Markos 6 - Saaho Cusub Cahde

Yeesus Naazretille xinnitima

¹ Amakkeeko yedeeh lel ishi dik hi daafolle yemeete, kaa katattaynit lel adde katayen.

² Sambatah lel sunagoogedde yaydaraso erherhishe, kaa yoobbe mango mari lel tahe arhxuk cibrah raben: “Ta xiyawti tayim awlaako geye? Kayyah yomxoye kas ayim kinni? Ta gina le xayla-le abittot kaa gabadde aaginah takke?

³ Tati tamaa Maryam barha kin oreena, kee Yacqoob, Yoosees, Yahuuda kee Simcoon sacal makiho? Kaa saculte talle nottaalih yanin makiho?” Amaymih usun lel kaa xineenih aaminekkah raaceenih yanin.

⁴ Yeesus lel: “Nabii ishi dik hi daafo, ishi zamad kee ishi careeko beexinille xishma-le” akko yerhxe.

⁵ Gaba alle hayeyaako laxuute dago mara uruseyaako bextih, amalle mangum naba abitto maabinna.

⁶ Ten imaan waytoh lel cibrah rabe. Aydurusuk lel diikakalle yuzuure.

Yeesus lamman kee taman fartottittiya fara

⁷ Amaa lamman kee tamanah akah deecimeyaako lallammaah ten dhirhiyeh najaasa-le ufayit yayyaacoona reeza akah yoxoye.

⁸ Ilooko bextih lel kallaaxeh: folo, lakoota, hido solaadi sinni gamaradde beyaanamko kee,

⁹ kabel sariteenih malammit qamish hashshiite wayoona ten yeemere.

¹⁰ “Akkinnan caredde orobtan gedda, tadiinindah amalle suganta.

¹¹ Akkinnan makaano sin kabbaate waytemko kee sin aabbe waynimko, tadiin gedda, tenalle shaahid takko ciloh sin ibak tane dorona alle urgufa” akko yerhxe.

¹² Amaymih yewcinyaako xiyaw tataabo alle tanem warroyshen.

¹³ Mango junuun yeyyeecin, mango laxuute mara zeetih yuskutiinih lel ten urusen.

Yaythimmiqhe Yohannis raba

¹⁴ Yeesus wari umman tiyah yimidhdhigeh yinemhi sabbatah nugus Heerodes yoobbe. Gari: “Yaythimmiqhe Yohannis rabaako uguteh yane. Amayimhi sabbatah kinni ta xayla-le abittot kayyadde akkuk yanem” yerhxin.

¹⁵ Aki mari laakin: “Usuk Eliyaas kinni” yerhxin. Aki mari lel: “Usuk kalxit nobowa balih, nabii kinni” yerhxin.

¹⁶ Heerodes tayim yoobbe gedda laakin: “Yohannis, anu amo akko igriceya, uguteh yane” yerhxe.

¹⁷ Heerodes caskar dhirhiyeyaako, Heerodiyasah arhxuk Yohannis yibbirheh yixbishe. Ishi kaa sacal kin Filibboos numa kuuk tine hanuk tee marcishite.

¹⁸ Amayim lel Yohannis Heerodesik: “Ishi sacalhi numa marcishitto koh meedda” akko arhxuk yinemhi sabbatah kinni.

¹⁹ Heerodiyas nacabo aalih luuk tinemhi sabbatah, kaa tasgadafo fadhdhe. Laakin mirhiicinna.

²⁰ Amayim lel Yohannis xaqqi-wanna kee quddus kin xiyawto kinam aarhuguk yinemhi sabbatah, Heerodes akko mashshiitah kaa dhawrhak yine. Kaa waani yaabbe gedda mangum amxeesebuk yine, yakko kibah kixinuk kaa aabbuk yine.

²¹ Heerodes ishi ubkat lellec simbilisho, ishi makaabun, caskar manabottit kee Galiilaati dikti naba marah deecime gedda caashir yemeete.

²² Heerodiyasti barhä orobteh akah tirgide gedda lel Heerodes kee kaa gerha xedenishshe. Amaa nugus lel amaa barhäk: “Atu farhinnannim yi esser, anu koh axawo kiyo” akko yerhxe.

²³ “Yi nigsinnat abrha fanah walaa yakko, yi esserinnannim koh axawo kiyo” yerhxeh akah dhiiwite.

²⁴ Ishi lel tewceh ishi inak: “Aymih kaa essero?” akko terhxe. Ishi lel: “Yaythimmiqhe Yohannis amo” akko terhxe.

²⁵ Akkanih afitteyaako orobteh lel amaa nugusuk: “Yaythimmiqhe Yohannis amo biyattille hayteyaako inki geddalle yoh taxawo kok farha” arhxuk kaa esserte.

²⁶ Amaa nugusudde mangum adde tossoobbe, yakko kibah ishi dhiiwa kee ishi gerhahi sabbatah lel ishi miimar yathlamo mifarho.

