Markos 16 - Saaho Cusub Cahde

Rabaakohi ugut

¹ Sambat tillaabe gedda, Magdalat Maryam, Yacqoob ina kin Maryam kee Saloome yedeynih alle yaskatoona ciloh, qamam dhaamen.

² Baxuurooko afti lellecih subxe, ayro boodak, amaa qabre fanah yedeyin.

³ Sinne-sinneh lel: “Amaa duma amaa qabrih afko miyatti akko noh yaydalbako kinni?” arhxuk yinin.

⁴ Aganalle kulux-yerhxin gedda lel, amaa dhayitti caazalle yindilbikeh yublin, amaati lel naba duma kuuk tine.

⁵ Amaa qabredde oroben gedda, wuli gombi mizgi gabooko defeyeyaako, cado sara hashshiiteya yublin, usun lel birriigen.

⁶ Usuk lel: “Mimashshiitina. Masqalakke takarimeh yine Naazret Yeesus wagiyak tanin. Usuk rabaako ugute, talle miyane. Carhah alle kaa hayen makaano ubula.

⁷ Laakin aduwantaaki kaa katattaynit kee Bithroosuk, Galiila fanah ten afadde aduuk yanem akah warisha. Usuk akah sinak yerhxeekah amalle kaa tabloona kitin” akko yerhxe.

⁸ Gilixih qathqath-arhxuk kee cibra adde tengelemhi sabbatah, yewcinyaako amaa qabreeko kuden, mashshiiteenimhi sabbatah lel walaa inkettak inkim marhxinnooni.

Yeesus Magdalat Maryamah yambulluwe

⁹ [Baxuurot afti lellecidde subxe rabiiko ugute gedda, erherhih amaa malxina jinnetta akko yeyyeece, Magdalat Maryamah yumbulluwe.

¹⁰ Ishi lel tedeyeyaako tamaa kaalih yine katattaynitih, axzinuk kee weecak yineyah akah warishshe.

¹¹ Usuk wafaalih yanem kee teyah yumbulluwem yoobbin gedda, maamaninnooni.

Yeesus lamma katattaynah yambulluwe

¹² Tayimik sarrah, tenko wuli lamma dikille inkidde aduuk, aki xibar abiteh akah yumbulluwe.

¹³ Usun lel gaxenyaako raace marah warishen, usun laakin ten maamaninnooni.

Naba farto

¹⁴ Amaymik sarrah, amaa inikan kee taman sinneh thawlalle cikkishiteenih beetak akah yumbulluweyaako, usuk rabiiko ugutemko sarrah kaa yuble mara maamaninnoonimhi sabbatah, ten imaan wayto kee afcaadot tiraareh ten yoskoolofe.

¹⁵ Usuk: “Umbuka caalamalle aduwantaaki, umbuka makhluuqhuh Mece Ware warisha.

¹⁶ Aamininnan tiya kee anthimmiqhinnantiya lel gargeerimoona kinon, aamininnixeti laakin yanqatstsaco kinni.

¹⁷ Tamaa yaamine mari ta ishaarar yayballawna kinon: yi migacalle junuun yayyaacoona kinon, cusub afah lel waanishoona kinon;

¹⁸ caror gabah yaaqhacoona kinon, akkinnan yagdife xinze yoocobiinimko lel ten yaazawo maki, laxuttemille gaba alle hayeenih urusoona kinon” akko yerhxe.

¹⁹ Maddara kin Yeesus, tenlih waanishek sarrah, carshelle yumuqquceyaako, Yallih mizgi gabooko defeye.

²⁰ Usun yewcinyaako ummanille warroyshen, Maddari lel tenlih ashtuqhuluk yine, amaa farto lel tuumarah abah aysibituk yine.]