Maatiyos 3 - Saaho Cusub Cahde

Yaythimmiqhe Yohannis arax yasqirribe

¹ Amaa waqhtedde Yaythimmiqhe Yohannis yemeeteh, Yahuudiyaati zibolle warroyshak:

² “Carshi nigsinna kab-terhxeh tanemhi sabbatah otooba”, yerhxe.

³ “Zeeratiih dhaw zibolle yamabbe: ‘Maddarah arax akah isqirriba, kaa arax rig-ishanta’” arhxuk nabii Isayas adde waanishak yinem lel tatiya kinni.

⁴ Yohannis isheh lel gaalatti dagarko aben sareena kee qarbat ragad hashshiitak yine. Kaa macaasha lel cawayne kee zibi baska kuuk tine.

⁵ Yerusaalem kee umbuka Yahuudiyaati baarho kee Yordaanos wakali kayyalle yemeetin.

⁶ Sinni zambeh yeelemiinih lel Yordaanos nahaaradde kayyah anthimmiqhuk yinin.

⁷ Mango Faarisiin kee Tsadduuqhiim kaa anthammaqhalle amiituk yuble gedda: “Ko datali zarawo! Amiituk tane kuraako kuddoona mii sin asuuse?

⁸ Amaydo, toobah missil fire lem aba.

⁹ Sinnedde lel ‘Abraahim abbah lino’ tarhxoona maaxasabina. Yalli Abraahimih ta dhayitko cindham akah abo dhiicam sinah warisha.

¹⁰ Kado yakkeedo faas xorhti rimidille yinqirribeh yane. Amaydo, mece daro baahinnexe xarha tiggiriceh giradde gaxta.

¹¹ Anu toobah layeh sin aythimmiqhe, laakin yi sarralle amiituk yaneti, yottaako ziyaada xayla leya. Anu lel kaa kabelhi muqhucuh meeda. Usuk lel Quddus kin Ufaye kee girah sin yaythammaqho kinni.

¹² Kaa mase kaa gabadde tane, ishi cawda lel yatsrago kinni, sinraa lel ishi ilaw makhaazinodde yaskatto kinni. Xasar laakin badinnixe giradde xararisho kinni” yerhxe.

Yeesus anthammaq

¹³ Amayek sarrah, Yeesus Galiilaako Yordaanos fanah Yohannisille kayyah yanthammaqho yemeete.

¹⁴ Yohannis laakin: “Anu kottah anthimmiqhem yi farhshishshankah, atu yottalle tamiite?” yerhxeh kaa deese.

¹⁵ Yeesus laakin: “Umbuka xaqqe naskamalo noh eeddamhi sabbatah, kado takkooki xab” akko yerhxe. Amayek sarrah, usuk lel kaa xabe.

¹⁶ Yeesus yinthimmiqhek sarrah, akkanih layeko yewce gedda, taykinna lel carshit fakkite. Yallih Ufayi lel xamaama balih oobeh kayyalle amiituk yuble.

¹⁷ Taykinna lel, dhaw carsheeko: “Tati yinkixxine yi Barha kinni. Anu kaalih xedeneena kiyo” yerhxe.