Markos 14 - Saaho Cusub Cahde

Yeesus gidfohi xagara

¹ Kado Faasiga kee akko yarhxin Cadublat Xabazahi cid yakko lamma lellec akko raaceh yane. Sheekhat manabottit kee sercat dhiiceenit lel siixoh kaa yibbirhiinih kaa yagdafoona wagiyak yinin.

² “Xiyaw gabooko andhax kee dhaw yakkek, cidti geddadde yakko alle mitane” lel yerhxin.

Yeesus Beetcaniyalle yamsukkute

³ Kado, Yeesus Beetcaniyalle sakna-le Simcoon caredde maaddille defeyak, wuli numa mangum qaali kin qarce-le “nardos” akko yarhxin xarhaako siraaxime cithir-le zeet, alabaastiros akko yarhxin dhayittooko siraaximte tharmuuzudde bahteh alle temeeteyaako, amaa tharmuuz tigdileh, kaa amolle xadhdhe.

⁴ Gari lel kurrayenyaako sinnek: “Aymih kinni ta zeet taginah ambizziruk yanem?

⁵ Amayim lel tayim adooxa bool dinaariyaako ziyaadah yimibbixeh baaxentitih yamxawo dhiice dhaarhemhi sabbatah” yerhxin. Teya lel tee yoskoolofin.

⁶ Yeesus laakin: “Tee xaba. Aymih tee tayribbishiini? Yottah mecem kinni yoh abtem.

⁷ Amayim lel, baaxentit umman gedda sinneelih litin, farhinnan gedda, mecem akah abtoona dhictaanamhi sabbatah kinni. Yotta laakin umman gedda taalloona makitiini.

⁸ Ishi dhictem abteh tane, yi nabse lel macagaako basolle tuskuteh tane.

⁹ Ta Mece Ware umbuka caalamko alle warroyinnanille, ta numa abteh tanem, tee mazakkartah xussuumo kinam, rummah sinak arhxiyuk ane” akko yerhxe.

Yahuuda Yeesus yasxaw abaysha

¹⁰ Sarrah amaa lamman kee tamanko kin, Iskariyoot Yahuuda, tenalle yasxaw ciloh sheekhat manabottitille yedeye.

¹¹ Amayim yoobbin gedda lel, xedenenyaako fiddat solaadi akah yaxawna wacde akah sayen. Usuk lel akah kaa yasxaye caashir wagiyak yine.

Faasiga katattaynitlih

¹² Faasigi leema adde yarxudin Cadublat Xabazahi cidko erherh lellecidde, kaa katattaynit: “Awlalle nedeyeyaako Faasigi dirar alle bettakke koh nasqirribem nok fadhdha?” akko yerhxin.

¹³ Ishi katattaynitko lamma fareh: “Daafodde oroba, sarrah wuli layet citro yaaqhuce xiyawti sinah garawo kinni. Kaa kataanta.

¹⁴ Usuk adde orobinnanidde lel, amaa carih wannak tahe akko erhexa: ‘Mudarris yarhxe: Inni katattaynitlih Faasigi dirar alle beeto liyo gerhenti cari awla yane?’

¹⁵ Usuk lel bukat fidin cari siddishimeya sin yayballaw kinnik, amadde noh isqirriba” akko yerhxe.

¹⁶ Katattaynit lel uguteenih amaa daafo fanah yedeyinyaako tamaa usuk tenak akah yerhxeekah geyen, Faasigi dirar lel yisqirribin.

¹⁷ Baarho dhumte gedda lel, amaa lamman kee tamanlih yemeete.

¹⁸ Usun amaa thawlalle cikkishiteenih beetak, Yeesus: “Sinko wuliti, yottaalih beetak yaneya, yi yasxaw kinam, rummah sinak arhxiyuk ane” yerhxe.

¹⁹ Usun mangum yaxzanoona erherhisheenih laklakalle: “Yotta kinniho?” akko yerhxin.

²⁰ Usuk lel: “Lamman kee tamanko wuli tiya, ta shaxanadde yottaalih tekerishak yane tiya kinni.

²¹ Xiyawti Barhi tamaa kaa sabbatah akah tunkuttubeekah yadiye, kaa sabbatah Xiyawti Barhi akko yandhibbirheti laakin kaa careyta! Ta xiyawti aabuke wayeh yakkeedo akah ashshe dhadhdhe” akko yerhxe.

