Markos 15 - Saaho Cusub Cahde

Yeesus Bilaatosulle baahen

¹ Baarho maxte gedda lel, akkanih sheekhat manabottit, naba mara, sercat dhiiceenit kee umbuka arabaalih zate aben. Usun lel Yeesus yurhuynih beyenyaako Bilaatosulle yosxoyin.

² Bilaatos lel: “Atu Yahuud nugus kitoho?” yerhxeh kaa essere. Usuk lel: “Atu gantah arhxituk tane” yerhxeh alle yedebbe.

³ Amaa sheekhat manabottit lel mangumuh kaa yiksisin.

⁴ Bilaatos lel malammih: “Taxaye radde malito? Ayidhdhale kisse kolle baaheenim ubul” yerhxeh kaa essere.

⁵ Yeesus laakin alle maadabbinna, amaymih Bilaatos cibrah rabe.

Bilaatos Yeesus masqalak takarimo yasxaye

⁶ Usuk akkinnan Faasigi cidille amaa xiyawah usun farhinnan inki maxbuushsha akah ayyaacuk yine.

⁷ Wuli diddeh cigirgir abak nabse aba maraalih xabshedde, Barabbaas akko yarhxin xiyawti yine.

⁸ Amaa mango xiyaw Bilaatosulle yemeetiinih tamaa umman gedda abam akah abo kaa esseroona erherhishen.

⁹ Usuk lel: “Yahuud nugus sinah dhirhiyo yok fadhdhaana?” arhxuk alle yedebbe.

¹⁰ Amayim lel sheekhat manabottit ashshiinoh kayyalle kaa yosxoynih yiniinim yeerhegemhi sabbatah kinni.

¹¹ Sheekhat manabottit laakin Yeesus idhdhadde Barabbaas akah yawceekah, kaa esserimoona amaa mango xiyaw uguugusen.

¹² Bilaatos lel malammih: “Ta Yahuud nugus akko tarhxin xiyawto ayim isho kinni?” akko yerhxe.

¹³ Usun lel malammih wac-yerhxiinih: “Masqalakke kaa takar” yerhxin.

¹⁴ Bilaatos lel: “Aymih? Ayimti umaani abeh yane?” akko yerhxe. Usun laakin inkoh ziyaada andhadhdhaxeenih: “Masqalakke kaa takar” yerhxin.

¹⁵ Amaymih Bilaatos amaa mango xiyaw xedenisho ciloh Barabbaas akah dhirhiyeyaako, Yeesus yumuttukeh, masqalakke takarimo kaa yosxoye.

Yeesusulle alle yaasulin

¹⁶ Sarrah amaa caskar Yeesus amaa masxadaadari naba care kin rooshanadde kaa orbisheenih, caskar filco kayyalle yeskettin.

¹⁷ Diimayin sareena alle hayenyaako, wuli inkidde sawalime keenanti bor amokke akko hayen.

¹⁸ “Maaxiyo gee, ko Yahuud nuguso!” arhxuk salaamta akah aben.

¹⁹ Shambuqqottah amo akko yootokiinih, thuf alle yerhxinyaako, xishmah akah gululluubuwen.

²⁰ Alle tsaggarowak yiniinimko, amaa diimayin sareena akko yislibiinih, kaa sara alle hayen. Masqalakke kaa takaroona lel kaa yosxoyin.

Masqalakkehi takarimnan

²¹ Aleksaander kee Ruufos abba kin Simcoon Kureeneeti xiyawti, zibooko amiituk yineya, amaa masqal yaaqhaco kaa xaylishen.

²² Wuli Golgota akko yarhxin makaano (“Amot xanxantahi makaano” macnah leyalle) kaa baahen.

²³ Karbe adde tengele wayni yaacabo lel akah yoxoyin, usuk laakin maacabo.

²⁴ Masqalakke kaa takareenih, miya gufam yabloona cija alle cidenyaako, kaa sara sinne-sinneh xazziiliten.

