Maatiyos 24 - Saaho Cusub Cahde

Yeesus maqhdas carih dumnan yaakumeh warisha

¹ Yeesus amaa maqhdas careeko yewceh aduuk, kaa katattaynit maqhdas carih makun kaa yuybulluyin.

² Usuk laakin: “Tayim inkoh abluk tanin makiho? Taymidde inki dhayi cidditekkah raaco leya adde miyanem rummah sinak arhxiyuk ane” akko yerhxe.

Zaban abayshimah tuumar

³ Usuk Oolac koomalle defeyak, katattaynit sinni ulah: “Iski noh warish, tayim takko lem manda kinni? Ku mumut kee ta zabanhi abayshimah tuumar ayim yakko kinni?” arhxuk alle yemeetin.

⁴ Yeesus lel: “Akkinnanti sin doolabak selita.

⁵ Amayim lel: ‘Anu Masiix kiyo’ arhxuk yi migacalle mango mari yemeetiinih, mango mara doolaboona kinoonimhi sabbatah kinni.

⁶ Dhiba kee dhibat ware lel taabboona kitin. Tayim takko alle tanemhi sabbatah, selita, mibirriigina, abayshima laakin amaa gedda maki.

⁷ Wathan wathanti diddeh, nigsinna nigsinnat diddeh uguto kinni. Mango baarholle lel kirdidimom kee culul yakko kinni.

⁸ Tayim lel inkoh amaa waaxelti ubkahi erherh kinon.

⁹ Amaa geddadde, cazaabah tillaabisheenih sin yasxawna kee sin yagdafoona, amayim balih Yi migac hi sabbatah umman wathunuh tamnaccaboona kitin.

¹⁰ Mango mari lel gaba yaxawna kinon, sittiya yosxoynih lel sittiya yancaboona kinon.

¹¹ Mango zirabti nobowa ugutoona kee mango mara doolaboona kinon.

¹² Sercat-maliini yammango kinamhi sabbatah lel mango marih kaxani daggowo kinni.

¹³ Abayshima fanah curinnanti lel gargeerimo kinni.

¹⁴ Umbuka xiyawah shaahid yakko ciloh ta nigsinnat Mece Wari umman caalamalle warreyo kinni, amaymik sarrah abayshima tamaato kinni.

Naba cazaab waqhte

¹⁵ Nabii Daaniyeel yerhxeh yine ‘batakna kin cayne’ quddus kin makaanolle tablin gedda (tamaa yaqhriyeti macalsiito),

¹⁶ sarrah, amaa Yahuudiyalle yane mari koomamalle kudoona.

¹⁷ Cari amok sugeti kaa caredde tanem bahito oobe wayo,

¹⁸ dhagelle sugeti lel ishi sareena bahito caazalle gaxe wayo.

¹⁹ Amaa maxadde soono kee dhoyishsha sayyo lel ten careyta!

²⁰ Sin kudi dhamxin waqhtedde, hido lel Sambatah yakkemko dhaaco abita.

²¹ Amayim lel caalam erhedhdhemko kado fanah akkinnixem, tayek sarrah gantah caduruh akke wayo le cazaab waqhte yakko kinamhi sabbatah kinni.

²² Amaa max adhdhurhe wayaado, walaa inki xiyawti raaceh anniye mirhaarho. Amaa doorimeh yane marah arhxuk laakin amaa max yadhdharho kinni.

²³ Amaydo, akkinnanti, ‘Ubula, Masiix talle yane!’ hido ‘Toohille yane!’ sinak yerhxemko maamanina.

²⁴ Amayim lel zirabti masiixiin kee zirabti nobowa uguteenih, dhiicimemko, amaa Yalli doore mara gantah doolaboona ciloh naba ishaarar kee bexsishsham aboona kinon.

²⁵ Taykinna, ookomeh sinah warisheh aniyo.

²⁶ Amaydo: ‘Ubula, barakalle yane’ sinak yerhxiinimko, mawcina. ‘Addat caredde yane’ sinak yerhxiinimko, lel maamanina.

