Maatiyos 25 - Saaho Cusub Cahde

Dhaggitinnixe tamana barhah aymassal

¹ “Carshi nigsinna, dhaggitinnexe tamana barhä marcawwih garawna sinni fawaanislih tewceyah higgida.

² Tenko koon duudit, koon lel kas-lem kuuk yinin.

³ Koona duuda sinni fawaanislih zeet mibeyinnooni,

⁴ amaa kas-lem laakin sinni fawaanislih zeet nuwattadde bishshiiten.

⁵ Marcawwi akko caawiteyaako inkoh cunduguleenih dhiinen.

⁶ Barti abrha tekke gedda: ‘Taykinna marcawwi yemeetek akah garaytoonak eweca’ tarhxe deeco tekke.

⁷ Sarrah amaa dhaggitinnexe sayto inkoh uguteenih sinni fawaanis yisqirribin.

⁸ Amaa duudit kas-le marak: ‘Ni fawaanis nok bado lek, sinni zeetko dagum noh uxuwa’ akko yerhxin.

⁹ Amaa kas-le mari lel: ‘Notta kee sina mirhiicaaki, tamaa yaabixe mara fanah tedeynih sinnim dhaamita’ arhxuk alle yedebbin.

¹⁰ Usun dhaamoona aduuk lel amaa marcawwi yemeeteyaako, amaa tinqirribeh tinem reedodde kaalih orobeenih lel amaa caraf alfiime.

¹¹ Sarrah aki dhaggitinnexe sayto: ‘Maddara, maddara, noh fak’ arhxuk yemeetin.

¹² Usuk laakin: ‘Rummah sinak arhxiyuk ane, sin maarhige’ akko yerhxe.

¹³ Amaydo, yi mumut hi lellec hido saaca mitaarhigiinimhi sabbatah himma-abita.

Talanton aymassal

¹⁴ Carshi nigsinna, wuli kallaaxeyaako ishi khaddamteh deecimeh, ishi iraaro alle amaanatishe xiyawtoh higgida.

¹⁵ Wuli tiyah koona talantoon, wuli tiyah lamma, wuli tiyah inketta, inkoh ten ten dhic balih akah yoxoye. Sarrah lel yedee.

¹⁶ Amaa koona talantoon luuk yineti akkanih yedeeyaako yiybicshireh koona talantoon ziyaada yiksibe.

¹⁷ Amaa lamma talantoon luuk yineti lel amayim balih lamma talantoon yiksibe.

¹⁸ Amaa inki talantoon kabbaateti laakin yedeeyaako baarho faraaceh ishi maddarih fiddat solaadi amadde sucuse.

¹⁹ Dherh geddaako sarrah lel taykinna amaa garuuzahi maddari yemeeteyaako xisaab tenlih abe.

²⁰ Amaa koona talantoon kabbaateh yineti lel ziyaadah koona talantoon baaheh: ‘Maddara, koona talantoon yolle xabteh tinito, anu lel kasbeh koona talantoon adde oseh aniyo’ arhxuk kab alle yerhxe.

²¹ Kaa maddari: ‘Mecem abte, mece tiya kee umun kin garuzzo kito. Dagumulle umun tekkeh tanito, anu lel mangumhi tiya kok abo kiyo. Ishi maddarih xedenidde orob’ akko yerhxe.

²² Amaa lamma talantoon luuk yineti lel: ‘Maddara, lamma talantoon yolle xabteh tinito, anu lel kasbeh lamma talantoon adde oseh aniyo’ arhxuk kab alle yerhxe.

²³ Kaa maddari: ‘Mecem abte, mece tiya kee umun kin garuzzo kito. Dagumulle umun tekkeh tanito, anu lel mangumhi tiya kok abo kiyo. Ishi maddarih xedenidde orob’ akko yerhxe.

