Maatiyos 26 - Saaho Cusub Cahde

Yeesus gidfohi xagara

¹ Yeesus ta waani inkoh yerhxeh abayshe gedda, ishi katattaynitik:

² “Lamma lellecik sarrah Faasigi yakko kinam taarhigin, Xiyawti Barha lel masqalakke takarimo kaa yasxawna kinon” akko yerhxe.

³ Sheekhat manabottit kee dikti naba mara, Kayaafas akko yarhxin naba shekhti kanshellolle yekettiinih,

⁴ Yeesus siixoh kaa yibbirhiinih kaa yagdafoona inkidde zatteyen.

⁵ “Xiyaw fanadde andhax kee dhaw yakkek, cidti geddadde yakko alle mitane” lel yerhxin.

Yeesus Beetcaniyalle yamsukkute

⁶ Kado, Yeesus Beetcaniyalle sakna-le Simcoon caredde anuk,

⁷ wuli numa qaali kin cithir-le zeet alabaastiros akko yarhxin dhayittooko siraaximte tharmuuzudde bahteh alle temeeteyaako, usuk thawlalle defeyeh beetak anuk amolle akko xadhdhe.

⁸ Katattaynit tayim yublin gedda, kurraynih: “Ta abazzar aymih kinni?

⁹ Amayim lel tayim mango solaadih yimibbixeh baaxentitih yamxawo dhiice dhaarhemhi sabbatah” yerhxin.

¹⁰ Yeesus laakin tayim yeerhegeyaako: “Ta numa yottah mecem abtemhi sabbatah aymih tee tayribbishiini?

¹¹ Amayim lel, baaxentit umman gedda litin, yotta laakin umman gedda taalloona makitiinimhi sabbatah kinni.

¹² Ta cithir-le zeet yi nabselle xadhdhem, yi macagah terhxeh abtem kinni.

¹³ Ta Meci Wari umbuka caalamko alle warroyinnanille, ta numa abteh tanem, tee mazakkartah xussuumo kinam, rummah sinak arhxiyuk ane” akko yerhxe.

Yahuuda Yeesus yasxaw abaysha

¹⁴ Sarrah amaa lamman kee tamanko wuliti, Iskariyoot Yahuuda akko yarhxinya, sheekhat manabottitille yedeeyaako:

¹⁵ “Kayya sinalle osxoyemko ayim yoh taxawna kitiini?” akko yerhxe. Usun lel fiddat solaadiiko soddom akah yoxoyin.

¹⁶ Amaa geddaako sarrah lel kayya akah yasxaye caashir wagiyak yine.

Faasiga katattaynitlih

¹⁷ Kado, Cadublat Xabazahi cidko erherh lellecidde katattaynit Yeesusulle yemeetiinih: “Faasigi dirar betto awla koh nasqirribem nok fadhdha?” akko yerhxin.

¹⁸ Usuk: “Daafo fanah aduwantaaki wuli xiyawtok: ‘Yi waqhti gufeh yane. Faasiga inni katattaynitlih ku carelle abo kiyo yerhxe Mudarris’ akko erhexa” yerhxe.

¹⁹ Amaa katattaynit lel Yeesus akah ten yeemereekah abeenih, Faasigi dirar yisqirribin.

²⁰ Baarho dhumte gedda, amaa lamman kee tamanlih thawlalle cikkishiteh beete.

²¹ Usun beetak lel: “Sinko wuliti yi yasxaw kinam, rummah sinak arhxiyuk ane” yerhxe.

²² Usun mangum yixziniinih laklakalle: “Yotta kinniho, Maddara?” yarhxoona erherhishen.

²³ Usuk: “Tamaa tsaxladde ishi gaba yottaalih tekerisheti yi yasxaw kinni.

²⁴ Xiyawti Barhi tamaa kaa sabbatah akah tunkuttubeekah yadiye, kaa sabbatah Xiyawti Barhi akko yandhibbirheti laakin kaa careyta! Ta xiyawti aabuke wayeh yakkeedo akah ashshe dhadhdhe” yerhxeh alle yedebbe.

²⁵ Yahuuda, tamaa kaa yasxaw leya: “Yotta kinniho, Mudarris?” yerhxeh alle yedebbe. Usuk: “Terhxeh tanito” akko yerhxe.

Maddari dirar

²⁶ Kado, usun beetak, Yeesus kinnas yibbirheh, dhaaco alle abeyaako yigdileh katattaynitih yoxoyeh: “Hina, beta, tati yi nabse kinni” akko yerhxe.