Maddari dirar

²² Usun beetak lel, kinnas yibbirheyaako dhaaco alle abek sarrah yigdileh tenah yoxoyeh: “Hina, tati yi nabse kinni” akko yerhxe.

²³ Usuk wuli kobbaayatto yibbirheh, cawwatoyshitek sarrah, tenah yoxoyeh, usun inkoh akko yoocobin.

²⁴ Usuk lel: “Tayim mango marah arhxuk xarhite yi biilo cahdiya kinni.

²⁵ Aykee cusubam Yallih nigsinnadde amaa lellec aacubendah, ta cinab darohimko aacabo makiyom, rummah sinak arhxiyuk ane” akko yerhxe.

Bithroos xinnan Yeesus yaakumeh warisha

²⁶ Wuli faylat mazmuur abeenimko sarrah lel, Oolac Koomalle yewcin.

²⁷ Yeesus lel: “‘Anu loyna aatako kiyo, ciido lel faax-tarhxo kinni’ yarhxiinim tunkuttubeh tanemhi sabbatah, inkoh yi xinteenih yi xabtoona kitin.

²⁸ Anu rabaako ugutamko sarrah laakin, sinko basolle Galiila fanah adaw kiyo” akko yerhxe.

²⁹ Bithroos: “Usun walaa inkoh ku xineenih ku xaboona kibah, anu amayim maaba” akko yerhxe.

³⁰ Yeesus: “Kabaradde, dor-hotti lamma gedda andhaxamko basolle, adooxa gedda yi xinto kitom, rummah, kok arhxiyuk ane” akko yerhxe.

³¹ Bithroos laakin yiytirireyaako: “Walaa kottaalih rabo ekkemih, ku xino makiyo” akko yerhxe. Usun lel inkoh amayim balih yerhxin.

Yeesus Gat-shemaanelle yassilliye

³² Wuli Gat-shemaane akko yarhxin cara fanah lel yedeyin. Usuk lel: “Anu assilliyendah, talle defeya” akko yerhxe.

³³ Bithroos, Yacqoob kee Yohannis isheelih beyeh, nabaatih yamshaaqhalo kee yamraacado erherhishe.

³⁴ Usuk lel: “Yi rooxi mangum xazzanoyeh yanek, walaa rabi fanah, talle sugantaaki macalsita” akko yerhxe.

³⁵ Dagum tenko mirixtah yedeeyaako, dhiicimtah yekkemko, ta saaca akah tillabto, kumeh yissilliye.

³⁶ Usuk lel “Abba, Wobba kottah ummannim koh takke. Ta kobbaaya asac yok ish. Yakko kibah anu akah farhaakah makiiki, atu fadhdham takkoo” yerhxe.

³⁷ Yemeete gedda lel dhiinak ten geye. Bithroosuk lel: “Simcoon, dhiinak tanito? Inki saaca himma-abitto mirhicta?

³⁸ Cakanadde orobtanki, himma-abitteenih issilliya. Ufayi rummah farhak yane, xazo laakin tante” akko yerhxe.

³⁹ Malammit gedda lel yedeyeh inki waani arhxuk yissilliye.

⁴⁰ Malammih gaxe gedda lel dhiinak ten geye, intit alle yiclishemhi sabbatah lel ayim alle yadabbiinim sorhen.

⁴¹ Maddaxit gedda alle yemeeteh: “Kaddih dhinteenih acrufuk taniini? Sin dhiica, saaca gufteh tane. Xiyawti Barhi zambi wannunhi gabadde yomxoyeh yane.

⁴² Kata, uguta nadawok, ubula, amaa yi yasxaw leti lel kab-yerhxeh yane” akko yerhxe.

Yeesus yomxoyeh yumudhdhuwe

⁴³ Akkanih lel, usuk waanishak anuk, amaa lamman kee tamanko kin Yahuuda yemeete, kaalih mango xiyaw seefa kee gomaadi tibbirheya yinin. Usun lel sheekhat manabottit, sercat dhiiceenit kee naba maraako farritime mara kuuk yinin.

⁴⁴ Amaa yasxayeti lel: “Ta anu fuguto liyoti amaa xiyawto kinni, kaa tibbirhiinih dhawrhodde kaa beya” yerhxeh ishaara akah yoxoyeh yine.

⁴⁵ Yemeete gedda, akkanih kaalle yewceh: “Mudarris!” yerhxeh kaa fugute.

⁴⁶ Usun lel gabub alle hayeenih kaa yibbirhin.