²⁴ Amaa inki talantoon kabbaateh yineti lel: ‘Maddara, azriinnixitom orbishsha, faax-ishinnixito zara lel yaskatte dhacuma xiyawto kitom aarhige,

²⁵ amaymih mashshiiteyaako, edeeh ku talantoon baarhodde sucuseh aniyo. Kado lel kum taykinna’ arhxuk kab alle yerhxe.

²⁶ Kaa maddari laakin: Ko uma buhus kin garuzzo! Anu azriinnixiyom orbisham kee faax-ishinnixiyo zara askattem teerhege?

²⁷ Yi fiddat solaadi bankadde oobishsho kolle tine, amiite gedda lel innim dhalaalih bishshiite dhaarhe.

²⁸ Amaydo, amaa talantoon akko beyteenih tamana talantoon le tiyah uxuwa.

²⁹ Amayim lel le tiyah ziyaada akah ossimteyaako manginatah yaallo, hin tiyaako laakin amaa luuk yinem gantah akko tadawo kinamhi sabbatah kinni.

³⁰ Ta makko hin garuzzo lel irot ditelle cida. Amadde lel weeca kee ikokti xarqam yakko kinni.

Abayshimat firde

³¹ Xiyawti Barhi inkoh malaykutlih ishi nabnedde yamiite gedda, sarrah ishi nabne le nugus-kurselle defeyo kinni.

³² Umbuka wathun kaalle yekettiinih lel tamaa loyni alaako ciido akah barhishaaka balih xiyaw sittaako barhisho kinni.

³³ Ciido ishi mizgaako, ala laakin ishi guraako hayo kinni.

³⁴ Sarrah amaa Nugus kaa mizgaako yane marak: ‘Ko yi Abbah dhaacolito, amowa, ta caalam dhishshimtemko taahe sinah tinqirribe nigsinna iwrisha.

³⁵ Amayim lel, anu safriiteh aniyuk yi bettishshen, bakhaareh aniyuk yi teefecin, gerhenta kiyuk yi kabbatten,

³⁶ carrazeh aniyuk yi sarishshen, laxuuteh aniyuk yi alcaafishshen, xabshedde aniyuk yi gufteenimhi sabbatah kinni’ akko yarhxo kinni.

³⁷ Sarrah xaqqi-wannun: ‘Maddara, safritteh ku nubleh ku bettishnem, hido bakharteh ku neefecem manda kinni?

³⁸ Gerhenta tekkeh ku kabbatnem, carrazzeh lel ku sarishnem manda kinni?

³⁹ Laxutteh, hido timxibbisheh ku nubleh ku gufnem manda kinni?’ arhxuk alle yadabboona kinon.

⁴⁰ Amaa Nugus lel: ‘Ta cindha yi saculko inkettak abteenim, yottak abteenim balih kinam rummah sinak arhxiyuk ane’ yerhxeh alle yadabbo kinni.

⁴¹ Guri gabooko yane marak lel: ‘Ko abaarolito, tamaa ibliis kee kaa malaykutuh tinqirribeh tane umman geedit gira fanah yok aduwa.

⁴² Amayim lel anu safriiteh anuk folo yoh maaxayinnitiini, bakhaareh lel yi maafacitiini.

⁴³ Gerhenta kiyuk yi mikabbaatitiini, carrazeh aniyuk yi misarishitiini, laxuute gedda kee xabshedde aniyuk yi migufitiini’ akko yarhxo kinamhi sabbatah kinni.

⁴⁴ Sarrah usun: ‘Maddara, manda kinni safritteh hido bakhaaritteh hido gerhenta tekkeh hido carrazzeh hido laxutteh hido lel xabshedde ku nubleyaako ku akhdume waynem?’ arhxuk alle yadabboona kinon.

⁴⁵ Usuk lel: ‘Ta cindhadhdhaa maraako inkettah abinnixitiinim, yottah abe wayteenim balih kinam rummah sinak arhxiyuk ane’ arhxuk alle yadabbo kinni.

⁴⁶ Amaydo, usun umman geedit cazaab fanah, xaqqi-wannun laakin umman geedit aniina fanah yadawna kinon.”