Markos 11 - Saaho Cusub Cahde

Yeesus Nugus balih Yerusaalem oroba

¹ Kado Yerusaalemih kab-yerhxiinih Oolac koomalle geytimta Beetfage kee Beetcaniyalle yemeetin gedda, Yeesus ishi katattaynitko lamma dhirhiyeyaako:

² “Tamaa sin nifidde suganta dikille tedeyinyaako, orobtan gedda wuli yumudhdhuwe cindhaa okolotta, kaddih walaa inketti akko korinnixeya geytoona kitin. Iftixantaaki talle baha.

³ Akkinnanti: ‘Aymih tayim abak taniini?’ sinak yerhxemko, ‘Maddari kaa farheh kinni, akkanih lel talle kaa yadabbo kinni’ akko erhexa” akko yerhxe.

⁴ Usun lel yedeynih yumudhdhuwe cindhaa okolotta irolle arax afalle geyenyaako, yiftixin.

⁵ Amalle daw-terhxeh tinemko gari lel: “Ayim abak taniini, cindhaa okolotta aftixuk taniini?” akko yerhxin.

⁶ Usun lel Yeesus akko yerhxeh yinem akko yerhxin, usun lel yadawna ten xaben.

⁷ Usun lel amaa cullutta Yeesus fanah baaheenih, sinni natsul bukalle akko hayenyaako, usuk akko defeye.

⁸ Mango mari sinni natsul araxadde akah sidishen, aki mari lel garabko yigricin dharhaa le xakuk akah sidishen.

⁹ Amaa afa kee sarradde akko aduuk tine mango xiyaw lel: “Yalla xamdishinna! Maddari migacalle yamiiteti dhaacole kinni!

¹⁰ Tamiite ni abba kin Dawud nigsinna dhaacole kinni! Yalla xamde takkoo agani carshelle!” arhxuk andhadhdhaxak yinin.

¹¹ Usuk Yerusaalem orobeh lel maqhdas caredde orobe. Gura-mizgalle kulux-yerhxeh ummannim yublek sarrah lel, baarho dhumteh tineyaako, amaa lamman kee tamanlih Beetcaniya fanah yedee.

Yeesus indacartö abaara

¹² Malammit max, usun Beetcaniyaako awcuk, usuk safriite.

¹³ Waacinaako wuli dharhaa-le indacartö yubleyaako, wulim akko geyam kee yablo alle yedee. Alle yemeete gedda, indacaari waqhte kuuk miyinemhi sabbatah dharhaa kibah inkim akko migeyo.

¹⁴ “Kamboh walaa inketti daro kok beete wayo” lel akko yerhxe. Kaa katattaynit lel yoobbin.

Yeesus maqhdas care yatsrige

¹⁵ Yerusaalemille lel yemeetin. Usuk maqhdas caredde orobeh, amaa maqhdas caredde aabixuk kee dhaamak tine xiyaw inkoh yeyyeeceh, solaadi yaybiddile marih thawlal kee xamaama aabixuk yine marahi kuraasi yeydedebbe.

¹⁶ Walaa inkim yooqhociinih amaa maqhdas careeko tillaaboona lel walaa inkettah masmaxo.

¹⁷ Ten aydurusuk lel: “‘Yi cari umman diikah salaat careh decsiimo kinni’ yarhxiinim tunkuttubeh mitane? Atin laakin garaacenti gonna akko abteenih tanin” akko arhxuk yine.

¹⁸ Sheekhat manabottit kee sercat dhiiceenit yoobbiinih, akah kaa yaylayniikah wagiyak yinin. Kaa aydarasalle amaa mango xiyaw cibrah rabeenimhi sabbatah lel kaako mashshiiten.

¹⁹ Baarho dhumte gedda lel amaa daafooko yewcin.

Caamulti indacartö

²⁰ Dhaxiine tillaabak lel amaa indacartö rimid fanah kafteh yublin.

²¹ Bithroos lel yizzikkireh: “Mudarris, ubul! Amaa atu abarte indacartö kafteh tane” akko yerhxe.

²² Yeesus lel: “Yallah imin.

²³ Inkoh tamaa arhxinnannim takko kinamhi shakke ishi afcaadodde hayekkah, takko kinamah yaamineh, ta koomak: ‘Takkeeko aduwaaki badadde ciddit’ arhxinnantiyah akah takko kinam rummah sinak arhxiyuk ane.

²⁴ Amaydo, dhaacitteenih esserinnannim kabbatteenim balih imina, sinah takko kinam lel sinak arhxe.

²⁵ Tassallawna ugutinnan gedda lel, carshelle geytima sin Abba sin umaani sinalle xabo ciloh, umman tiyaako aallinnannim alle xaba. [

²⁶ Atin alle xabe wayteenimko laakin carshelle geytima sin Abba gantah sin umaani sinalle xabo maki” yerhxeh alle yedebbe.]

Yeesus reeza esserodde gaxte

²⁷ Usun lel malammih Yerusaalemille yemeetin. Maqhdas caredde orobak, sheekhat manabottit, sercat dhiiceenit kee naba mari alle yemeetiinih:

²⁸ “Awlih reezah kinni tayim abak tanitom, hido ta reeza koh toxoyem miya kinni?” akko yerhxin.

²⁹ Yeesus: “Anu lel wuli essero sin essero kiyo, radde yoh tedebbiinimko, anu lel tayim awlih reezah abak aniyom sinah warisho kiyo.

³⁰ Yohannis aythammaq carsheeko kuuk yine woole xiyawko? Yoh edebbaa” akko yerhxe.

³¹ Usun lel sinne-sinneh taginah waanishak yinin: “‘Carsheeko’ akko nerhxemko: ‘Aymih kaa aamine wayteeni?’ nok yarhxo kinni.

³² Laakin: ‘Xiyawko’ akko nerhxemko...” Amaa mango xiyaw inkoh Yohannis rummaahit nabiih kaa abluk yiniinimhi sabbatah, amaa xiyawko mashshiiten.

³³ Amaymih Yeesusuk: “Minaarhige” akko yerhxin. Usuk lel: “Anu gantah tayim awlih reezah abam sinah warisho makiyo” akko yerhxe.