Maatiyos 5 - Saaho Cusub Cahde

Aydaras koomalle

¹ Yeesus mango xiyaw yubleyaako koomalle yewceh defeye gedda, kaa katattaynit alle yemeetin.

Baraka

² Ishi af faakeh lel taginah ten yaydaraso erherhishe:

³ “Amnonobba hin mari, carshi nigsinna ten tiya kinamhi sabbatah baraka-lem kinon.

⁴ Aydukumusnan geyoona kinoonimhi sabbatah xazzanoytam baraka-lem kinon.

⁵ Baarho yawrashoona kinoonimhi sabbatah, sabre-lem baraka-lem kinon.

⁶ Xayitoona kinoonimhi sabbatah, xaqqeh safrittah bakhartam baraka-lem kinon.

⁷ Raxma geyoona kinoonimhi sabbatah raxma-lem baraka-lem kinon.

⁸ Yalla yabloona kinoonimhi sabbatah cado afcaado lem baraka-lem kinon.

⁹ Yallih cindhamah decsimoona kinoonimhi sabbatah salaam aba mari baraka-lem kinon.

¹⁰ Carshi nigsinna tenah kinamhi sabbatah xaqqeh arhxuk haddaanima mari baraka-lem kinon.

¹¹ Yottah arhxuk sinah waatimeenih sin hadaneenimko, umaaniiko takkanna zirabah sinak yerhxiinimko, atin baraka-lem kitin.

¹² Sinko basoohit nobowa gantah amaa ginah hadaneenimhi sabbatah, carshelle sin casbi naba tiya kinnik xedenteenih ifrixa.

Mulxu kee ifo

¹³ Atin caalamti mulxu kitin, laakin mulxu ishi dhacam teyleemko, tee muluuxa aaginah gaxta? Tamficemih walaa inkim male, ciddittam kee xiyaw ibah adde taacitem bisa kinni.

¹⁴ Atin caalamti ifo kitin. Koomakke tane daafo sucutto mirhicta.

¹⁵ Xiyaw lel faanus iffoyshaanah citrot geridde mihayaanaaki, wuli defeenakke hayan, caredde tanem lel inkoh iffoysha.

¹⁶ Amayim balih sin mece abittot yubliinih carshelle geytima sin Abbah nabne yaxawna ciloh, sin ifi xiyaw afalle iffowo.

Masiix Sercat yaskamalo yemeete

¹⁷ Anu Sercat hido Nobowat farto aylawo emeete makkalina; aylawo maki emeetemki, askamalo kinni.

¹⁸ Caran kee baarho talayendah, ummannim takmilendah, sercatko walaa cindhaa xarfi hido cindhaa dhimmiyo akko talawo makinam, rummah sinak arhxiyuk ane.

¹⁹ Amaydo, ta amritko walaa cindhaahikke baddaahisheti, aki mari lel amaa ginah aboona yuyduruseti, carshi nigsinnadde ummanimko cindha tiyah decsiimo kinni. Isheh abeyaako amayim aboona aki mara yuyduruseti laakin carshi nigsinnadde nabatiyah decsiimo kinni.

²⁰ Sin xaqqi sercat dhiiceenit kee Faarisiinko ziyaade wayemko carshi nigsinnadde caduruh orobtoona makitiinim sinah warisha.

Kura

²¹ Kalxit marak: ‘Magdafin, yigdifeti lel yamfarrado kinni’ akko yerhxiinim toobbiinih tanin.

²² Ishi sacallih kurrayinnanti yamfarrado alle tane, ishi sacalah waatiminnanti araballe yamaato alle tane, ‘Ko duudaw!’ arhxinnanti lel jahannabti giradde sawo alle tane.

²³ Amaydo, muttuxuwa mazbaxalle bahteh, ku sacal kok yissimingideh yanem lel amaa gedda xunsussemko,

²⁴ ishi muttuxuwa amaa mazbaxalle xabteh aduu. Tookomeh ishi sacallih wagarteh ishi muttuxuwa uxuu.

