Markos 12 - Saaho Cusub Cahde

Cinab dhageh baclaysheenitti aymassal

¹ Usuk lel aymassalah tenlih waanisho erherhishe: “Wuli xiyawti cinab dhage yizriyeyaako dagge akko makisheh, amaa cinab adde yatsmuqhin boozo akah faraaceyaako, dhawrheeni qobba akah siraaxeh, cinab dhage baclayishshamadde yeskeereh aki baarho kallaaxe.

² Waqhti gufe gedda lel, amaa cinab dhageeko dago daro akah baaho wuli garuzzo amaa cinab dhage baclayishshamalle dhirhiye.

³ Usun lel kaa beyeenih kaa yootokinyaako foyya kin gabah kaa dhirhiyen.

⁴ Malammih aki garuzzo alle dhirhiye, usun lel amo akko yootokiinih xoola kin araxah kaa yibbirhin.

⁵ Aketto lel alle dhirhiye, usun lel kaa yigdifin. Aki mango mara lel dhirhiye; tenko garo akko yootokin, garo lel yigdifin.

⁶ Yakko kibah aketto, isheh kixin barha luuk yine. Abayshimalle: ‘Yi barha xishmatoona kinon’ yerhxeh ishi barha alle dhirhiye.

⁷ Amaa cinab dhagehi baclaysheenit laakin: ‘Tati waarish kinni. Amowa, kaa miiraas nottah yakko kinnik kaa nagdafowaa’ sittiyak yerhxin.

⁸ Usun kaa beyenyaako kaa yigdifiinih amaa cinab dhageeko irolle kaa ciden.

⁹ Amaa cinab dhageh wanna ayim abo kinni? Yemeeteyaako amaa cinab dhageh baclaaysheenit ten yeyleeh amaa cinab dhage aki marah yaxaw kinni.

¹⁰ Ta Kutuub: ‘Siraaxa mari xinen dhayitti ongolot dhaa yekkeh yane;

¹¹ tayim Maddari abitto kinni, ni intidde lel mangum carha mece’ yarhxeya maqhrayinnitiini?”

¹² Ta aymassal ten zacabah waanishem yeerhegiinimhi sabbatah, xiyawko mashshiiteenih kibah kaa yarhawna farhak yinin. Amaymih kaa xabenyaako yedeyin.

Roomaati naba nugusuh miiri yakfiliinim

¹³ Kaa waanille kaa yabbarhoona ciloh lel wuli Faarisiin kee Heerodesti mara alle dhirhiyen.

¹⁴ Usun lel yemeetinyaako: “Mudarris, atu rummaahit tiya kitom kee xiyaw mablodde macal malitom naarhige. Yallih arax rummah taydurusenkah, xiyaw nif tableh mitanqiyyire. Roomaati naba nugusuh miiri yakfiliinim arax kinni maki? Nakfalo nolle tane, woole nolle mitane?” akko yerhxin.

¹⁵ Usuk laakin ten nifaaq yeerhegeh: “Aymih cakanadde yi hayak taniini? Iski amaa diinaar ablok yolle baha” akko yerhxe.

¹⁶ Inketta lel alle baahen. Usuk lel: “Tayim miyatti gina kee kataaba kinni?” akko yerhxe. Usun: “Roomaati naba nugus him” akko yerhxin.

¹⁷ Yeesus: “Roomaati naba nugus-him kinam Roomaati naba nugusuh, Yallihim kinam lel Yallah uxuwa” akko yerhxe. Usun lel cibrah raben.

Tsadduuqhiim kee rabaakohi ugut

¹⁸ Rabaakohi ugut miyane yarhxe Tsadduuqhiim alle yemeetin. Ta essero lel kaa esseren:

¹⁹ “Mudarris, Moosa taginah noh yuktube; labhatti sacal cindham hinnim numa luuk yinemko rabemko, labhatti amaa gubna nagarah dhalaa ishi sacalah carisha.

²⁰ Malxina sacal yinin; aftiti numa beeteh dhalaa xabekkah rabe.

²¹ Malammi tee nagareh, dhalaa xabekkah rabe. Maddaxi amayim balih.

²² Malxin-yati lel inki dhalaa mixabo. Ummannimhi sarralle amaa numa yakkeedo rabte.

