Markos 7 - Saaho Cusub Cahde

Xiyaw cayda kee amrit

¹ Faarisiin kee sercat dhiiceenit Yerusaalemko temeeteya kaalle yekettin gedda,

² kaa katattaynitko gari, adhdhoolinnixe thahaara hin gabubuh beetak yublin.

³ (Faarisiin kee Yahuud lel kalxit marih cayda dhawrhoona ciloh gabub meceetih adhdhoolekkah beetak miyiniini.

⁴ Cadaagaako yamiitin gedda yodhdhooliinih akke wayemko beetak miyiniini. Aki ginah lel kobaabi, barraad, dishtit kee dhintimat nuwaahi cakalso balih kin aki dhawrhan mango cayda luuk yinin.)

⁵ Faarisiin kee sercat dhiiceenit lel: “Aymihi ku katattaynit kalxit marih cayda mirhawrhaanaaki, adhdhoolinnixe thahaara hin gabubuh beetaanam?” akko yerhxin.

^6-7 Usuk lel: “‘Ta xiyaw afah kinni yi xishmataanam, ten afcaado laakin yottaako mirixtah tane; xiyaw amrit kin labcad aydurusuk, fayda maleh yoh yacbudin’ yarhxiinim akah tunkuttubeh taneekah, ko munaafiqhiino, nabii Isayas sin sabbatah mecem kinni waanishem.

⁸ Yallih amre xabtaanah xiyaw cayda dhawudhdhan” akko yerhxe.

⁹ Akko yerhxe lel: “Sinni cayda dhishshoona ciloh Yallih amre akah xintan mece arax litin!

¹⁰ Amayim lel Moosa: ‘Ishi abba kee ishi ina xishmat, abba kee inah waatimati rummah rabo alle tane’ yerhxemhi sabbatah kinni.

¹¹ Atin laakin akkinnanti: ‘Ishi abbak hido ishi inak: “Yottaako xatoh geytoona taarhigiinim Qorbaan tekkeh tane (Yallah tomxowweh tane yan macna kinni)”’ yerhxemko,

¹² ishi abbah hido ishi inah walaa inkim abo akah mitasmixiini.

¹³ Amaymih, sinni caydah Yallih amre ciddan. Amayim hinnim lel ta gina lemko mangum abtan.”

Xiyawto masxishsham

¹⁴ Xiyawah malammih akah deecimeh: “Inkoh oobbaanta, macalsita lel.

¹⁵ Xiyawtooko tawcem kinni xiyawto masxishsham kibah irooko adde orobtah kaa masxishshamah walaa inkim mitane. [

¹⁶ Yaabbe cokkak leti yaabboo!” akko yerhxe.]

¹⁷ Amaa xiyawko barhsimeh wuli caredde orobe gedda, kaa katattaynit ta aymassalhi sabbatah kaa esseren.

¹⁸ Usuk lel: “Atin gantah macalsiitekkah taniini? Inkoh irooko xiyawtodde orobinnannim kaa mimasxishsham mitaarhigiini?

¹⁹ Amayim lel kaa garbaako tillabtah irolle tawcenkah kaa afcaadodde moorobtamhi sabbatah kinni” akko yerhxe. (Taginah lel folok inkoh qarce-lem akko abe).

²⁰ Usuk lel yerhxe: “Xiyawto masxishsham kaako tawcem kinni.

²¹ Amayim lel xiyawti afcaadooko, uma xisaab, uma-xibar, garca, gidfo,

²² zina, xindi-umne, umaani, doolab, kushma, ashshiino, xami, mikkixa, duudiino akko tawcemhi sabbatah kinni.

²³ Ta uma xaaja inkoh addaako tamiiteh xiyawto masxishsha.”

Suuriyaako Finqiyaati numahi imaan

²⁴ Amakkeeko uguteh lel Tsoor kee Tsiidoon manthiqhalle yedee. Usuk caredde orobe, inketti kaa yaarhago lel mifarhinna, sucuto laakin mirhiicinna.

²⁵ Akkanih lel wuli najaasa-le ufaye barhä akko le numa kaa sabbatah toobbeyaako temeeteh iballe akko radde.

²⁶ Amaa numa lel Suuriyaako Finqiyalle tooboke Giriik numa kuuk tine. Tee barhäako amaa jinnetta akah yayyaaco lel kaa dhaacimte.

²⁷ “Cindhamti folo beyaanah kaarah cidaanam mecem makinamhi sabbatah, yookomiinih cindham beetoonak sug” akko yerhxe.

²⁸ Ishi laakin: “Yoo, Maddara, thawlat geridde tane kaara gantah maka cindhamti butur beetaanam” terhxeh alle tedebbe.

²⁹ Usuk lel: “Tayim terhxemhi sabbatah jinnetti ku barhäako akko yewceh yanek, isheh aduu” akko yerhxe.

³⁰ Ishi lel care tedeyeyaako cindhookä caratalle carhah akah sugte, amaa jinnetti lel yedee.

Yeesus cokka-male kee naxar-male kin xiyawto urusa

³¹ Yeesus sarrah Tsoor manthiqhaako gaxeh Tsiidoon fantaako “Tamana daafoh” manthiqhahi Galiilaati igil fanah yedee.

³² Wuli waani meceetih dhiicinnixe cokka-male alle baahenyaako, gaba alle hayo kaa dhaacimen.

³³ Amaa mango xiyawko ulah barhisheh lel, ferar cokkakadde akko hayeyaako, thuf alle yerhxek sarrah kaa anrab dhage.

³⁴ Agana carshelle kulux-yerhxeyaako, hanrisheh lel: “Effata” akko yerhxe, tee macna lel: “Fakkit” yarhxiinim kinni.

³⁵ Akkanih kaa cokkak fakkiteh, kaa anrab lel yimfittixeyaako, meceetih waanishe.

³⁶ Walaa inkettah warishaanamko lel ten asuuse. Usuk ten asuusinnannimhi idhdhalle lel ziyaada warroyshen.

³⁷ Xadde hinam cibrah rabeenih lel: “Ummannim meceetih abeh yane. Cokka-male yoshshoobbe, naxar-male lel wanshiishe” yerhxin.