²⁵ Ishi qarimlih lel araxadde aniikoh wagar. Amayim lel, amaa ku qarim daaniyalle ku yasxayemko, amaa daaniya lel caskaralle, usun lel xabshedde ku hayaanamko kinni.

²⁶ Abayshimat santiim tafdiyendah lel caduruh tawco makitom, rummah kok arhxiyuk ane.

Sumsumo

²⁷ ‘Maznayin’ yarhxiinim lel toobbiinih tanin.

²⁸ Anu laakin, numadde duumeh kulux-yerhxeti ishi afcaadodde teelih mece geddaakoh yizniyeh yanem sinak arhxiyuk ane.

²⁹ Ku mizgi inti zambedde ku sayishshemko, teyyeeceh cid. Amayim lel umbuka ku nabsi jahannabadde cidditamko ku karimko inketta waytam tashshemhi sabbatah kinni.

³⁰ Ku mizgi gaba zambedde ku sayishshemko, igricaaki cid. Amayim lel umbuka ku nabsi jahannabadde cidditamko ku karimko inketta waytam tashshemhi sabbatah kinni.

Fittix

³¹ ‘Ishi numa aftixinnanti fittix warqat akah yaxaw’ yarhxiinim tane.

³² Anu laakin, uma-xibar hi sabbatah akke wayemko, ishi numa aftixinnanti, zaaniya akko aba. Xabonta marcishitinnanti lel zina aba sinak arhxe.

Dhiiwa

³³ Amayim balih kalxit marakke, ‘Akah dhiiwittem Maddarah ab kibah zirabah’ akko yerhxiinim toobbiinih tanin.

³⁴ Anu laakin, Yallih nugus-kurse kinamhi sabbatah carsheh,

³⁵ hido lel kaa ibih maacato kinamhi sabbatah baarhoh, hido lel naba Nugus hi daafo kinamhi sabbatah Yerusaalemih mirhiiwitina sinak arhxe.

³⁶ Inki dagarto caddoyishsho hido dattoyishsho mirhictamhi sabbatah ishi amoh gantah mirhiiwitin.

³⁷ Atu tarhxem, ‘Yoo, yoo’ hido ‘Maale, maale’ bisa yakko; tayimko fertem laakin uma tiyaako tamiite.

Xane

³⁸ ‘Inti intit idhdhah, iko lel ikot idhdhah’ yarhxiinim toobbiinih tanin.

³⁹ Anu laakin, umaanidde umaanih migarayna sinak arhxe. Laakin akkinnanti mizgi dhaban sinak dhabboonishemko, ootiya yakkeedo akah uxuwa.

⁴⁰ Qamish kok beyo ku yaksise tiyah, ishi natsala yakkeedo akah xab.

⁴¹ Inki kiilometer kee abrha tadawo ku xaylisha tiyaalih adooxa kiilometer eelih aduu.

⁴² Ku essera tiyah akah uxuu, kok yallakkaxo farha tiya lel mikalitin.

Sinni nacabtoolit ikxina

⁴³ ‘Ishi zoobatto ikxin, ishi nacabtoole lel incib’ yarhxiinim toobbiinih tanin.

⁴⁴ Anu laakin, ‘Sinni nacabtoolit ikxinantaaki, tamaa sin hadana marah dhaaco akah aba’ sinak arhxe.

⁴⁵ Amayim lel carshelle yane sin Abbah cindham takkoona ciloh kinni. Amayim lel usuk ishi ayrotta umam kee mecemille ziffoysha, rob lel xaqqi-wannun kee xaqqi-wannun akkinnixe marah yaxaye.

⁴⁶ Sin kixin mara takxinin gedda jazah ayim litiini? Miiri yaskattit gantah makini amayim abaanam?

⁴⁷ Sinni saculuk bisa salaam-tarhxiinimko, aki maraako mangumuh ayim abak taniini? Aki-mari gantah makini amayim balih abaanam?

⁴⁸ Carshelle geytima sin Abba kaamil akah kinniika balih atin lel kaamil takkoona sinalle tane.”