Markos 1 - Saaho Cusub Cahde

Yaythimmiqhe Yohannis arax yasqirribe

¹ Yeesus Masiix, Yallahi Barha kinyahi, Mece Warih erherha.

² Nabii Isayasadde akah tunkuttubeh taneekah: “Taykinna, ku basolle ku arax yasqarrabo le inni luukta ku nifidde dhirhiyak aniyo,

³ zeeratiih dhaw zibolle yamabbe: ‘Maddarah arax akah isqirriba, kaa arax rig-ishanta’”.

⁴ Yaythimmiqhe Yohannis, zambi xabbot geyoona ciloh, zibolle toobat anthammaq warroyshak yemeete.

⁵ Umbuka Yahuudaati baarho kee umbuka Yerusaalem xiyaw kayyalle yemeetin. Sinni zambeh yeelemiinih lel Yordaanos nahaaradde kayyah anthimmiqhuk yinin.

⁶ Yohannis lel gaalatti dagar kee qarbat ragad hashshiitak yine. Cawayne kee zibi baska lel beetak yine.

⁷ Usuk lel: “Yottaako ziyaada xayla leti yi sarralle amiituk yane. Anu lel cunuuneh kaa kabelhi ragad akko aftaxo meeda.

⁸ Anu layeh sin iythimmiqhe. Usuk laakin Quddus kin Ufayeh sin yaythammaqho kinni” arhxuk warroyshe.

Yeesus anthammaq

⁹ Amaa waqhtedde Yeesus Galiilaati Naazretko yemeeteh, Yordaanos nahaaradde Yohannisih yinthimmiqhe.

¹⁰ Usuk lel layeko yewce geddaakoh akkanih carshit amfilluuk yuble. Ufayi lel xamaama balih alle oobe.

¹¹ Carsheeko lel dhaw yemeete: “Atu yinkixxine yi Barha kito. Anu kottaalih xedeneena kiyo”.

Yeesus cakana

¹² Ufayi lel akkanih zibolle kaa yeyyeece.

¹³ Marootom lellectiya lel zibolle Sheethanah amcikkinuk suge. Zibi bahayimlih yine, malaykut lel kaa baclayshak yinin.

Yeesus ishi ciyyo erherhisha

¹⁴ Yohannis yimxibbishek sarrah, Yeesus Galiilalle yemeeteh Yallih Mece Ware warroyshe.

¹⁵ Usuk lel: “Waqhti yikmileh kinni. Yallih nigsinna kab-terhxeh tane. Totoobiinih Mece Wareh imina” yerhxe.

Yeesus afti katattaynit doora

¹⁶ Usuk Galiilaati igilhi afko tillaabak, Simcoon kee Indiryaas, Simcoon sacal, caasa tagoofofem kuuk yiniinimhi sabbatah, caasat intile igilille cidak ten yuble.

¹⁷ Yeesus lel: “Yi kataanta, anu lel xiyaw tagoofofem akah takkiiniikah sinak abo kiyo” akko yerhxe.

¹⁸ Usun lel caasat intilel xabeenih akkanih kaa katayen.

¹⁹ Amakkeeko dagum yedee gedda, Zibdit barha Yacqoob kee kaa sacal Yohannis, jalbadde yininya yakkeedo sinni caasat intilel aymamacuk ten yuble.

²⁰ Akkanih lel akah deecime. Usun lel Zibdi sinni abba casbentitlih jalbadde xabeenih kaa katayen.

Yeesus najaasa-le ufaye-le xiyawto urusa

²¹ Kafarnaxuumudde lel oroben. Akkanih lel Sambatah sunagoogedde orobeh aydurusuk yine.

²² Sercat dhiiceenit balih akkekkah, reeza le tiya balih ten yuydurusemhi sabbatah, kaa aydarasah cibrah raben.

²³ Amaa waqhtedde lel ten sunagoogedde najaasa-le ufaye le xiyawti yine. Usuk lel:

²⁴ “Ko Naazret Yeesuso, ayim nottaalih lito? Atu notta taylaw temeete? Anu miyatto kitom ku aarhige. Atu Yallih Quddus kin tiya kito” yerhxeh zeere.

²⁵ Yeesus laakin: “Sik-erhexaaki, akko ewec!” yerhxeh kaa yoskoolofe.

²⁶ Amaa najaasa-le ufayi lel firigrig kaa isheh wac-yarhxe andhaxlih akko yewce.

²⁷ Inkoh lel yussuxuttutin, sitta-sitta lel esseren: “Tayim ayim kinni? Cusub darse reezaalih! Najaasa-le ufayit yakkeedo yaamire, usun lel kaa yaabbin” yerhxin.

²⁸ Akkanih lel wari kaa zacabah umbuka Galiilaati wakalelle faax-yerhxe.

Yeesus mango mara urusa

²⁹ Akkanih lel sunagoogeeko yewciinih Simcoon kee Indiryaas caredde Yacqoob kee Yohannislih oroben.

³⁰ Simcoon ballö lel lacnah carhah tine. Usun lel akkanih tee zacabah kaalih waanishen.

³¹ Usuk lel teyalle yemeeteh gabadde tee yibbirheh xaf tee ishe. Lacna akah xabteh lel ten takhdamo erherhishshe.

³² Ayro dhumteh kasi yekke gedda lel, inkoh laxuttem kee timjinninem alle baahen.

³³ Umbuka daafo lel carafalle teketteh tine.

³⁴ Usuk lel yemfeleele laxuu le mango mara uruse, mango junuun yakkeedo yeyyeece. Kaa yeerhegiinimhi sabbatah lel, junuun waanishaanamko ten deese.

Yeesus Galiilalle warroysha

³⁵ Dhaxiine maaxalle, kaddih dite anuk, uguteh zibo kin makaano fanah yedee, amalle lel yissilliye.

³⁶ Simcoon kee kaalih tinem lel kaa goronishen.

³⁷ Usun lel kaa geyeenih: “Ummanti ku wagiyaa yane” akko yerhxin.

³⁸ Usuk lel: “Anu akah emeetem tayim kinamhi sabbatah, amalle warroysho ciloh, aki diika fanah nadaw hayyaanta” akko yerhxe.

³⁹ Usuk lel ten sunagoogitidde warroysha kee junuun ayyaacuk umbuka Galiilalle yuzuure.

Yeesus wuli saknite tiya yaysiffiye

⁴⁰ Wuli sakniteti alle yemeeteyaako kaa dhaacimak gululluubuweh: “Fadhdhemko yi taysaffawo dhicta” yerhxe.

⁴¹ Raxmah uluc akko xarhemhi sabbatah lel ishi gaba dhirhiyeyaako kaa dhageh: “Anu farha. Imsiffii” akko yerhxe.

⁴² Akkanih sakna akah xabteh lel yimsiffiye.

⁴³ Dhacumaatih kaa asuuseyaako lel akkanih kaa dhirhiye.

⁴⁴ “Ubul haye, tiyah miwarishin, laakin aduwaaki ishi nabse shekh uybulluu. Tenah shahaada takko lel ishi thahaarah Moosa yeezezem bah” akko yerhxe.

⁴⁵ Usuk laakin yewceyaako, amayim warroysho kee ware faax-isho erherhishe. Amaymih lel Yeesus farhe ginah daafodde orobo mirhiicinna. Usuk laakin zibo kin makaanolle yine. Xiyaw umbuka wakaliilaako alle amiituk yinin.