²⁷ Amayim lel ayrommaaxaako yamiite xankarhi ayrodhdhuma fanah akah ifishaaka balih kinni Xiyawti Barhih mumut yakko lem.

²⁸ Batki alle yanelle guuma takatte.

Xiyawti Barhih mumut

²⁹ Amaa maaxit cazaabko sarrah ayrotta akkanih dattoyto kinni, alsi lel ishi ifo yaxaw maki, xutuk caranko rado kinni, carshitti xaylit lel qinqin-yarhxo kinni.

³⁰ Sarrah, Xiyawti barhih tuumar carshelle yamballawo kinni, umbuka baarhot kishosh yaxzanoona kinon, Xiyawti Barhi lel caranti darurudde xayla kee naba nabneelih amiituk yabloona kinon.

³¹ Usuk ishi malaykut naba thurumbat dhaw faro kinni, doorimte kaa mara lel carshi wuli wasanko wuli wasan fanah affara jahaako yaskattoona kinon.

Indacartooko nadrusem

³² Misaal indacartooko udrusa: tee xakuk silayaako ishi dharhaa yayyaace gedda, karma kab-terhxeh tanem taarhigin.

³³ Amayim balih lel, atin inkoh tayim tablin gedda, usuk kab-yerhxeh yanem kee caraf af gufeh yanem taarhigin.

³⁴ Tayim inkoh takkendah, ta ijo tillabto makinam rummah sinak arhxiyuk ane.

³⁵ Caran kee baarho inkoh tillaaboona kinon, yi waani laakin tillabto maki.

Max kee saaca yaarhigeti miyane

³⁶ Amaa lellec kee saaca laakin Abbaako bextih, walaa Barha, walaa carshi malaykut gantah, yaarhigeti miyane.

³⁷ Xiyawti Barhih mumut, Nuux waqhtedde akah tekkeekah yakko kinni.

³⁸ Cilish weecaako basolle aykee Nuux naba doonikidde orobandah, beetak kee aacubuk yinin, amayim balih marcishitak kee marcishimak yiniinimko,

³⁹ cilish weeci yemeeteh inkoh ten beyandah akah aarhige wayeniikah, Xiyawti Barhih mumut lel amaa gina yakko kinni.

⁴⁰ Sarrah wuli dhagelle yane lamma xiyawtooko wuli tiya akko beyan gedda, wuliti amalle raaco kinni.

⁴¹ Wuli lamma numa marhxanalle yarhxininyaako, wulitiyä akko beyan gedda, wulitiyä amalle racto kinni.

⁴² Amaydo, sin Maddari adde amiituk yane lellec mitaarhigiinimhi sabbatah, himma-abita.

⁴³ Laakin tayim irhiga, cari-manabotti barti gazalle garceeni awlih saacadde yamaato lem yeerhegeh yineh yakkeedo, himmaalih suge dhaarhe, kaa caredde yigdiliinih oroboona lel xabe mirhaarho.

⁴⁴ Amaydo, Xiyawti Barhi atin adde ilaalinnixitin saacadde amiituk yanemhi sabbatah, tinqirribiinih suganta.

⁴⁵ Waqhte waqhteh folo akah yaxaw ciloh, kaa manabotti ishi xawazhi baclaysheena akko abe, umun kee kas-le garuzzi miyatto kinni?

⁴⁶ Kaa manabotti yamiite gedda, tayim abak akah suge garuzzi baraka-letiya kinni.

⁴⁷ Usuk lel umbuka ishi iraaroh baclaysheena akko abo kinam rummah sinak arhxiyuk ane.

⁴⁸ Amaa uma garuzzi: ‘Yi manabotti caawito kinni’ yarhxeyaako,

⁴⁹ kaa zooba kin garuuza yaatako erherhishah, sakraaniinlih lel beetah yaacube.

⁵⁰ Amaa garuzzohi manabotti usuk adde kaa ilaalinnixe lellec kee usuk aarhiginnixe saacadde yemeeteh,

⁵¹ dhacumaatih kaa yiqhtsiceyaako munaafiqhiinlih kaa hayo kinni. Amaa caralle lel weeca kee ikokti xarqam yannaw kinni” akko yerhxe.