Markos 4 - Saaho Cusub Cahde

Yazriyetiih aymassal

¹ Malammih igil gimamalle yaydaraso erherhishe. Jalbadde korah igilille defeyandah lel mango xiyaw alle yekettin, amaa mango xiyaw lel igil gimamhi baarholle defeyak yinin.

² Aymassalah lel mango xaaja ten aydurusuk yine, ishi aydarasadde lel tayim akko yerhxe:

³ “Oobbaanta! Taykinna, yazriyeti yazraw ifaare.

⁴ Yizriye gedda lel amaa zaraako gari arax afalle radeyaako kimbir yemeeteh beete.

⁵ Zaraako gari lel mango buure hin dhayit le baarholle radeyaako, addale buure luuk miyinemhi sabbatah, akkanih yubqule.

⁶ Ayrotta boodde gedda lel xarare. Rimid luuk miyinemhi sabbatah lel kafe.

⁷ Zaraako gari keenanti fanadde rade, keenan aalih carsimeh lel kaa yisniqheyaako ilaw mibaaho.

⁸ Zaraako gari mece buuredde radeyaako ilaw baahe, carsimeyaako lel yemmengeh soddom waqhtiya, laxtam waqhtiya, bool waqhtiya yemfeere.”

⁹ “Yaabbe cokkak leti yaabboo!” akko yerhxe.

Aymassal macal

¹⁰ Usuk ulah anik lel amaa lamman kee tamanlih yine mari amaa aymassalhi sabbatah kaa esseren.

¹¹ Usuk lel: “Sinah carshi nigsinnahi mashthir taarhagoona caashir sinah yomxoyeh yane, ta irolle yane marah laakin ummannim aymassalah kinni akah warrishimtam.

¹² Amayim lel, ‘gaxaanamko kee xabbot akah yamxayemko, rummah yablin hanuk miduhaana, rummah yaabbin hanuk lel adde moobtah’ kinni” akko yerhxe.

¹³ Tahe lel akko yerhxe: “Ta aymassal sinadde moobinna? Aki aymassal aaginah sinadde oobo kinni haye?

¹⁴ Yazriyeti waanitta yazriye.

¹⁵ Ta arax agaagalle tanem, waanitta alle timzirriyeya, yaabbin gedda, Sheethan akkanih yamiiteh tenadde timzirriyeh tine waanitta akko beya.

¹⁶ Ta dhayitle buurelle timzirriyem, ta mari, waanitta yaabbin gedda, akkanih xedenlih kabbaata mara kinon.

¹⁷ Sinnedde rimid maloonimhi sabbatah, dago waqhte curaanah, sarrah, amaa waanittat sabbatah cazaab kee hadaano tamiite gedda, akkanih gaba yaxayin.

¹⁸ Aki mari lel keenanti fanadde timzirriyem kinon. Usun amaa waanitta yaabbiinih,

¹⁹ laakin ta caalamti nawashshiga kee solaadit doolab, amaye balih aki xaajujhi farhi adde orobah amaa waanitta yasniqhe, daro baahekkah lel racta.

²⁰ Amaa mece buuredde timzirriyem lel, amaa waanitta yaabbeh kabbaatah soddom waqhtiya, laxtam waqhtiya, bool waqhtiya yamfeere” akko yerhxe.

Faanus citrot geridde

²¹ Akko yerhxe lel: “ Faanus baahaanah citrot geridde hayaana, woole carat geridde, woole defeenakke hayaana?

²² Amayim lel caddoyto kinam agoogitteyah, tammadhdhago kinam lel sucutteya mitanemhi sabbatah kinni.

²³ Yaabbe cokkak leti yaabboo!”

²⁴ Akko yerhxe lel: “Taabbiinim macalsita; atin tatneefecin qiyaasah sinah tanqaaso kinni, ziyaada lel sinah ossimto kinni.

²⁵ Amayim lel le tiyah ziyaada akah ossimteyaako manginatah yaallo, hin tiyaako laakin amaa luuk yinem gantah akko tadawo kinamhi sabbatah kinni.”

Carsima zarih aymassal

²⁶ Akko yerhxe lel: “Yallih nigsinna wuli xiyawti ishi dhagelle zara yizriyem balih kinni.

²⁷ Usuk bar dhiina itre lel uguta, amaa zari lel yabquleh carsima, usuk laakin aaginah kinam miyaarhige.

²⁸ Amaa baarho isheh taybuqhule, erherhih buqhletta bahta, sarrah zalaalatto, sarrah lel ilaw amaa zalaalattok yaabuke.

²⁹ Amaa ilaw gufa gedda lel rabci yakkemhi sabbatah maczit dhirhiya.”

Adri zarattohi aymassal

³⁰ Akko yerhxe lel: “Yallih nigsinna ayimlih naybalaalaw, hido lel awlih aymassalah akah natnaafaco kinni?

³¹ Baarholle yamzirriye gedda umbuka zaraako cindha, adri caynahi zarattoh higgida.

³² Carsimta gedda laakin inkoh jardiin taklitko tanabeh naba xakuk tayyaace, kimbir lel tee silaladde care siraaxitan.”

³³ Usun akah kaa yaabboona dhiicaanaakah lel ta gina le mango aymassalah waanitta tenlih waanishe.

³⁴ Usuk aymassal hinnim tenlih miwaanisho, ishi katattaynitih laakin ummanim ulah akah caddoyshe.

Yeesus goomadhdhe daw-ishe

³⁵ Amaa max, baarho dhumte gedda: “Amaa carhalle tabnok hayyaanta” akko yerhxe.

³⁶ Amaa mango xiyawko yedeynih, kayya ulah jalbadde sinneelih beyen. Aki jalaabu lel kaalih yine.

³⁷ Naba xaaxatti goomadhdhe ugutte, amaa goomadhdhe jalba safucteh orobteyaako, amaa jalba ammaaguk tine.

³⁸ Usuk laakin amaa jalbadde caazaako cikkishiteh dhiinak yine. Kaa uguseenih lel: “Mucallimo, ni liyadde macal malito?” akko yerhxin.

³⁹ Usuk lel uguteh amaa xaaxatta yoskoolofeyaako amaa igilik: “Daw-erhex! Uskun!” akko yerhxe. Amaa xaaxatti daw-yerhxeh lel naba sukuun yekke.

⁴⁰ Usuk: “Aymihi tayidhdha mashshittaanam? Kaddih imaan malitiini?” akko yerhxe.

⁴¹ Naba gilixih yemmeegiinih lel: “Tati xaaxatta kee igil gantah kaa yaabbinti miyatto kinni?” sittiyak yerhxin.