Markos 13 - Saaho Cusub Cahde

Yeesus maqhdas carih dumnan yaakumeh warisha

¹ Yeesus wuli maqhdas careeko awcuk, kaa katattaynitko wuliti: “Mudarris, ta dhayit kee ta makun ayidhdha mecem ubul” akko yerhxe.

² Yeesus lel: “Ta naba makun ablituk tane? Taymidde inki dhayi cidditekkah raaco leya adde miyane” akko yerhxe.

Zaban abayshimah tuumar

³ Usuk maqhdas carih waacinalle Oolac koomalle defeyak, Bithroos, Yacqoob, Yohannis, Indiryaas sinni ulah:

⁴ “Iski noh warish, tayim takko lem manda kinni? Tayim inkoh adde takko le geddahi tuumar ayim yakko kinni?” arhxuk kaa esseren.

⁵ Yeesus tahe akko yarhxo erherhishe: “Akkinnanti sin doolabak selita.

⁶ ‘Anu kayya kiyo’ arhxuk yi migacalle mango mari yemeetiinih, mango mara doolaboona kinon.

⁷ Dhiba kee dhibat ware lel taabbin gedda mibirriigina. Tayim takko alle tane, abayshima laakin amaa gedda maki.

⁸ Wathan wathanti diddeh, nigsinna nigsinnat diddeh uguto kinni. Mango baarholle lel kirdidimom kee culul yakko kinni. Tayim lel amaa waaxelti ubkahi erherh kinon.

⁹ Araballe sin baaheenih sinni sunagoogitidde lel sin sabacoona kee, tenah shaahid takkoona, yottah arhxuk masxadaadarit kee nuguusat nifidde daw-tarhxoona kitiinimhi sabbatah, zeelita.

¹⁰ Mece Ware laakin yookomeh umbuka diikalle warreyo alle tane.

¹¹ Xukmelle sin baahaanah sin yasxayin gedda, waanishsham Quddus kin Ufaye kibah sina makinamhi sabbatah, amaa geddadde ayim tarhxiinim sinah tamxawo kinnik, ayim tarhxiinimih tookomiinih manshaaqhalina.

¹² Sacal ishi sacal yasgadafo kinni, abba lel ishi barha, cindham lel sinni dhaltoyyah didde ugutoona kinon, ten yagdafoona kinon.

¹³ Yi migac hi sabbatah umman tiyah tamnaccaboona kitin. Abayshima fanah curinnanti laakin gargeerimo kinni.

Cazaab waqhte

¹⁴ ‘Batakna kin cayne’ yannaw alle ammissilinnixelle tablin gedda (tamaa yaqhriyeti macalsiito), amaymik sarrah Yahuudiyalle yane mari koomamalle kudoona.

¹⁵ Cari amok sugeti oobe wayo, kaa caredde tanem bahito orobe wayo,

¹⁶ dhagelle sugeti lel ishi sareena bahito caazalle gaxe wayo.

¹⁷ Amaa maxadde soono kee dhoyishsha sayyo lel ten careyta!

¹⁸ Tayim dhamxin waqhtedde takkemko dhaaco abita.

¹⁹ Amayim Yalli makhaaliqho yukhleqhemko kado fanah tekkeh sodhdha, tayek sarrah gantah akke wayo le cazaab yakko kinamhi sabbatah kinni.

²⁰ Amaa max Maddari yuyshudhdhurheh akke wayaado, walaa inki xiyawti gargeerimeh anniye mirhaarho. Amaa doorimeh yane marah arhxuk laakin amaa max yuyshudhdhurhe.

²¹ Amaydo, akkinnanti, ‘Ubula, Masiix talle yane!’ hido ‘Ubula, toohille yane!’ sinak yerhxemko maamanina.

²² Amayim lel zirabti masiixiin kee zirabti nobowa uguteenih, dhiiceenimko, amaa Yalli doore mara doolaboona ciloh ishaarar kee bexsishsham aboona kinon.

²³ Atin laakin selita! Ummannim ookomeh sinah warisheh aniyo.

Xiyawti Barhih mumut

²⁴ Amaa maxadde, amaa cazaabko sarrah ayrotta akkanih dattoyto kinni, alsi lel ishi ifo yaxaw maki,

²⁵ xutuk caranko rado kinni, carshi xaylit lel qinqin-yarhxo kinni.

²⁶ Amaymik sarrah, Xiyawti Barhi darurudde naba xayla kee nabneelih amiituk yabloona kinon.

²⁷ Amaymik sarrah, usuk ishi malaykut faro kinni, usun lel doorimte kaa mara affara jahaako, baarhot wasanko carshi wasan fanah yaskattoona kinon.

Indacartooko nadrusem

²⁸ Misaal indacartooko udrusa: tee xakuk silayaako ishi dharhaa yayyaace gedda, karma kab-terhxeh tanem taarhigin.

²⁹ Amayim balih lel, atin tayim tablin gedda, usuk kab-yerhxeh yanem kee caraf af gufeh yanem taarhigin.

³⁰ Tayim inkoh takkendah, ta ijo tillabto makinam rummah sinak arhxiyuk ane.

³¹ Caran kee baarho inkoh tillaaboona kinon, yi waani laakin tillabto maki.

Max kee saaca yaarhigeti miyane

³² Amaa max kee saaca laakin Abbaako bextih, walaa Barha, walaa carshi malaykut gantah, yaarhigeti miyane.

³³ Amaydo, amaa waqhti manda yamaato kinam mitaarhigiinimhi sabbatah himma-abita.

³⁴ Wuli ishi dik xabeyaako kallaaxe xiyawti, ishi care ishi garuuzalle xabah, ten-ten ciyyo akah yaxayeh, caraf dhawrheena lel himma-abito yeemereya balih kinni.

^35-36 Amaydo, amaa cari-wanna kaso, hido barti-abrhah, hido dor-hotti andhaxa gedda, hido lel dhaxiine yamaato lem mitaarhigiinimhi sabbatah, gar-heeko yamiiteh dhintimadde sin geyak, himma-abita.

³⁷ Ta sinak arhxem umman tiyak arhxem kinnik, himma-abita!”