Markos 3 - Saaho Cusub Cahde

Kafte gaba le xiyawto

¹ Usuk malammih sunagoogedde orobe, amadde lel wuli gaba akko kafte xiyawti yine.

² Kaa yaksasoona ciloh lel Sambatah kaa urusam kee kaa macalsiitak yinin.

³ Amaa kafte gaba le xiyawtok lel: “Fanadde daw-erhex” akko yerhxe.

⁴ “Sambatah mecaani abaanam masmuux kinni, woole umaani, aniina gargeeraanama woole yagdifiinimi?” akko yerhxe. Usun laakin sik-yerhxin.

⁵ Maklaliteh kuraalih tenadde kulux-yerhxe, ten afcaadot tiraareh yixriqheyaako, amaa xiyawtok: “Ishi gaba iyfiddig” akko yerhxe. Usuk lel yiyfiddigeyaako kaa gaba akah tineekah gaxte.

⁶ Amaa Faarisiin yewciinih aaginah kaa yaylaynimidde akkanih Heerodesti maraalih zatteyen.

Mangum mango xiyaw Yeesus katayan

⁷ Yeesus ishi katattaynitlih igil gabolle gaxe, mangum mango xiyaw lel Galiila, Yahuudiya,

⁸ Yerusaalem, Edom baarho kee Yordaanos tabso kin Tsoor kee Tsiidoonko adde katayen. Ta mangum mango xiyaw usuk abak yinem inkoh yoobbin gedda kaalle yemeetin.

⁹ Xiyaw mangah sabbatah kaa dufuffuwaanamko jalba yisqirribiinih akah sugoona ishi katattaynitih warishe.

¹⁰ Usuk mango mara uruseh yinemhi sabbatah, amaa laxuu-le mari kaa dhagoona kaa wakalelle antseqheeqhethuk yinin.

¹¹ Uma ufayit kaa ablinnan gedda, kaa nifille radaanah: “Atu Yallih Barha kito” arhxuk zeerak yinin.

¹² Usuk lel kaa yayshidhdhigiinimko sirii ginah ten asuuse.

Lamman kee taman fartottittiya

¹³ Koomalle yewceh tamaa isheh farha marah akah deecimeh usun lel kayyalle yemeetin.

¹⁴ Kaalih yakkoona kee yaydarasoona ten faro ciloh, “fartottit” akko yerhxe lamman kee taman doore.

¹⁵ Junuun yayyaacoona lel reeza akah yoxoye.

¹⁶ Usuk lamman kee taman doore: Simcoon (Bithroos akko yerhxeya),

¹⁷ Zibdit barha kin Yacqoob kee Yacqoob sacal kin Yohannis (Bo-aneerges akko yerhxeya, amayim lel “angud cindham” macnah leya),

¹⁸ Indiryaas, Filibboos, Bartolomaayos; Maatiyos, Toomaas, Alfaayos barha kin Yacqoob, Taddayos kee wathan-kixin kin Simcoon kee

¹⁹ Yahuuda Iskariyoot, amaa kaa yosxoyeya, kuuk yinin.

²⁰ Sarrah usuk careh yedee, beetoona wayaanandah lel malammih mango xiyaw yekettin.

²¹ Kaa dik tayim yoobbin gedda: “Yicbideh kinni yanem” arhxuk kaa yabbarhoona yemeetin.

Quddus kin Ufayehi waato

²² Yerusaalemko obte sercat dhiiceenit lel: “Beelzebuul kinni kaa yibbirheh yanem, junuun ayyaacuk yanem junuun manabottah abeh kinni” yerhxin.

²³ Usuk ishelle akah deecimeh, aymassalah abeyaako tahe akko yerhxe: “Sheethan Sheethan aaginah yayyaaco dhiica?

²⁴ Nigsinna ishe-isheh xazxaazimtemko, amaa nigsinna daw-tarhxo mirhicta.

²⁵ Cari ishe-isheh xazxaazimemko lel, amaa cari daw-yarhxo mirhiica.

²⁶ Sheethan lel ishi diddeh uguteh xazxaazimemko, yalayenkah daw-yarhxo mirhiica.

²⁷ Sirii xiyawtih caredde orobah kaa nuwaa bayshati miyane, yookomeh kayya amaa sirii xiyawto yurhuweh akke wayemko. Amayek sarrah kaa care baysho dhiica.

²⁸ Rummah sinak arhxiyuk ane, umbuka zambe kee arhxinnan waato xiyawah akah xabbimto kinni,

²⁹ laakin Quddus kin Ufayi diddeh aban waato caduruh xabbot male, umman ged hi zambe kinni.”

³⁰ Tayim akko yerhxem lel: “Usuk najaasa-le ufaye leya” arhxuk yiniinimhi sabbatah kinni.

Yeesus ina kee sacul

³¹ Kaa ina kee kaa sacul yemeetiinih irolle daw-yerhxinyaako, akah deecimoona alle faren.

³² Mango xiyaw kaa agaagalle defeyak yinin: “Ku ina kee ku sacul irolle yanin, ku wagiyak yanin” akko yerhxin.

³³ Usuk lel: “Yi ina kee yi sacul miya kinooni?” yerhxeh alle yedebbe.

³⁴ Kaa agaagalle defeyak yine maradde gura-mizgalle kulux-yerhxeh lel: “Yi ina kee yi sacul talle yanin.

³⁵ Amayim lel Yallih farhi abinnanti, usuk yi sacal, yi sacla kee yi ina kinamhi sabbatah kinni” akko yerhxe.