Maatiyos 27 - Saaho Cusub Cahde

Yeesus Bilaatosulle baahen

¹ Baarho maxte gedda, umbuka sheekhat manabottit kee dikti naba mara Yeesus yagdafoona zatteyen.

² Yurhuynih kaa beyenyaako lel, amaa masxadaadara kin Bilaatosulle kaa baahen.

Yahuudaati raba

³ Sarrah, amaa kaa yosxoye Yahuuda, Yeesus rabih yimfirridem yuble gedda, yeththeeceseyaako, amaa fiddat solaadiiko soddom sheekhat manabottit kee dikti naba marah yedebbeh:

⁴ “Cagab hin biilo osxoyemih zambe abeh aniyo” yerhxe. Usun: “Nanu amaymidde macalah ayim lino? Isheh taarhige” akko yerhxin.

⁵ Amaa fiddat solaadih soddom macbadadde cideyaako, yewceyaako, yedeyeh ishe yisniqhe.

⁶ Sheekhat manabottit amaa fiddat solaadi beyeenih: “Mangar kinamhi sabbatah, maqhdas carih cukradde hayno arax maki” yerhxin.

⁷ Amaymih zatteyeenih amaa solaadiiko citror abatiyahi dhage, wuli gerhah qabaara takkeya dhaamen.

⁸ Amaydo, amaa dhage kaafa fanah “Biili Dhageh” decsiimak tane.

⁹ Amaa nabii Ermiyaas: “Israa-eel cindhamko gari akah kaa limmoyshen limo, fiddat solaadih soddom, beyeenih,

¹⁰ Maddari akah yi yeemereekah lel citror abatiyahi dhage akko dhaamen” arhxuk waanisheh yinem tikmile.

Yeesus Bilaatos nifille

¹¹ Kado, Yeesus masxadaadari nifille daw-yerhxe, amaa masxadaadari lel: “Atu Yahuud nugus kitoho?” yerhxeh kaa essere. Yeesus: “Atu gantah arhxituk tane” akko yerhxe.

¹² Amaa sheekhat manabottit kee dikti naba marah yinkissise gedda, inki radde maaxayinna.

¹³ Sarrah Bilaatos: “Ayidhdhale xaajah sabbatah kolle ashhiduk yaniinim aabbuk mitanito?” akko yerhxe.

¹⁴ Usuk laakin radde akah maaxayinna, walaa inki kissihim, amaymih amaa masxadaadari mangum yussuxuttute.

Amaa mango xiyaw Barabbaas dooran

¹⁵ Amaa masxadaadari lel wuli Faasigi cidille amaa xiyawah usun farhinnan inki maxbuushsha akah yayyaacem labcadah luuk yine.

¹⁶ Usun lel Barabbaas akko yarhxin mudhdhugto kin maxbuushsha luuk yinin.

¹⁷ Amaymih, usun yekettin gedda Bilaatos: “Miyatto sinah dhirhiyam yok fadhdhaana; Barabbaas, woole Masiix akko yarhxin Yeesusu?” akko yerhxe.

¹⁸ Amayim lel ashshiinoh kayyalle kaa yosxoynih yiniinim yeerhegemhi sabbatah kinni.

¹⁹ Amayimhi osah lel usuk daaniyat kurselle anuk, kaa numa: “Ta xiyawtih sabbatah bire soonoh umaatih dhiinemhi sabbatah, ta xaqqi-wanna kin xiyawtodde adde mirhagin” arhxuk farto alle dhirhiite.

²⁰ Sheekhat manabottit kee dikti naba mara, Barabbaas akah yawceekah, Yeesus lel akah rabaakah esserimoona amaa mango xiyaw yishshiminin.

²¹ Amaa masxadaadari malammih: “Ta lammaako awlih tiya sinah dhirhiyam yok fadhdhaana?” yerhxeh ten essere. Usun lel: “Barabbaas” yerhxin.

