Maatiyos 7 - Saaho Cusub Cahde

Garo yafridiinim

¹ “Tamfirridinki mafradina.

² Amayim lel toxoyin firdeh tamfarradoona kee tatneefecin qiyaasah sinah tanqaaso kinamhi sabbatah kinni.

³ Ku intikke yane gunde tablo akko waytaya, ku sacalhi intik yane askurta aaginah duhta?

⁴ Hido, ku intikke gundi akko yaneya, ishi sacalakke: ‘Ku intiiko askurta koh ayyaaco’ aaginah akko tarhxe?

⁵ Ko munaafiqhto, tookomeh ishi intiiko gunde eyyec, sarrah ishi sacalhi intiiko askurta tayyaaco meceetih tablo kitok.

⁶ Tinqiddisem kaarah maaxayna. Sinni luul xasamat nifidde micidina. Amayim lel xasama ibah adde yacitcitiinimko kee kaara gaxeenih sinadde araanamko kinni.

Sinah tamxawo kinnik esserita

⁷ Sinah tamxawo kinnik esserita, geytoona kinnik wagiya, sinah fakkitto kinnik lel ukuxkuxa.

⁸ Amayim lel esserinnanti kabbaata, wagiyati geya, yakuxkuxe tiyah lel akah fakkitto kinamhi sabbatah kinni.

⁹ Hido, sinko miyatto kinni, kaa barhi folotta kaa essera gedda dhayitto akah yaxaw leti?

¹⁰ Hido caasatto kaa essera gedda caroora akah yaxaw leti?

¹¹ Amaydo, atin uma mara kitin hanuk, sinni cindhamah mece muttuxuwa yaxaynim taarhegiinih yekkemko, carshelle geytima Abba kaa esserinnan marah amayimko ziyaada mecem yaxaye!

¹² Amaydo, Sercat kee Nobowa tarhxem tayim kinnik, aki xiyaw sinah aboona farhe dhadhdheenim atin yakkeedo tenah aba.

Xeewin caraf

¹³ Xeewin carafko oroba. Amaa liyalle xiyaa beya caraf fidina, amaa arax lel sahiil kinni, amadde oroba mari lel mango mara kinon.

¹⁴ Aniina fanah beya caraf xeewintiya, arax lel sirii tiya kinni, kayya geya mari lel dago mara kinon.

Xarha kee tee daro

¹⁵ Addaako simbaaca suulal kinon hanuk, ciidot saradde sinalle tamiite zirabti nobowaako zeelita.

¹⁶ Ten daroh ten taysharhaarhagoona kitin. Cinab keenan-le xorhko yakatte, woole indacaari sibsibko?

¹⁷ Amaydo, mece xarha mece daro bahta, laakin uma xarha uma daro bahta.

¹⁸ Mece xarha uma daro bahto mirhicta, uma xarha lel mece daro mibahta.

¹⁹ Inkoh mece daro baahinnixe xorh yaggiriceh giradde cidditta.

²⁰ Amaydo, ten daroh ten taysharhaarhagoona kitin.

Caduruh sin maarhige

²¹ Yottakke, ‘Maddara, Maddara’ arhxinnantiya maki carshi nigsinnadde sayo leti, laakin carshelle geytima yi Abbah farhi abatiya kinni.

²² Amaa maxadde mango mari, ‘Maddara, Maddara, ku migacalle nabii balih miwaanishino, ku migacalle junuun neyyeeceh, ku migacalle mango xayla-le abittot maabino?’ yok yarhxoona kinon.

²³ Amaa gedda lel anu, ‘Ko sercat-malitti ciyyo lito, caduruh sin maarhigeeki, mirix yok erhexa’ akko arhxo kiyo.

Sinni care qooqhaxakke siraxa

²⁴ Ta yi waani yaabbeh abittodde ashishinnanti lel ishi care qooqhaxak abe kas-le tiya balih yakko kinni.

²⁵ Rob rade, weeci yemeete, xaaxatti xaaxaysheh ta care dufuwe, qooqhaxak dhishshiimeh yinemhi sabbatah laakin mirado.

²⁶ Ta yi waani yaabbeh abittodde ashishinnixeti lel ishi care xootsalle abe duuda balih yakko kinni.

²⁷ Rob rade, weeci yemeete, xaaxatti xaaxaysheh akko yaatuke gedda rade, kaa radnan lel naba tiya kuuk yine” akko yerhxe.

Yeesus reeza

²⁸ Yeesus ta waani abayshek sarrah, amaa mango xiyaw kaa aydarasalle cibrah raben.

²⁹ Amayim lel ten sercat dhiiceenit balih akkekkah, reeza le tiya balih yuydurusemhi sabbatah kinni.