Maatiyos 8 - Saaho Cusub Cahde

Yeesus wuli saknite tiya yaysiffiye

¹ Amaa koomaako oobe gedda, mango xiyaw kaa katayen.

² Taykinna lel wuli sakniteti alle yemeeteyaako gululluubuweh: “Maddara, fadhdhemko yi taysaffawo dhicta” akko yerhxe.

³ Yeesus lel ishi gaba yiyfiddigeyaako: “Yi farhi kinnik imsiffii” arhxuk kaa dhage. Kaa sakna lel akkanih akah timsiffiye.

⁴ Yeesus lel: “Ubul haye, tiyah miwarishin, laakin aduwaaki ishi nabse shekh uybulluu. Tenah shahaada takko lel Moosa yeezeze muttuxuwa bah” akko yerhxe.

Yeesus bool caskartiyah manabottahi garuzzo urusa

⁵ Yeesus Kafarnaxuumudde orobe gedda, wuli bool caskartiyah manabotti kaa dhaacimak alle yemeeteh:

⁶ “Yi khaddaam kafeyaako caredde umaatih laxuutak yane” akko yerhxe.

⁷ Yeesus lel: “Emeeteyaako kaa uruso kiyo” akko yerhxe.

⁸ Amaa bool caskartiyah mas-uul laakin: “Maddara, atu yi carelle tamiitem akah missil tiya makiyo, atu waanitta erhex kibah, yi khaddaam uro kinni.

⁹ Amayim lel inni geridde liyo caskarlih, anu gantah inneh reezat geridde yane tiya kiyo. Wuli tiyak, ‘Aduu’ akko erhxemko, yadiye, akettok lel, ‘Amo’ akko erhxemko, yamiite, inni khaddaamak, ‘Tayim ab’ akko erhxemko abamhi sabbatah kinni” yerhxeh alle yedebbe.

¹⁰ Yeesus tayim yoobbe gedda, cibrah rabeyaako kaa kataak yine marak: “Ta gina le imaan Israa-eelille walaa inkettaalih migeyinniyom rummah sinak arhxiyuk ane.

¹¹ Mango mari ayrommaaxa kee ayrodhdhumaako yemeetiinih carshi nigsinnadde Abraahim, Isxaaq kee Yacqooblih maaddille defeyoona kinoonim sinak arhxiyuk ane.

¹² Nigsinnat cindham lel amaa irot ditedde cidditoona kinon. Amalle lel weeca kee ikokti xarqam yakko kinni” akko yerhxe.

¹³ Amaa bool caskartiyah manabottak lel Yeesus: “Akah teemeneh tanitookah koh takkooki, aduu” akko yerhxe. Amaa kaa khaddaam lel amaa geddaako ure.

Yeesus mango mara urusa

¹⁴ Yeesus Bithroos caredde orobe gedda, Bithroos ballö lacnat sabbatah laxutteh carhah gaxteh akah sugte.

¹⁵ Usuk gaba akah dhagandhaage gedda lel amaa lacna akah xabteyaako ugutteh kaa takhdamo erherhishshe.

¹⁶ Amaa kaso timjinnineh tinemko mango mara alle baaheenih, inki waanittah amaa uma ufayit inkoh akah yeyyeeceyaako amaa laxuuteh yine mari inkoh uren.

¹⁷ Tayim tekkem lel nabii Isayas: “Ni thurusrus asac noh ishe, ni laxuu lel noh yooqhoce” yerhxeh yineya takmalo ciloh kinni.

Yeesus kataanamhi limo

¹⁸ Kado Yeesus kaa lamma galelle mango xiyaw yuble gedda, igilko amaa carhalle taboona ten yeemere.

¹⁹ Wuli sercat dhiiceeni yemeeteh lel: “Mudarris, atu alle adiinnanille ku kataw kiyo” akko yerhxe.

²⁰ Yeesus lel: “Waker gonnit leyan, caranti kimbir lel sinni care leyan, Xiyawti Barhi laakin amo adde hashshiitakke maleya” akko yerhxe.

²¹ Katattaynitko wuliti: “Maddara, ookomeh inni abba attaacago yi xab” akko yerhxe.

²² Yeesus laakin: “Rabontit sinni rabonta yattaacagoonaaki, yi kataa” akko yerhxe.

Yeesus goomadhdhe daw-ishe

²³ Usuk jalbadde kore gedda, kaa katattaynit adde katayen.

²⁴ Taykinna lel igilille sirii irhfa ugutteyaako amaa jalba goomadhdheh tamandhaco fadhdhe; usuk laakin dhiineh yine.

²⁵ Usun lel yedeyinyaako: “Ni garger, Maddara; alayi nanino” arhxuk kaa ugusen.

²⁶ Usuk lel: “Ko imaan dagito, aymih mashshittaana?” akko yerhxe. Sarrah uguteyaako amaa igil kee xaaxatta ten yoskoolofe, sarrah amalle naba hidaaya tekke.

²⁷ Amaa xiyaw lel: “Tati aaginale xiyawto! Igil kee xaaxatta gantah kaa yaabbin” arhxuk cibrah raben.

Yeesus yimjinnine lamma xiyawto urusa

²⁸ Usuk amaa carha Gadaarat marih baarho akko yarhxin dikille tabe gedda, wuli yimjinnine lamma qabaaraako yewciinih akah garayen. Mangum umik yiniinimhi sabbatah lel amaa araxko walaa inketti tillaabo dhiicak miyine.

²⁹ Taykinna lel usun: “Ko Yallih Barha, nottaalih ayim lito? Waqhti gufekkah talle ni tacazzabo temeete?” arhxuk zeeren.

³⁰ Kado, amakkeeko mirixtalle mango xasama alooluk tine.

³¹ Amaa junuun lel: “Ni tayyaaco tekkemko, too mango xasamadde ni dhirhii” arhxuk kaa dhaacimen.

³² Usuk lel: “Aduwa” akko yerhxe. Amaymih usun yewciinih amaa xasamadde oroben. Taykinna lel amaa mango xasama inkoh ullallamutuh igilidde xarhiteenih layedde yumundhucin.

³³ Amaa loynit lel kudeenih daafo fanah yedeyinyaako ummannim, fertoh lel amaa timjinninemille tekkem warroyshen.

³⁴ Taykinna lel umbuka daafo Yeesusuh garayto tewceh, kaa yublin gedda lel ten zoobäako yadaw kaa dhaacimen.