Markos 2 - Saaho Cusub Cahde

Yeesus wuli kafe tiya urusa

¹ Yeesus dago lellecik sarrah Kafarnaxuumulle gaxe gedda, carelle yanem tomobbe.

² Mango xiyaw inkidde teketteh, cari yemmeegeh, walaa carafadde cara mitine. Usuk lel Waanitta akah warroyshak yine.

³ Affara xiyawti lel yooqhociinih wuli kafe tiya alle baahen.

⁴ Mango xiyawhi sabbatah kaa agaagalle yamaatoona taanen gedda, cari-buka kaa bukaako asac-ishenyaako, faakeenih, amaa kafeti alle yine barella cari-caralle oobishen.

⁵ Yeesus ten imaan yuble gedda, amaa kafe tiyak: “Yi barha, ku zambit koh xabbiimeh yane” akko yerhxe.

⁶ Sercat dhiiceenitko gari amalle defeyak yininyaako, sinni afcaadodde taginah axeesebuk yinin:

⁷ “Aymihi ta xiyawti taginah waanisham? Yallah waatimak kinni yanem! Yallaako bextih zambit xabshiishati miyatto kinni?”

⁸ Akkanih lel Yeesus, ta gina lem sinni addadde axeesebuk yaniinim ishi ufayeh yeerhegeh: “Aymihi ta gina lem sinni afcaadodde taxeesebiinim?

⁹ Kafe tiyak: ‘Ku zambit koh xabbiimeh yane’ yarhxiinim kee: ‘Ugutaaki, ishi barella xaf-ishsheh, aduu’ yarhxiinimko awlihim ruhuwa?

¹⁰ Amaydo, Xiyawti Barhi baarholle zambit xabshiisho reeza leyam taarhagoona ciloh” yerhxek sarrah, amaa kafe tiyak:

¹¹ “Ugut, ishi barella tuttuqhuceh careh aduu kok arhxe” akko yerhxe.

¹² Usuk uguteyaako akkanih ishi barella yuttuqhuceh, inkoh ten nifille yewce. Usun lel amaymih cibrah rabenyaako: “Ta gina lem caduruh nubleh minaarhige” arhxuk Yalla yeynebin.

Yeesus Leewih deecima

¹³ Usuk malammih igil gimamalle yewceyaako mango xiyaw adde katayenih usuk lel ten aydurusuk yine.

¹⁴ Tillaabak lel Alfaayos barha kin Leewi yubleyaako, “Yi kataa” akko yerhxe. Usuk lel uguteh kaa kataye.

¹⁵ Kaa katattaye mango mari yiniinimhi sabbatah, amaa caredde maaddille cikkishitak mango miiri yaskattit kee zambi-wannun Yeesus kee kaa katattaynitlih defeyeenih yinin.

¹⁶ Faarisiinko kin Sercat dhiiceenit, zambi-wannun kee miiri yaskattitlih beetak yublin gedda, kaa katattaynitik: “Aymihi miiri yaskattit kee zambi-wannunlih beetam?” akko yerhxin.

¹⁷ Yeesus tayim yoobbe gedda: “Xaakim farhshiisha mari laxuute mara kibah caafiyat-le mara maki. Anu zambi-wannunuh kibah xaqqi-waannunuh deecimo maki emeetem” akko yerhxe.

Siyaam essero

¹⁸ Yohannis katattaynit kee Faarisiin asoomuk yinin. Xiyaw Yeesusulle yemeetiinih: “Aymihi Yohannis katattaynit kee Faarisiin katattaynit yasoomin, ku katattaynit laakin miyasoomiinim?” akko yerhxin.

¹⁹ Yeesus lel: “Waraddi marcawwi tenlih yanem fanah yasaamoona dhiicaana? Marcawwi tenlih yanem fanah, yasaamoona mirhiicaana.

²⁰ Marcawwi tenko beyan waqhti yamaato kinni. Amayek sarrah lel yasaamoona kinon.

²¹ Cusub gamedda zirte sareenadde yayrhibbisheti miyane, amayim lel amaa leeza zirte sareena candhishshamhi sabbatah kinni. Amaa candhiirhi mangum yaame.

²² Cusub wayni lel zirte idritidde hayati miyane. Hayemko, amaa idrit fotkishsha, amaa wayni xarhitta, amaa idrit lel caynita. Cusub wayni cusub idritidde kinni gaxam” akko yerhxe.

Yeesus Sambat Maddara kinni

²³ Wuli Sambatah ilaw dhageh fantaako tillaabak, kaa katattaynit ilaw zalaala yaqhanthaboona erherhishen.

²⁴ Faarisiin lel: “Aymihi Sambatah takko ammissilinnixem abak yaniinim?” akko yerhxin.

²⁵ Usuk lel: “Dawud safriite gedda kaalih yine mara kee isheh ayim abem caduruh maqhrayinnitiini?

²⁶ Naba shekh kin Ebyaataar waqhtedde, Yallih caredde orobeh, sheekhaako bextih farhinnanti beeto masmuux akkinnexe yisiddiqhin folo beyeh beeteyaako kaalih tinemih yoxoye.

²⁷ Sambat kinni xiyawtoh ginnimtem kibah xiyawti Sambatah miginniimo.

²⁸ Amaydo, Xiyawti Barhi Sambatah gantah Maddara kinni” akko yerhxe.