²⁷ Akkanih lel amaa nugus wuli caskarto Yohannis amo baaho amreelih kaa fare. Usuk lel yedeeh amaa xabshedde amo akko yigriceyaako,

²⁸ kaa amo biyattille baaheh amaa barhäh yoxoye, amaa barhä lel ishi inah toxoye.

²⁹ Yohannis katattaynit tayim yoobbin gedda, yemeetinyaako kaa rashsha beyeenih qabredde hayen.

Yeesus koona shiix bettiisha

³⁰ Fartottit Yeesusulle gaxeenih, inkoh abeenim kee yuydurusiinim akah warishen.

³¹ Tamiitem kee tadiyem mangum kuuk yininyaako, beetoona gantah waqhte luuk miyiniinimhi sabbatah, usuk: “Sinni ulah dagum tacrafoonak, kata zibo kin cara fanah nedee” akko yerhxe.

³² Usun lel sinni ulah jalbadde gaxeenih zibo kin cara fanah yedeyin.

³³ Usun aduuk ten yubleh ten yeysherheerhege mango mari, amakke fanah ibah yerdiinih umbuka daafofko tenko yookomiinih amakke gufen.

³⁴ Usuk jalbaako oobe gedda mangum mango xiyaw yuble. Loyna hin ciido balih kuuk yiniinimhi sabbatah lel mangum raxmah uluc akko xarhen. Mango xaajuj lel ten yaydaraso erherhishe.

³⁵ Baarho dhumte gedda lel kaa katattaynit alle yemeetiinih: “Ta makaano zibo kinni, baarho lel dhumteh tane.

³⁶ Ta wakalih barrit kee diikakalle yedeynih beetaanam sinneh dhaamitoonaaki ten dhirhii” akko yerhxin.

³⁷ Usuk laakin: “Beetaanam atin akah uxuwa” yerhxeh alle yedebbe. Usun lel: “Nedeeh lamma bool diinaar hi folo akah dhamneh beetoona akah naxawo?” akko yerhxin.

³⁸ Usuk lel: “Ayidhdhale kinnas litiini? Tedeynih ubula” akko yerhxe. Usun yublin gedda lel: “Koona kinnas kee lamma caasatto” yerhxin.

³⁹ Sarrah usuk inkoh filco-filcoh andharh cashsholle defeyoona ten yeemere.

⁴⁰ Amaymih usun bobbool kee kokkontomuh filco-filcoh defeyen.

⁴¹ Koona kinnas kee lamma caasatto beyeh, agana carshedde kulux-yerhxeh dhaaco alle abeyaako amaa kinnos yigdileh amaa xiyawah yasqarraboona katattaynitille yoxoye. Amaa lamma caasatto lel umbuka tenah xazizziile.

⁴² Usun lel inkoh beeteenih xayten.

⁴³ Amaa raace butur kee caasaako lel yemmeege lamman kee taman jambiiliya yooqhocin.

⁴⁴ Amaa kinnos bettem lel koona shiix labhattiya kuuk yinin.

Yeesus layet bukalle gerha

⁴⁵ Akkanih lel amaa katattaynit jalbadde koreenih, usuk amaa mango xiyaw dhirhiyandah, yookomiinih amaa carha Beet-saydalle tabeenih akah sugoona ten yeemere.

⁴⁶ Amaa xiyaw sukuukuwek sarrah lel yassallaw ishi ulah koomalle yewce.

⁴⁷ Baarho dhumte gedda lel, amaa jalba igil fanalle tine, usuk lel ishi ulah baarholle yine.

⁴⁸ Xaaxatti ten nifko yinemhi sabbatah, umammaatih aduuk ten yuble. Maaxalle lel igil bukalle ibah gerhak alle yemeete. Tenko tillaabo gantah farhe.

⁴⁹ Igil bukalle ibah gerhak kaa yublin gedda laakin, xiyawti jinnetta kaa yekkeliinih zeeren.

⁵⁰ Inkoh kaa yubliinih lel mangum mashshiiten. Usuk laakin akkanih aalih waanisheh: “Aydukum-erhexa, yotta kinni. Mimashshiitina” akko yerhxe.

⁵¹ Usuk tenlih jalbadde koreh lel amaa xaaxatti daw-yerhxe. Usun lel mangum cibrah raben.

⁵² Ten afcaado titrireh tinemhi sabbatah amaa kinnosti zacabah tekkem adde moobinna.

Yeesus Gennesaaretille laxuuteenit urusa

⁵³ Tabeenimko sarrah lel wuli Gennesaaret baarholle yemeetiinih jalba gimamalle yicishshigin.

⁵⁴ Usun amaa jalbaako ooben gedda, amaa xiyaw akkanih kaa yeysherheerhegin.

⁵⁵ Umbuka amaa zoobälle arduk lel usuk yanem alle aabbinnanille laxutte xiyaw ten barellalalle alle baahoona erherhishen.

⁵⁶ Usuk alle amiitinnan dik, daafof hido barritille, laxuttem cadaagalle carhah hayenih, walaa kaa sareenah erherha dhagoona kaa dhaacimen. Dhaginnan mari lel inkoh uren.