²⁷ Usuk wuli kobbaayatto yibbirheh, cawwatoyshitek sarrah, tenah yoxoyeh: “Akko ucuba, inkoh,

²⁸ amayim lel tayim zambi xabbotuh mango marah arhxuk xarhite yi biilo cahdiya kinamhi sabbatah kinni.

²⁹ Taymik sarrah, aykee amaa lellec, yi Abbah nigsinnadde sinlih malammih aacubendah, ta cinab darohimko aacabo makiyom sinak arhxiyuk ane” akko yerhxe.

Bithroos xinnan Yeesus yaakumeh warisha

³⁰ Wuli faylat mazmuur abeenimko sarrah lel, Oolac Koomalle yewcin.

³¹ Sarrah Yeesus: “‘Anu loyna aatako kiyo, ciido lel faax-tarhxo kinni’ yarhxiinim tunkuttubeh tanemhi sabbatah, kabar inkoh yi xinteenih yi xabtoona kitin.

³² Rabaako ugutamko sarrah laakin, sinko basolle Galiila fanah adaw kiyo” akko yerhxe.

³³ Bithroos: “Usun walaa inkoh ku xineenih ku xaboona kibah, anu caduruh ku xineh ku xabo makiyo” akko yerhxe.

³⁴ Yeesus: “Kabaradde, dor-hotti andhaxamko basolle, adooxa gedda yi xinto kitom, rummah kok arhxiyuk ane” akko yerhxe.

³⁵ Bithroos: “Walaa kottaalih rabemih, ku xino makiyo” akko yerhxe. Katattaynit lel inkoh amayim balih yerhxin.

Yeesus Gat-shemaanelle yassilliye

³⁶ Sarrah Yeesus wuli Gat-shemaane akko yarhxin cara fanah tenlih yedeeyaako: “Anu toohille edeeh assilliyendah, talle defeya” akko yerhxe.

³⁷ Bithroos kee Zibdit cindhamhi lamma isheelih beyeh, yaxzano kee yamraacado erherhishe.

³⁸ Sarrah: “Yi rooxi mangum xazzanoyeh yanek, walaa rabi fanah talle sugantaaki, yottaalih macalsita” akko yerhxe.

³⁹ Dagum tenko mirixtah yedeeyaako, kumeyaako yissilliyeh: “Abba, dhiicimtemko, ta kobbaaya yok tillaabish, yakko kibah, anu akah farhaakah makiiki, atu akah fadhdhaakah takkoo” yerhxe.

⁴⁰ Katattaynitille yemeete gedda lel dhiinak ten geye. Bithroosuk lel: “Inki saaca walaa yottaalih macalsitto mirhicta?

⁴¹ Cakanadde orobtanki, himma-abitteenih issilliya. Ufayi rummah farhak yane, xazo laakin tante” akko yerhxe.

⁴² Malammit gedda lel yedeyeh yissilliyeh: “Ta kobbaaya anu aacubekkah tillabto mirhiicimtah yekkemko, ku farhi takkoo” yerhxe.

⁴³ Malammih gaxe gedda, intit alle yiclishemhi sabbatah dhiinak ten geye.

⁴⁴ Amaymih, ten xabeh yedeeyaako, awwal waani gabbaaceh maddaxih yissilliye.

⁴⁵ Sarrah amaa katattaynitille yemeeteh: “Kaddih dhinteenih acrufuk taniini? Ubula, Xiyawti Barhi zambi wannunhi gabadde adde yamxaye saaca gufteh tane.

⁴⁶ Kata, uguta nadawok, ubula, amaa yi yasxaw leti lel kab-yerhxeh yane” akko yerhxe.

Yeesus yomxoyeh yumudhdhuwe

⁴⁷ Usuk kaddih waanishak anuk, amaa lamman kee tamanko kin Yahuuda yemeete, kaalih mango xiyaw seefa kee gomaadi tibbirheya yinin. Usun lel sheekhat manabottit kee naba maraako farritime mara kuuk yinin.

⁴⁸ Amaa yasxayeti lel: “Ta anu fuguto liyoti amaa xiyawto kinni, ibbirha” yerhxeh tuumar akah yoxoyeh yine.

⁴⁹ Akkanih Yeesusulle yemeeteh lel: “Mudarris, nagaa!” yerhxeh kaa fugute.

⁵⁰ Yeesus: “Carke, akah temeetem ab” akko yerhxe. Usun lel yemeetiinih gabub alle hayenyaako kaa yibbirhin.

⁵¹ Taykinna lel, Yeesuslih yine maraako wuliti, gaba yiyfiddigeyaako, sef hiriigeh, amaa naba shekhti garuzzok akko yootokeyaako cokka akko yigrice.

