Maatiyos 9 - Saaho Cusub Cahde

Yeesus wuli kafe tiya urusa

¹ Yeesus jalbadde koreyaako tabeh ishi daafolle yemeete.

² Taykinna lel wuli kafeh sidolle dhiina tiya alle baahen. Yeesus lel ten imaan yuble gedda, amaa kafe tiyak: “Aydukum-erhex, yi barha, ku zambit koh xabbiimeh yane” akko yerhxe.

³ Taykinna lel sercat dhiiceenitko gari sinni afcaadodde: “Tati Yallah kinni waatimak yanem” yerhxin.

⁴ Yeesus laakin ten xisaab yeerhegeh: “Aymih sinni afcaadodde umaani taxeesebiinim?

⁵ ‘Ku zambit koh xabbiimeh yane’ yarhxiinim kee ‘Ugutaaki aduu’ yarhxiinimko awlihim ruhuwa?

⁶ Amaydo, Xiyawti Barhi baarholle zambe xabshiisho reeza leyam taarhagoona ciloh” yerhxek sarrah, amaa kafe tiyak: “Ugut, ishi sido tuttuqhuceh aduu” akko yerhxe.

⁷ Usuk lel uguteh ishi careh yedee.

⁸ Amaa mango xiyaw tayim yublin gedda, mashshiiteenih, ta reeza xiyawah yoxoye Yalla yeynebin.

Yeesus Maatiyos deecima

⁹ Yeesus amakkeeko tillaabak, Maatiyos akko yarhxin xiyawto amaa miiri alle yaskattin caralle defeyeh kaa yubleyaako, “Yi kataa” akko yerhxe. Usuk lel uguteh kaa kataye.

¹⁰ Yeesus maaddille cikkishiteh beetak, taykinna, mango miiri yaskattit kee zambi-wannun yemeetiinih Yeesus kee kaa katattaynitlih defeyen.

¹¹ Tayim Faarisiin yublin gedda, kaa katattaynitik: “Aymihi sin mudarris miiri yaskattit kee aki zambi-wannunlih beetam?” akko yerhxin.

¹² Usuk laakin tayim yoobbe gedda: “Xaakim farhshiisha mari laxuute mara kibah caafiyat-le mara maki.

¹³ ‘Sadaqhaako raxma kixiniyo’ yarhxiinim ayim kinam aduwantaaki timirmiriinih irhiga. Amayim lel anu akah emeetem zambi-wannunuh deecimo kibah, xaqqi-wannunuh maki” akko yerhxe.

Siyaam essero

¹⁴ Sarrah Yohannis katattaynit Yeesusulle yemeetiinih: “Aymihi notta kee Faarisiin nasoome, ku katattaynit laakin miyasoomiinim?” akko yerhxin.

¹⁵ Yeesus lel: “Waraddi marcawwi tenlih yanem fanah yaxzanoona dhiicaana? Marcawwi tenko beyan waqhti yamaato kinni. Amayek sarrah lel yasaamoona kinon” akko yerhxe.

¹⁶ Cusub gamedda zirte sareenadde yayrhibbisheti miyane, amayim lel amaa leeza zirte sareena candhishshamhi sabbatah kinni. Amaa candhiirhi mangum yaame.

¹⁷ Cusub wayni lel zirte idritidde mihayaana. Adde hayenimko, amaa idrit fotkishsha, amaa wayni xarhitta, amaa idrit lel caynita. Cusub wayni cusub idritidde kinni gaxam, sittiya lel mirhaga.

Yeesus wuli numa kee manabotti barhä urusa

¹⁸ Usuk tayim tenak arhxuk, taykinna, wuli manabotti yemeeteyaako kaa nifille gululluubuweh: “Yi barhä kado rabte, laakin atu temeeteh gaba alle haytemko malammih wafa alle gaxto kinni” akko yerhxe.

¹⁹ Yeesus lel uguteyaako ishi katattaynitlih kaa kataye.

²⁰ Taykinna lel, wuli numa lamman kee taman iggidiya biili akko xarhitaya, caazaako temeeteyaako kaa sareenah erherha dhagte.

²¹ Amayim lel ishi afcaadodde: “Kaa sareena dhagemko, uro kiyo” terhxemhi sabbatah kinni.

²² Yeesus ufkun-yerhxeh tee yuble gedda: “Aydukum-erhex, yi barhäw, ku imaan ku uruseh yane” akko yerhxe. Amaa geddaako lel amaa numa urte.

²³ Yeesus amaa manabotti carelle yemeeteyaako machambara taatukem kee xazzanoyta mango xiyaw yuble gedda:

²⁴ “Aduwa, barhä dhiina tanenkah mirabooki” yerhxe. Usun lel alle yoosolin.

²⁵ Amaa xiyaw yewcin gedda, orobeh gabadde tee yibbirhe, amaa barhä lel ugutte.

²⁶ Tayimhi wari lel amaa baarholle faax-yerhxe.

Yeesus lamma inti-male urusa

²⁷ Yeesus amakkeeko tillaabak, wuli lamma inti-mali: “ Dawud Barha, nolle raxmat!” yarhxiinih zeerak lakadde akko katayen.

²⁸ Caredde orobe gedda, amaa inti-malit alle yemeetin, Yeesus lel: “Anu tayim abo dhiicamah taaminiini?” akko yerhxe. Usun lel: “Yoo, Maddara” akko yerhxin.

²⁹ Amaymik sarrah, “Sin imaan balih sinah yakkoo!” arhxuk ten intit akah dhagandhaage.

³⁰ Ten intit lel fakkite. Yeesus lel: “Ubula, walaa inketti aarhige wayo” yerhxeyaako sirii ginah ten asuuse.

³¹ Usun laakin yedeyinyaako, kaa ware umbuka amaa baarholle faax-ishen.

Yeesus naxar-male urusa

³² Usun amulalle aduuk, taykinna, wuli yimjinnine naxar-male alle baahen.

³³ Yeesus amaa jinnetta akah yeyyeece gedda lel amaa naxar-mali waanishe. Amaa mango xiyaw lel: “Ta gina lem Israa-eelille caduruh tumbulluweh mitaarhige” arhxuk xedenen.

³⁴ Faarisiin laakin: “Junuun yayyaacem, junuun manabottah abeh kinni” yerhxin.

Orba kee shaqqaala

³⁵ Yeesus lel ten sunagoogitidde aydurusuk, nigsinnat Mece Ware warroyshak kee umman laxuu kee waaxelta urusak umman daafof kee diikakalle hel-arhxuk yine.

³⁶ Mango xiyaw yuble gedda, loyna hin ciido balih, niya ciddem kee xato hinam kuuk yiniinimhi sabbatah, raxmah uluc akko xarhen.

³⁷ Sarrah ishi katattaynitik: “Orba rummah mangum kinni haaki shaqqaala laakin dago mara kinon.

³⁸ Amaydo, orbat Maddari ishi orballe shaqqaala dhirhiyooki dhaaco aba” akko yerhxe.