²² Bilaatos: “Ta Masiix akko yarhxin Yeesus ayim isho kinni?” akko yerhxe. Usun inkoh: “Masqalakke takarimoo!” yerhxin.

²³ Usuk lel: “Aymih? Ayimti umaani abeh yane?” yerhxe. Usun laakin inkoh ziyaada andhadhdhaxeenih: “Masqalakke takarimeh raboo!” yerhxin.

Bilaatos Yeesus masqalak takarimo yaxaye

²⁴ Amaymih, Bilaatos andhax kee dhawko ferteh inkim aksibuk miyanem yuble gedda, amaa xiyawhi nifille layeh gaba yodhdhooleh: “Anu ta xiyawtih biilooko barii kiyo, atin sinneh taarhigin” yerhxe.

²⁵ Amaa xiyaw lel inkoh: “Kaa biili notta kee ni cindhamhi bukalle yakkoo” yerhxiinih alle yedebbin.

²⁶ Sarrah Barabbaas akah dhirhiyeyaako, Yeesus yumuttukeh, masqalakke takarimeh rabo kaa yosxoye.

Yeesusulle alle yaasulin

²⁷ Sarrah amaa Bilaatosti caskar Yeesus amaa masxadaadari naba care fanah beyeenih, umbuka caskar filco kayyalle yeskettin.

²⁸ Sartim akko yislibiinih casa sareena alle hayenyaako,

²⁹ wuli inkidde sawalime keenanti bor amokke, shambuqqotta lel mizgi gabadde akko hayen. Kaa nifille gululluubuweenih lel: “Maaxiyo gee, ko Yahuud nuguso!” arhxuk alle tsaggarowak yinin.

³⁰ Thuf alle yerhxiinih, amaa shambuqqottah amo akko yootokin.

³¹ Alle tsaggarowak yiniinimko, amaa sareena akko yislibinyaako, kaa sara alle hayeenih, masqalakke takareenih kaa yagdafoona kaa beyen.

Masqalakkehi takarimnan

³² Usun awcuk lel wuli migacah Simcoon akko yarhxin Kureeneeti xiyawto geyen. Yeesus masqal yaaqhaco lel kaa xaylishen.

³³ Wuli Golgota akko yarhxin makaano (“Amot xanxantahi makaano” macnah leyalle) yemeetin gedda,

³⁴ cur-tarhxem adde tengele wayni yaacabo akah yoxoyin, usuk laakin akko dhacameh yaacabo xine.

³⁵ Masqalakke kaa takaren gedda, cija alle cidenyaako kaa sara sinne-sinneh xazziiliten.

³⁶ Sarrah amalle defeyeenih kaa dhawrhak yinin.

³⁷ Kaa amohi bukalle lel: “Tati Yeesus, Yahuud Nugus kinni” yarhxe kissi kutuub alle hayeenih yinin.

³⁸ Sarrah wuli lamma umam-abeena masqalakke kaalih takareenih yinin, tiya mizgaako, wuli tiya lel guraako.

³⁹ Agaagaako tillaabak yine mari akah waatimak kee amom qinqin-ishak,

⁴⁰ “Macbad dumusah adooxa lellecille malammih gina tiyak, ishi garger! Yallih Barha tekkemko, tamaa masqalko ob” arhxuk yinin.

⁴¹ Amayim balih sheekhat manabottit, sercat dhiiceenit kee dikti naba maraalih yekkiinih alle tsaggarowak:

⁴² “Aki xiyaw gargeere; ishe gargeero mirhiica. Israa-eel nugus kinnik lel, masqalko ooboo, nanu lel akah naamano kino.

⁴³ Usuk Yallih amaana kinni: ‘Anu Yallih Barha kiyo’ yerhxemhi sabbatah lel, kaa farhemko, kado Yalli kaa yayyaacooki xaba” arhxuk yinin.

⁴⁴ Kaalih masqalakke takarimeh yine umam-abeenit gantah amayim balih akah waatimak yinin.