⁴⁷ Tamaa kaa agaagalle daw-yerhxeh yine maraako wuliti lel, gaba yiyfiddigeyaako, sef hiriigeh, amaa naba shekhti garuzzok akko yootokeyaako cokka akko yigrice.

⁴⁸ Yeesus lel: “Wuli shiftatto yabbarho le mara balih seefa kee gomaadiilih yotta tabbarhoona temeetiini?

⁴⁹ Maaxi yamaato maqhdas caredde sinlih ekkeh aydurusiyuk ine gedda, yi mabbarhitiini. Kutuub yakmalooki xaba” akko yerhxe.

⁵⁰ Katattaynit lel inkoh kaa xabeenih kuden.

⁵¹ Wuli natsalah ishe agoogisheya kibah akim hin gombi kaadde kataye. Usun lel kaa yibbirhin,

⁵² usuk laakin amaa natsala xabeh casiinih kude.

Yeesus akottat carelle

⁵³ Usun lel Yeesus naba shekh fanah kaa beyen. Inkoh sheekhat manabottit, naba mara kee sercat dhiiceenit lel inkidde yemeetin.

⁵⁴ Bithroos lel mirixtaako naba shekhti kanshello fanah kaa katattaye. Amaa dhawrheenitlih defeyeh lel giralle lalacak yine.

⁵⁵ Sheekhat manabottit kee umbuka araba lel kaa yagdafoona ciloh, Yeesusulle shaahid wagiyak yinin, laakin inkim migeyinnooni.

⁵⁶ Mango mari zirabah alle yishhidin, laakin ten shaahada inkidde maamaato.

⁵⁷ Wuli mari lel uguteenih zirabah alle yishhidinyaako:

⁵⁸ “‘Ta gabah siraaxime macbad dumuseyaako, adooxa lellecille gabah siraaximinnixe tiya gino kiyo’ arhxuk kaa noobbe” yerhxin.

⁵⁹ Taymille gantah ten shahaada inkidde maamaato.

⁶⁰ Amaa naba shekh fanadde uguteyaako: “Taxaye radde malito? Ta xiyaw kolle ashhiduk yaniinim ayim kinni?” arhxuk Yeesus essere.

⁶¹ Usuk sik-yerhxenkah alle maadabbinna. Naba shekh malammih: “Atu Masiix, Baraka-letiih Barha kito?” akko yerhxe.

⁶² Yeesus lel: “Yotta kinni. Xiyawti Barhi lel Xayli mizgi gabooko defeyak kee carshi darurlih amiituk tabloona kitin” akko yerhxe.

⁶³ Naba shekh lel ishi sara candhisheyaako: “Tayimko ferteh ayimti shohoda fandhe?

⁶⁴ Kaa waato toobbiinih tanin. Sin mablo ayim kinni?” akko yerhxe. Usun lel inkoh rabi akah eeddamah kaa yifridin.

⁶⁵ Gari thuf alle yarhxoona erherhisheenih, intit akko cummusenyaako gommaadih akko yootokiinih: “Irhig iski!” akko arhxuk yinin. Dhawrheenit gantah kaa beyeenih kaa safuufucusen.

Bithroos Yeesus xina

⁶⁶ Bithroos gubi kanshellolle anuk, wuli garuzzö temeeteyaako,

⁶⁷ Bithroos lalacak kaa tubleh, nifidde kulux akko terhxeyaako: “Atu lel Naazret Yeesuslih tinito” akko terhxe.

⁶⁸ Usuk laakin: “Ayim arhxituk tanem maarhige, ayim kinam lel yodde moobinna” arhxuk aluu-yerhxe. Kanshellot carafko yewce geddaako dor-hotti andhaxe.

⁶⁹ Wuli khaddaamit kaa tubleyaako, amalle yine marak malammih: “Ta xiyawti tenko kinni” akko tarhxo erherhishshe.

⁷⁰ Usuk lel malammih aluu-yerhxe. Dago geddaako sarrah, amalle yine mari malammih Bithroosuk: “Atu Galiilaako kitomhi sabbatah, rummah tenko inketta kito” akko yerhxin.

⁷¹ Sarrah ishe abaaro kee dhiiwito erherhisheh: “Ta atin adde waanishshan xiyawto maarhige” yerhxe.

⁷² Akkanih lel dor-hotti malammih andhaxe. Bithroos lel Yeesus: “Dor-hotti lamma gedda andhaxekkah adooxa gedda yi xinto kito” akko yerhxeh yinem yizzikkire. Abem kaa laxsusseh lel weece.