²³ Rabaakohi ugutulle, ishi malxinti numa kuuk tinemhi sabbatah, usun malammih ugutan gedda, miyatti numa takko kinni?”

²⁴ Yeesus: “Kutuub kee Yallih xayla mitaarhigiinimhi sabbatah makini aqhlithuk taniinim?

²⁵ Usun rabaako ugutan gedda, mimarcishitaana, mimarcishimaanaaki, carshi malaykutuh kinni yammingidiinim.

²⁶ Rabtem uguteenim, Yalli Moosak: ‘Anu Abraahim Yalla, Isxaaq Yalla kee Yacqoob Yalla kiyo’ adde yarhxe keenan-le xorhhi sabbatah tane Moosat kitaabhi faqhara maqhrayinnitiini?

²⁷ Usuk tanemhi tiya kibah rabtemhi Yalla maki. Nabaatih tiqhlithiinih tanin” akko yerhxe.

Ummannimko naba amre

²⁸ Wuli sercat dhiiceeni lel yemeeteyaako, usun sittiyaalih ankeexeduk ten yoobbeh, usuk lel meceetih alle yedebbem yuble gedda: “Ummannimko naba amri awlih tiya kinni?” yerhxeh kaa essere.

²⁹ Yeesus: “Ummannimko nabati: ‘Israa-eel oobba, Maddara kin ni Yalli, Maddari inketta kinni.

³⁰ Maddara kin ishi Yalla umbuka ishi afcaadooko, umbuka ishi rooxeeko, umbuka ishi xangalko, umbuka ishi xaylaako ikxin.’

³¹ Malammi lel: ‘Ishi zoobatto lel ishe balih ikxin.’ Tayimko naba amri miyane” yerhxeh alle yedebbe.

³² Amaa sercat dhiiceeni lel: “Mudarris, meceetih tanito. Usuk inketta kinam rummah terhxeh tanito, kayya kibah lel aketti miyane.

³³ Umbuka afcaadooko, umbuka fahme kee umbuka xaylaalih yakxiniinim, kee zoobatto sinne balih yakxiniinim umbuka xararishen muttuxuwa kee sadaqhaako naba” akko yerhxe.

³⁴ Yeesus, meceetih yedebbem kaa yuble gedda: “Yallih nigsinnaako mirheerhito” akko yerhxe. Amaymik sarrah walaa inketti kaa essero mafdabo.

Masiix miyatti Barha kinni?

³⁵ Yeesus maqhdas caredde aydurusuk: “Aaginah kinni ta sercat dhiiceenit Masiix Dawud barha kinni yarhxiinim?

³⁶ Dawud isheh Quddus kin Ufayeh abeh tahe yerhxe: ‘Maddari yi Maddarak, “ku nacabtoolit ku ibih guba ten hayandah, yi mizgaako defee” akko yerhxe.’

³⁷ Dawud isheh Maddara akko yarhxe. Usuk aaginah kaa barha yakke?” yerhxe. Amaa mango xiyaw lel xedenlih kaa yoobbin.

Sercat dhiiceenitko zeelita

³⁸ Ishi aydarasadde lel: “Sercat dhiiceenitko zeelita. Usun dherh saradde hel-yarhxiinim, cadaagalle salaam akko yarhxiinim,

³⁹ sunagoogitidde lel mece defeenan, cidih lel naba carur kixinon.

⁴⁰ Usun gubonti carwa yandhuciinih takaleh salat yayrheerhin. Ta mari mangum sirii firde geyoona kinon” akko yerhxe.

Gubnat muttuxuwa

⁴¹ Usuk maqhdas carih muttuxuwat sanduq agaagalle defeyeh xiyaw amadde solaadi hayak macalsiite. Mango gaddaalit lel mangum adde hayak yinin.

⁴² Wuli baaxenta kin gubna lel temeeteh wuli inki tacriifa gufinnixe lamma santiim adde hayte.

⁴³ Ishi katattaynitih lel akah deecimeh: “Ta baaxenta kin gubna umbuka ta muttuxuwat sanduqhuh axawuk yane maraako ziyaada toxoyeh tanem, rummah sinak arhxiyuk ane.

⁴⁴ Tayim lel usun inkoh sinni mangumko yoxoyin, ishe laakin ishi waytooko luuk tinem inkoh akah marritimto taarhigeya toxoyemhi sabbatah kinni” akko yerhxe.