Yeesus raba

⁴⁵ Taykinna lel lellecti abrhaako kasit saaca adox fanah baarho dite tekke.

⁴⁶ Sagal-tarhxe saacah lel Yeesus: “Eli Eli, lema shevaqtani” macnah: “Yi Rabbiyo, yi Rabbiyo, aymih yi xabte?” arhxuk wac-yerhxeh zeere.

⁴⁷ Amalle daw-yerhxeh yine mari lel yoobbiinih: “Ta xiyawti Eliyaasah deecimak yane” yerhxin.

⁴⁸ Tenko wuliti akkanih yerdeyaako wuli thuththa baaheh, cur-tarhxe wayniiko yemegeh, shambuqqottakke hayeh yaacabo akah yoxoye.

⁴⁹ Aki mari laakin: “Xab, Eliyaas yemeeteyaako kaa gargeero kinam kee nabloo” yerhxin.

⁵⁰ Yeesus lel malammih wac-yerhxeyaako zeereh, kaa wafa akko tewce.

⁵¹ Taykinna lel macbadti goleeni aganaako guba fanah lammalle candhiirhe. Baarho xumuu-terhxe, qooqhaaxi lel liffacte.

⁵² Qabaara gantah lel fakkitte. Rabteh tine mango yinqiddise marih rashshit lel rabaako uguteenih,

⁵³ rabaakohi kaa ugutko sarrah qabaaraako yewciinih, amaa qiddisti kin daafo fanah yedeynih mango marah yumbulluwin.

⁵⁴ Amaa bool caskartiyah manabotta kee kaalih tekkeh Yeesus dhawrhak tineya, amaa baarhot kirdidimo kee tekkem yublinyaako, mangum mashshiiteenih: “Rummah tati Yallih Barha kuuk yine” yerhxin.

⁵⁵ Amalle lel Yeesus akhdumuk, Galiilaako erherhisheenih kaa katattayte mango sayyo, waacinaako abluk yinin.

⁵⁶ Tenlih lel Magdalat Maryam, Yacqoob kee Yoosuf ina kin Maryam kee Zibdit cindhamhi ina yinin.

Yeesus Macaga

⁵⁷ Baarho dhumte gedda, wuli Yoosuf akko yarhxin gaddaale kin xiyawti, Yeesus katattayna gantah kuuk yineya, Arimatayaako yemeete.

⁵⁸ Usuk Bilaatosulle yemeeteh Yeesus rashsha kaa essere. Sarrah Bilaatos akah yamxawo ten yeemere.

⁵⁹ Yoosuf amaa rashsha beyeh qarce-le dabalaan maknazadde yiknizeh,

⁶⁰ qooqhaxadde faraaceh yine cusub ishi qabredde yoocoge. Naba duma amaa qabrih carafadde akko alifeh lel yedee.

⁶¹ Magdalat Maryam kee aki Maryam lel amalle, qabri waacinakke defeyak yinin.

Dhawrhelle qabrelle

⁶² Malammit max, Anqaraarabti lellecko sarrah, sheekhat manabottit kee Faarisiin yekettiinih Bilaatosulle yemeetinyaako:

⁶³ “Maddara, tamaa doolabeeni rabekkah anuk: ‘Adooxa lellecik sarrah rabaako uguto kiyo’ arhxuk yineya nizzikkire.

⁶⁴ Amaymih, kaa katattaynit yedeynih garciitenyaako, xiyawak: ‘Rabaako ugute’ yarhxiinih tamaa afti doolabko sarrah doolab yaczubemko, maddaxit lellec fanah amaa qabre qath-isheenih dhawrhoona ten eemer” akko yerhxin.

⁶⁵ Bilaatos: “Dawrheena beyanta. Sinneh akah dhiicinnan ginah lel qath-ishanta” akko yerhxe.

⁶⁶ Usun lel yedeynih, amaa qabrih duma maxtamah yuxtumiinih, amaa qabrelle dhawrheena alle hayeenih qath-ishen.