Markos 5 - Saaho Cusub Cahde

Yeesus yimjinnine xiyawto urusa

¹ Usun igilko amaa carha, Geraasat marih baarho akko yarhxinyalle yemeetin.

² Yeesus jalbaako oobe gedda lel, wuli najis kin ufaye le xiyawti qabaaraako yewceya akkanih akah garaye.

³ Qabaarat fanadde marak yine. Walaa inketti kaa yarhaw dhiicak miyine, walaa katiina.

⁴ Qayde kee katiinah yamudhdhuwe hanuk lel, katiina lammalle yagriceh amaa qayde agdiluk yine. Kaa yazgararo dhiicati miyine.

⁵ Bar kee lellecih lel qabaara kee koomamalle yakkeh zeerak kee ishe nabse dhayitih ageerecuk yine.

⁶ Yeesus waacinaako yuble gedda lel, yerdeh yemeeteyaako kaa nifille rade.

⁷ Wac-yerhxeyaako zeereh lel: “Yeesuso, Nabamko Naba Yallih Barhaw, atu yottaalih ayim lito? Yi tacizzibemko, Yallah ku dhaacimak aniyo” akko yerhxe.

⁸ Tayim lel: “Najis kin ufaye, ta xiyawtooko akko ewec!” akko yerhxeh yinemhi sabbatah kinni.

⁹ Yeesus: “Ku migac miyatto kinni?” akko yerhxe. Mango mara kinomhi sabbatah, yi migac “Maxaarho” kinni.

¹⁰ Amaa dikko irolle ten dhirhiyamko lel dhacumaatih kaa dhaacime.

¹¹ Kado, wuli koomat gerille mango xasama alooluk tine,

¹² kaa dhaacimeenih lel: “To xasamadde ni dhirhii, tenadde orobnok” akko yerhxin.

¹³ Amaymih izne akah yoxoye. Amaa najis kin ufayi lel yewciinih xasamadde oroben; amaa lamma shiixih gaba bahta xasama lel yerdinyaako ullallamutulle igilidde xarhiteenih igilidde yumundhucin.

¹⁴ Amaa loynit lel kudah yedeynih amaa tekkem daafo kee diikalle warroyshen. Amaa xiyaw lel ta tekkeh tinem ayim kinam yabloona yemeetin.

¹⁵ Yeesusulle yemeetin gedda lel amaa yimjinnineh, junuun maxaarho luuk yine xiyawti, amalle defeyeh sariteya, ishi kaslih kaa yublinyaako mashshiiten.

¹⁶ Amayim yuble mari lel amaa yimjinnine xiyawto kee amaa xasamalle ayim tekkeh tinem akah warishen.

¹⁷ Yeesus ten zoobäako yadaw lel kaa dhaacimoona erherhishen.

¹⁸ Usuk jalbadde korak lel amaa yimjinnineh yine xiyawti kaalih yadaw kaa dhaacime.

¹⁹ Yeesus akah masmaxooki laakin: “Careh ishi zooballe aduwaaki Maddari ayim koh abem kee ayidhdha kolle raxmatem akah warish” akko yerhxe.

²⁰ Usuk lel “Tamana daafo” akko yarhxin zoobälle yedeeyaako Yeesus akah abem warishe, ummanti lel cibrah rabe.

Yeesus wuli numa kee Yayros barhä urusa

²¹ Yeesus malammih igilko jalbah amaa carhalle tabe gedda, mangum mango xiyaw alle yekettin, usuk lel igil gimamalle yine.

²² Sarrah wuli sunagoogeeti manabotti, Yayros akko yarhxinya, yemeeteh yubleyaako, iballe akko radeh,

²³ dhacumaatih kaa dhaacimak: “Yi cindhaa barhä rabto kab-terhxeh tane. Urteh marto ciloh temeeteyaako gabub alle haa” akko yerhxe.

²⁴ Usuk lel kaalih yedee. Mango xiyaw adde kataynih lel kaa yeytseqheeqhethin.

²⁵ Wuli numa, lamman kee taman iggidiya biili akko xarhitaya lel amalle tine.

²⁶ Mango xakaayimti geridde baclaytak mangum timcizzibeh, luuk tinem inkoh adde teyle hanuk, alle tisriyem kibah akah tur-huwem male.

²⁷ Yeesus zacabah ware toobbeh tineyaako, amaa mango xiyawhi fanadde caazaako temeeteh kaa sareena dhagte.

²⁸ Amayim lel: “Walaa kaa sareena dhagemko uro kiyo” terhxemhi sabbatah kinni.

²⁹ Akkanih lel aduuk yine biili daw-yerhxeyaako, ishi laxuuko urtem ishi nabsedde teerhege.

³⁰ Yeesus lel, xayli akko yewcem yeerhegemhi sabbatah, akkanih amaa mango xiyawadde yufkuneyaako: “Yi sara dhageti miyatto kinni?” yerhxe.

³¹ Kaa katattaynit: “Xiyaw ku lamma-galelle antseqheeqhethuk table hanuk: ‘Miyatti yi dhage?’” arhxuk tanito.

³² Miyatti abem yablo lel gura-mizgalle kulux-yerhxe.

³³ Amaa numa laakin, alle tekkem inkoh teerhegeh, mashshih qathqath-arhxuk kaa nifille raddeh amaa rumma inkoh akah warishshe.

³⁴ Usuk lel: “Yi barhäw, ku imaan ku uruseh yanek, maaxiyodde aduu, ishi laxuuko caafiyat gee” akko yerhxe.

³⁵ Usuk kaddih waanishak anuk, wuliti sunagoogeeti manabottahi careeko yemeeteh: “Ku barhä rabteh kinni. Aymih Mudarris ayticibik tanito?” akko yerhxe.

³⁶ Laakin usun ayim yerhxiinimidde macalah rabekkah, Yeesus sunagoogeeti manabottak: “Imin bisa kibah, mimashshiitin” akko yerhxe.

³⁷ Bithroos, Yacqoob kee Yacqoob sacal kin Yohannisko bextih adde katawna walaa inkettah masmaxinna.

³⁸ Usun lel amaa sunagoogeeti manabottih carelle yemeetin gedda, Yeesus cigirgir, xiyaw weeca kee zeerak yuble.

³⁹ Orobe gedda lel: “Aymih kinni cigirgir kee weeca abak taniinim? Cindhookä mirabo, laakin dhiinak tane” akko yerhxe.

⁴⁰ Usun lel alle yoosolin. Inkoh irolle ten yeyyeeceh lel barhat abba kee ina kee kaalih tinem isheelih beyeh amaa barhä adde tinedde orobe.

⁴¹ Gabadde tee yibbirheh lel akko yerhxe: “Talita qum”, “Cindhä barhi, kok arhxiyuk anek ugut” yarhxiinim kinni.

⁴² Amaa barhä lel akkanih ugutteyaako gedhdho erherhishshe (ishe lel lamman kee taman cumreh luuk tine), usun lel akkanih mangum cibrah raben.

⁴³ Usuk lel tayim walaa inketti yaarhigemko dhacumaatih ten yeemereh, betta folo akah yaxawna akah warishe.