⁵² Sarrah Yeesus: “Sef yatneefece mari amaa sefih yalawna kinoonimhi sabbatah, sef kaa caradde edebba.

⁵³ Anu inni abba dhaacimeyaako, usuk lel akkanih malaykutti maxaarhooko lamman kee tamanko ziyaada yoh faro mirhiica takkale?

⁵⁴ Tayim takko alle tane yarhxe Kutuub aaginah yakmalo alle tane?” akko yerhxe.

⁵⁵ Amaa saacadde Yeesus amaa mango xiyawak: “Wuli shiftatto yabbarho le mara balih seefa kee gomaadiilih yotta tabbarhoona temeetiini? Maaxi yamaato maqhdas caredde defeyeyaako aydurusuk iniyo gedda, yi mabbarhitiini.

⁵⁶ Tayim inkoh tekkem lel, nobowat Kutuub yakmalo ciloh tekkem kinni” akko yerhxe. Sarrah, katattaynit inkoh kaa xabenyaako kuden.

Yeesus Kayaafas kee araballe kab-yarhxe

⁵⁷ Amaa Yeesus yibbirheh yine mari lel amaa sercat dhiiceenit kee dikti naba mari alle yininille, naba shekh kin Kayaafas fanah kaa beyen.

⁵⁸ Bithroos lel mirixtaako naba shekhti kanshello fanah kaa katattayeh, akkuk tinemhi abayshima yablo, addadde orobeyaako amaa dhawrheenitlih defeye.

⁵⁹ Sheekhat manabottit kee umbuka araba lel kaa yagdafoona ciloh, Yeesusulle zirabti shaahid wagiyak yinin,

⁶⁰ mango zirabti shohoda kab-yerhxin hanuk, laakin inkim migeyinnooni. Abayshimalle wuli lamma yemeetiinih:

⁶¹ “Ta xiyawti: ‘Yallih macbad dumuseyaako, malammih adooxa lellecille siraaxo dhiica’ yerhxe” yerhxin.

⁶² Amaa naba shekh uguteyaako: “Taxaye radde malito? Ta xiyaw kolle ashhiduk yaniinim ayim kinni?” akko yerhxe.

⁶³ Yeesus laakin miwaanishinna. Naba shekh lel: “Atu Masiix, yane Yallih Barha tekkemko noh warishsho ku agizziziyuk ane” akko yerhxe.

⁶⁴ Yeesus: “Atu isheh terhxeh tanito. Taymik sarrah laakin, Xiyawti Barhi Xayla-le Yallahi mizgi gabooko defeyak kee carsheeko darurudde amiituk tabloona kitiinim, sinak arhxiyuk ane” akko yerhxe.

⁶⁵ Sarrah naba shekh ishi sara candhisheyaako: “Yallah waatimeh yane. Tayimko ferteh ayimti shohoda fandhe? Kaa waato toobbiinih tanin.

⁶⁶ Sin firdi aymotta kinni?” yerhxe. Usun lel: “Rabo akah eedda” yerhxiinih alle yedebbin.

^67-68 Sarrah nifille thuf akko yerhxiinih, akko yootokin. Gari lel: “Irhig iski ko Masiixo! Miyatti kok aatukuk yane?” arhxuk akko dhabboonishen.

Bithroos Yeesus xina

⁶⁹ Kado, Bithroos irot kanshellolle defeyak yine. Wuli garuzzö temeeteh lel: “Atu lel Galiilaati Yeesuslih tinito” akko terhxe.

⁷⁰ Usuk laakin: “Ayim arhxituk tanem maarhige” arhxuk umbuka tenhi nifille aluu-yerhxe.

⁷¹ Irot carafalle yewce gedda, aki garuzzö kaa tubleh, amalle yine marak: “Ta xiyawti Naazret Yeesuslih yine” akko terhxe.

⁷² Usuk lel malammih dhiiwiteyaako aluu-yerhxeh: “Ta xiyawto maarhige” yerhxe.

⁷³ Dago waqhtek sarrah, amalle yine mari Bithroosulle alle yemeetiinih: “Thummutuh atu gantah tenko tiya kito, ku lata ku ayfiddixuk tane” akko yerhxin.

⁷⁴ Sarrah ishe abaaro kee dhiiwito erherhisheh: “Ta xiyawto maarhige” yerhxe. Akkanih lel dor-hotti andhaxe.

⁷⁵ Bithroos lel tamaa Yeesus: “Dor-hotti andhaxekkah adooxa gedda yi xinto kito” akko yerhxe waani yizzikkire. Irolle yewceh lel dhacumaatih weece.