kelen.

⁷ Usun dago cindhadhdhaa caasa luuk yinin. Dhaaco alle abeh lel tayim gantah akah kellimto alle tanem akah warishe.

⁸ Usun lel beeteenih inkoh xayten. Amaa raace yeggedeedele kinnosko lel malxina jambiil yooqhocin.

⁹ Xiyawko lel affara shiix takkem amalle tine. Usun lel ten sukuukuwe.

¹⁰ Akkanih lel ishi katattaynitlih jalbadde koreyaako Dalmanuutaati zooba fanah yedee.

Faarisiin ishaara esseran

¹¹ Faarisiin lel yemeetinyaako kaa yacakkanoona ciloh carsheeko ishaara adde wagiyeenih kaalih yanzaagaxoona erherhishen.

¹² Ishi ufayeh addaako hanrisheyaako: “Aymihi ta ijo ishaara wagiitam? Ta ijoh walaa inki ishaara akah tamxawo makinam rummah sinak arhxiyuk ane” akko yerhxe.

¹³ Ten xabeyaako lel, malammih jalbadde koreh, amaa carhalle tabe.

Faarisiin kee Heerodesti ayco

¹⁴ Folo sinneelih beyoona biyashshiitenyaako, amaa jalbadde inki kinnas bisa luuk yinin.

¹⁵ “Faarisiin ayco kee Heerodesti aycooko, zeelita” arhxuk ten asuuse.

¹⁶ Folo maloonimidde lel sinne-sinneh adde wagroyshitoona erherhishen.

¹⁷ Yeesus tayim yeerhegeyaako: “Aymihi folo malitiinimidde wagroyshitak taniinim? Kaddih macalsiitekkah hido afhimekkah taniini? Sin afcaadod yitrire?

¹⁸ Intit litin hanuk mitabliini? Cokkak litin hanuk mitaabbiini? Mitazzikkiriini lel?

¹⁹ Anu koona kinnas koona shiixih igdile gedda, ayidhdhale jambiil buturko temmeegeya kinni tooqhociinim?” akko yerhxe. Usun lel: “Lamman kee taman” akko yerhxin.

²⁰ Usuk: “Amaa malxina kinnas affara shiixih igdile gedda lel ayidhdhale jambiil buturko temmeegeya tooqhociini?” akko yerhxe. Usun lel: “Malxin” akko yerhxin.

²¹ Usuk lel: “Kaddih afhimekkah taniini?” akko yerhxe.

Yeesus Beet-saydalle inti-male kin xiyawto urusa

²² Usun lel Beet-saydalle yemeetin. Wuli mari lel wuli inti-male alle baaheenih kaa dhago kaa dhaacimen.

²³ Amaa inti-male gabadde yibbirheyaako dikko irolle yeyyeeceh, intitille thuf akko yerhxeh, gaba alle hayeyaako: “Tablem lito?” yerhxeh kaa essere.

²⁴ Usuk lel mablo geyeyaako: “Xiyaw abliyuk ane, laakin yadiye xorhuh iggidon” akko yerhxe.

²⁵ Sarrah Yeesus ishi gabub malammih kaa intitille hayeyaako; kaa intit akah faake, usuk lel mablo geye, ummannim lel meceetih yablo dhiice.

²⁶ Kaa careh kaa dhirhiyeh lel: “Dikidde gantah moorobin” akko yerhxe.

Bithroos Yeesus Masiix kinamah yashhide

²⁷ Yeesus ishi katattaynitlih Filibboos Qayseeriyaati diikalle yedee. Araxadde lel ishi katattaynit: “Anu miyatto kiyo yarhxiini xiyaw?” yerhxeh ten essere.

²⁸ Usun lel: “Yaythimmiqhe Yohannis, gari lel Eliyaas yarhxin, gari lel nobowaako inketta yarhxin” akko yerhxin.

²⁹ Usuk lel: “Atin lel anu miyatto kiyo tarhxiini?” yerhxeh ten essere. Bithroos: “Atu Masiix kito!” yerhxeh alle yedebbe.

³⁰ Kaa sabbatah walaa inkettah warishaanamko lel sirii ginah ten asuuse.

Yeesus ishi raba kee rabaakohi ugut yaakumeh warisha

³¹ Usuk lel Xiyawti Barhi mango xaajah cazaab yablo alle tanem kee naba mara, sheekhat manabottit kee sercat dhiiceenitih xinniimo kinam kee kaa yigidifiinih lel maddaxit lellec rabaako uguto kinam ten yaydaraso erherhishe.

³² Tayim lel caddoysheh yerhxe. Bithroos lel barhish kaa isheh kaa yaskaalafo erherhishe.

³³ Yufkuneh ishi katattaynit abluk laakin, Bithroos yoskoolofeyaako: “Mirix yok erhex, Sheethano! Atu xiyawim kibah Yallihim ishi xangaladde sayshak mitanito” akko yerhxe.

³⁴ Ishi katattaynitlih amaa mango xiyawah ishelle akah deecimeh: “Yi kataw farhinnanti, ishe xinoo, ishi masqal yooqhoceh lel yi kataw.

³⁵ Amayim lel ishi aniina gargeereti tee yaylawo kinni, yotta kee Mece Wareh arhxuk ishi aniina yeyleeti laakin tee geyo kinamhi sabbatah kinni.

³⁶ Xiyawti umbuka caalamalle tanem yiksibeh ishi rooxe wayemko, ayim kaa tamfice?

³⁷ Xiyawti ishi rooxih idhdhah ayim yaxaw dhiica?

³⁸ Ta am-immine wayta zambele ijodde, yotta kee yi waanih xoolashshiitinnanti, Xiyawti Barhi ishi Abbah nabnedde quddus kin malaykutlih yamiite gedda, kaako xoolashshiito kinni” akko yerhxe.