²⁵ Masqalakke kaa takareenim lel dhaxiine saaca sagal kuuk yine.

²⁶ Kaa kissehi kutuub lel taginah yanqirriye: “Yahuud nugus.”

²⁷ Wuli lamma umam-abeenitko, inketta mizgaako wuli tiya lel guraako masqalak kaalih takareenih yinin. [

²⁸ “Usuk lel sercat malitidde loyyiime” yarhxe Kutuub lel yikmile.]

²⁹ Agaagaako tillaabak yine mari akah waatimak kee amom qinqin-ishak: “Haye haye, macbad dumusah adooxa lellecille malammih gina tiyak,

³⁰ ishi gargerteh, tamaa masqalko ob” arhxuk yinin.

³¹ Amayim balih sheekhat manabottit kee sercat dhiiceenit sinne-sinneh tsaggarowak: “Aki xiyaw gargeere; ishe gargeero mirhiica.

³² Masiix, Israa-eel nugus, nanu nubleh akah naamano kinok kado masqalko ooboo” arhxuk yinin. Kaalih masqalakke takarimeh yine mari gantah akah waatimak yinin.

Yeesus raba

³³ Taykinna lel lellecti abrha tekke gedda aykee kasit saaca adox fanah baarho dite tekkeh tine.

³⁴ Sagal-tarhxe saacah lel Yeesus: “Elohi, Elohi, lema shevaqtani” macnah: “Yi Rabbiyo, yi Rabbiyo, aymih yi xabte?” arhxuk wac-yerhxeh zeere.

³⁵ Amalle daw-yerhxeh yine mari lel yoobbiinih: “Taykinna, Eliyaasah deecimak yane” yerhxin.

³⁶ Tenko wuliti yerdeyaako wuli thuththa cur-tarhxe wayniiko yemegeh: “Suganta, Eliyaas yemeeteyaako kaa oobishan kee nablo kinnik” yerhxeh shambuqqottakke hayeh yaacabo akah yoxoye.

³⁷ Yeesus lel wac-yerhxeyaako zeereyaako, kaa wafa tewce.

³⁸ Macbadti goleeni lel aganaako guba fanah lammalle candhiirhe.

³⁹ Amaa bool caskartiyah manabotti kaa nifidde daw-yerhxeh yineya, kaa wafa taginah tewcem yuble gedda: “Rummah tati Yallih Barha kuuk yine!” yerhxe.

⁴⁰ Amalle lel sayyo dherhikkeeko waacensiitak yinin, tenlih lel Magdalat Maryam, cindha Yacqoob kee Yoosees ina kin Maryam kee Saloome yinin.

⁴¹ Usuk Galiilalle anuk, kaa katayeenih kaa yukhdumin, aki mango sayyo Yerusaalem fanah kaalih temeeteya lel yinin.

Yeesus Macaga

⁴² Baarho dhumte gedda, Anqaraarabti lellec kuuk yineyaako, Sambatalle maaxak,

⁴³ wuli Arimatayaako kin Yoosuf, xishma-le arabaako kuuk yineya, isheh lel Yallih nigsinna wagiyaya, yifdibeyaako Bilaatosulle yedeeh, Yeesus rashsha kaa essere.

⁴⁴ Bilaatos lel usuk mece geddaako rabeh yinemih cibrah rabe. Amaa bool caskartiyah manabottah deecimeh lel usuk rabeh yanem kee miyanem kaa essere.

⁴⁵ Usuk rabeh yinem amaa bool caskartiyah manabottaako yeerhege gedda, amaa rashsha akah yoxoye.

⁴⁶ Yoosuf dabalaan maknaz dhaameh, masqalko kaa oobisheyaako amaa dabalaan maknazadde kaa yiknizeh, qooqhaxadde faraacime qabredde kaa yoocoge. Duma lel amaa qabrih carafadde akko alife.

⁴⁷ Magdalat Maryam kee Yoosees ina kin Maryam awla kaa yoocogem yublin.