Maatiyos 28 - Saaho Cusub Cahde

Rabaakohi ugut

¹ Kado, Sambatko sarrah, baxuurot afti lellecille maaxak, Magdalat Maryam kee aki Maryam amaa qabre yabloona yedeyin.

² Taykinna lel, Maddari malaykatti carsheeko oobeh yinemhi sabbatah, naba kirdidimo tekke, yemeeteh lel amaa duma yeydedebbeh bukakke akko defeye.

³ Kaa xibar lel xankarhah, kaa sartim lel barad balih caddummih higgiduk yine.

⁴ Amaa dhawrheenit lel kaa mashshih arharhenyaako rabtemih yimmingidin.

⁵ Amaa malaykatti laakin amaa sayyokke: “Masqalakke takarimeh yine Yeesus wagiyak taniinim eerhegeh aniyok, mimashshiitina.

⁶ Akah yerhxeekah rabaako ugutemhi sabbatah, usuk talle miyane. Amowa, usuk carhah alle yinekke ubula.

⁷ Sarrah, iba lacteenih aduwantaaki kaa katattaynitih, usuk rabaako ugutem akah warisha, taykinna lel, Galiila fanah sin afadde aduuk yane; amalle kaa tabloona kitin. Ubula, sinah warisheh aniyo” akko yerhxe.

⁸ Amaymih, usun amaa qabreeko gilix kee mango xedenlih yewciinih yerdinyaako kaa katattaynitih warishen.

⁹ Taykinna lel Yeesus ten geyeh: “Nagaa!” akko yerhxe. Usun lel kab-yerhxinyaako kaa iba yibbirhiinih akah yucbudin.

¹⁰ Sarrah Yeesus: “Mimashshiitina, aduwantaaki yi saculuh Galiilalle yadawna akah warisha, amalle lel yi yabloona kinon” akko yerhxe.

Dhawrheenitti ware

¹¹ Amaa sayyo aduuk, taykinna, amaa dhawrheenitko gari daafo fanah yedeynih, amaa sheekhat manabottitih tekkem inkoh akah warishen.

¹² Dikti naba maraalih yekettiinih zatteyeenimko sarrah, amaa caskarah mango fiddat solaadi akah yoxoynih:

¹³ “Ta xiyawah: ‘Kaa katattaynit nanu dhiinak bar yemeetiinih garacen’ terhxiinih akah warisha.

¹⁴ Tayim masxadaadari cokkak guftemko, nanu kaa nishshimineh gidcatko sin nayyaaco kino” akko yerhxin.

¹⁵ Amaymih amaa fiddat solaadi bishshiiteenih, usun akah ten yeemeriiniikah aben. Ta wari lel Yahuud fanadde faax-yerhxeh, kaafa fanah yane.

Naba farto

¹⁶ Kado amaa inikan kee taman katattayniya, Yeesus alle yadawna akah warishe Galiilaati koomalle yedeyin.

¹⁷ Kaa yublin gedda laakin akah yucbudin, gari laakin lammaa-garbiten.

¹⁸ Yeesus lel kab-yerhxeh: “Umbuka reeza carshe kee baarholle yoh tomxowweh tane.

^19-20 Amaydo, aduwantaaki, umbuka ummat, Abba, Barha kee Quddus kin Ufayih migacalle ten tiythimmiqhiinih, inkoh anu sin eemereh aniyom aboona ten uydurusantaaki katattaynit akko aba. Taykinna, anu lel ta waqhti abayshima fanah umman max sinlih aniyo” akko yerhxe.