Maatiyos 6 - Saaho Cusub Cahde

Baaxentah yaxaynim

¹ “Tenah tamballawna ciloh sin xaqqe kinam aki xiyawhi afalle abtaanamko zeelita, akke wayemko carshelle geytima sin Abbaako casbe taalloona maki.

² Amaydo, baaxentah wulim taxaye gedda, tamaa munaafiqhiin xiyaw ten cawatoona ciloh sunagoogit kee shawaaricille akah abaanaaka balih, thurumba ishi nifille maatakin. Usun sinni casbe geyeenih yaniinim rummah sinak arhxiyuk ane.

³ Baaxentah wulim taxaye gedda, ku mizgi gaba abak tanem, ku guri gaba aarhige waytoo,

⁴ amayim lel ku muttuxuwa suctodde takko ciloh kinni. Suctodde yable ku Abba lel koh yafdaw kinni.

Maddari salaat

⁵ Tassilliin gedda lel tamaa munaafiqhiin balih takkoona sinalle mitane. Amayim lel usun aki marah yamballawna ciloh sunagoogit kee shawaaricti ongololudde daw-yarhxiinih yassilliinim kixinoonimhi sabbatah kinni. Usun sinni casbe geyeenih yaniinim lel rummah sinah warisha.

⁶ Atu laakin tassilliye gedda, ishi buxtat caredde orobteh, caraf alifteyaako suctodde yane ku Abbah issillii. Suctodde yable ku Abba lel koh yafdaw kinni.

⁷ Aki-mari waani yaymangin gedda yamabbin sinne yakkaliinimhi sabbatah, tassilliin gedda tena balih gabbabbaacak foyya kin waani maymangina.

⁸ Sin Abba kaa esserekkahko sin farhshishsham yaarhigemhi sabbatah, tena balih makkina.

⁹ Amaydo atin taginah issilliya: Carshelle geytima ni Abbaw, ku migac yanqaddasoo.

¹⁰ Ku nigsinna tamaatoo, kum carshelle akah tekkeekah lel ku farhi baarholle takkoo.

¹¹ Lellecti ni folo kaafa noh uxuu,

¹² nanu cida adde lino maralle akah xabnaakah, ni cida nolle xab.

¹³ Uma tiyaako ni dhawurh kibah, cakanadde ni misayshin.

¹⁴ Atin ten umaani alle xabteenimko, carshelle geytima sin Abba yakkeedo sinalle xabo kinni.

¹⁵ Umam sinak abe maralle alle xabe wayteenimko laakin, sin Abba yakkeedo sinalle xabo maki.

Siyaam

¹⁶ Tasoomin gedda lel, tamaa munaafiqhiin balih nif micabbaroyshina, amayim lel usun xiyaw akah yabloona ciloh yasoomin gedda nif yasketeeteynimhi sabbatah kinni. Usun sinni casbe kabbaateenih yaniinim, rummah sinak arhxiyuk ane.

¹⁷ Laakin atu tasoome gedda, amo tussukuteh ishi nif cakalish,

¹⁸ amayim lel ku siyaam suctodde yane ku Abba kiyah aki xiyaw yabliinimko ciloh kinni. Suctodde yable ku Abba lel koh yafdaw kinni.

Gadda carshelle siraaxita

¹⁹ Sinni cukra unun kee cillo alle baktah, garaacen yagdiliinih adde orobanyaako alle garacan baarholle mattakhzanintaaki,

²⁰ unun kee cillo alle bakinnixe, garaacen lel yagdiliinih adde orobenyaako garacinnixon cukra carshelle ittikhizzina.

²¹ Amayim lel ku cukra alle tanelle, ku afcaado gantah tannaw kinamhi sabbatah kinni.

²² Inti nabsi faanus kinni. Amaydo, ku inti temcemko umbuka ku nabsi ifo yaallo kinni,

²³ Ku inti toomemko laakin, umbuka ku nabsi dattowo kinni. Amaydo, kottadde yane ifi dite yekkemko, amaa dite ayidhdha tasrawo kinni?

²⁴ Wuli tiya yincibeh wuli tiya akxine, wuli tiya yeynebeh wuli tiya ilaace kibah, lamma maddara yakhdumeti miyane. Yalla kee gadda takhdamoona mirhictaana.

Manshaaqhalina

²⁵ Amaydo anu sinak arhxiyuk ane, ayim bettoona kee ayim taacaboona kitiinimih, hido sinni nabseh ayim sarittoona kitiinimih manshaaqhalina. Aniina folooko minaba? Nabsi lel sartimko minaba?

²⁶ Ubula caranti kimbir: carshelle geytima sin Abba kinni ten yayteeleem kibah, usun miyazriini, miyaciyyiini, ilaw makhaazinodde lel miyakhziniini. Atin tenko ziyaada kin limo litin makiho?

²⁷ Miyatto kinni lel sinko yemsheeqheleh ishi cumredde inki saaca oso dhiicati?

²⁸ Sartim sabbatah lel ayimih kinni tamsheeqheliinim? Zibi combooba mixawalta, mitaarufe hanuk aaginah carsimtam ubula.

²⁹ Suleymaan gantah ishi nabneelih tenko inketta balih misaritinnam rummah sinak arhxiyuk ane.

³⁰ Ko imaan dagito! Yalli kaafa lee tane, beera lee otonudde cidditto le zibi cashsho akko sarishaya, sina amayimko ziyaada sarisho mirhiica?

³¹ Amaydo, ‘Ayim benno kino?’ hido ‘Ayim naacabo kino?’ hido ‘Ayim sarinno kino?’ terhxiinih manshaaqhalina.

³² Amayim lel, tayim inkoh Aki-mari wagiyaanam kinni. Carshelle geytima sin Abba lel tayim inkoh sin farhshishsham yaarhige.

³³ Erherhih Yallih nigsinna kee kaa xaqqe wagiya, tayim lel inkoh sinah ossimto kinni.

³⁴ Beeri isheh yanshaaqhalooki beerah manshaaqhalina. Lellec kaa waqhaaqhac kaa dhiica.”