Maatiyos 22 - Saaho Cusub Cahde

Marcat aymassal

¹ Yeesus lel malammih tahe arhxuk aymassalah aalih waanishe:

² “Carshi nigsinna wuli nugus ishi barhah marca abeyah higgida,

³ usuk amaa marcah yimciddime marah deecimoona ishi garuuza fare, usun laakin yamaatoona mifarhinnooni.

⁴ Malammih: ‘Amaa yimciddimeh yane marak: “Taykinna, dirar isqirribeh aniyo, yi becar kee kulus laa yumruxxudeh yane, ummanna lel tinqirribeh tane. Marcah amowa” akko erhexa’ yerhxeh aki ishi garuuza fare.

⁵ Usun laakin macalah adde mirabinnooni, gari sinni dhageg fanah, gari lel sinni bicishra fanah yedeyin.

⁶ Gari kaa garuuza yibbirhiinih, umammaatih ten xoolaysheenih ten yigdifin.

⁷ Nugus kurrayeh, ishi caskar fareyaako amaa nabsi-wannun yeyleeh ten daafo xararishe.

⁸ Sarrah ishi garuuzak: ‘Marca tinqirribeh tane, yimciddime marah laakin akah meedda.

⁹ Amaydo, naba shawaaricille tedeynih geyinnan mara marcah iciddima’ akko yerhxe.

¹⁰ Amaa garuuza lel tsirogulle yewciinih, akah suginnan mara uma-tiya kee mece tiyah inkoh yeskettin. Amaymih marcat reedi gerhah yemmeege.

¹¹ Amaa nugus amaa gerha yablo yemeete gedda, amadde marcat sara aallinnixe xiyawto yuble.

¹² ‘Nangali, marcat sara hinnim tadde aaginah orobte?’ akko yerhxe. Usuk lel yarhxem waye.

¹³ Sarrah amaa nugus amaa garuuzakke: ‘Gabub kee lakukuh turhuynih irot ditelle kaa cida. Amadde lel weeca kee ikokti xarqam yakko kinni’ akko yerhxe.

¹⁴ Amayim lel mango mari yimciddimin, dago mari lel doorimeenimhi sabbatah kinni.”

Roomaati naba nugusuh gibre yakfiliinim

¹⁵ Sarrah Faarisiin yedeyinyaako kaa waanih aaginah kaa yabbarhiinimidde zatteyen.

¹⁶ Sinni katattaynit lel Heerodesti maraalih tahe yerhxinyaako alle dhirhiyen: “Mudarris, atu rummadde tanitom kee Yallih arax rummah taydurusem, xiyaw mablodde macal malitom kee xiyaw nif tableh mitanqiyyirem naarhige.

¹⁷ Amaydo, noh warish, aymih kolle higgida? Roomaati naba nugusuh miiri yakfiliinim arax kinni maki?”

¹⁸ Yeesus laakin ten siixo yeerhegeh: “Aymih cakanadde yi sayishshaana, ko munaafiqhiino?

¹⁹ Amaa miirit tacriifa yi uybulluwa” akko yerhxe. Usun le diinaar alle baahen.

²⁰ Yeesus lel: “Miyatti gina kee kataaba alle tane?” akko yerhxe.

²¹ Usun: “Roomaati naba nugus-him” yerhxin. Sarrah usuk: “Amaydo, Roomaati naba nugus-him, Roomaati naba nugusuh uxuwa, Yallihim lel Yallah uxuwa” akko yerhxe.

²² Tayim yoobbin gedda, cibrah raben. Kaa xabeenih lel akko yedeyin.

Tsadduuqhiim rabaako hi ugut esseriman

²³ Amaa lellecidde: “Rabaakohi ugut miyane yarhxe” Tsadduuqhiim alle yemeetiinih:

²⁴ “Mudarris, Moosa: ‘Xiyawti cindham xabekkah rabemko, kaa sacal amaa gubna nagareh ishi sacalah dhalaa akah carisha’ yerhxeh yine.

²⁵ Amaydo, nottaalih malxina sacal yinin. Aftiti marcishiteh, dhalaa hinnim rabeyaako ishi numa ishi sacalah xabe.

²⁶ Amayim balih lel, malamma, maddaxaako malxin gufteh dhalaa hinnim raben.

²⁷ Umman tenko sarrah lel amaa numa rabte.

²⁸ Amaydo, rabiikohi ugutulle, inkoh tee luuk yiniinimhi sabbatah, miyatti numa takko kinni?” arhxuk kaa esseren.

²⁹ Yeesus laakin: “Kutuub kee Yallih xayla mitaarhigiinimhi sabbatah, aqhlithuk tanin.

³⁰ Amayim lel rabaakohi ugutulle, mimarcishitaana, mimarcishimaanaaki, carshelle malaykutuh kinni yammingidiinim.

^31-32 Rabaakohi ugut hi zacabah yekkemko, Yalli: ‘Anu Abraahim Yalla, Isxaaq Yalla kee Yacqoob Yalla kiyo’ sinak yerhxeh yinem maqhrayinnitiini? Amaydo, usuk yane marih Yalla kibah rabe marih Yalla maki” yerhxeh alle yedebbe.

³³ Amaa mango xiyaw tayim yoobbin gedda, kaa aydarasalle cibrah raben.

Naba amre

³⁴ Faarisiin, usuk Tsadduuqhiim sik-ishem yoobbin gedda, inkille yekettin.

³⁵ Tenko wuli sercat dhiiceeni lel kaa yacakkano essero kaa essere:

³⁶ “Mudarris, Sercatadde ummanimko naba amri awlih tiya kinni?”

³⁷ Usuk lel: “Maddara ishi Yalla, inkoh ishi afcaadooko, ishi rooxeeko kee ishi xangalko takxano kolle tane.

³⁸ Tati naba tiya kee afti amre kinni.

³⁹ Amah higgidin malammi lel: ishi zoobatto ishe balih ikxin.

⁴⁰ Sercat kee Nobowa inkoh ta lamma amrelle cikkishittem kinon” akko yerhxe.

Masiix miyatti Barha kinni?

⁴¹ Faarisiin inkidde yekettiinih anuk, Yeesus:

⁴² “Masiix zacabah ayim sinalle higgida? Miyatti barha kinni?” yerhxeh ten essere. Usun lel: “Dawud barha” akko yerhxin.

⁴³ Usuk lel: “Aymihi Dawud, Ufayeh waanishe gedda:

⁴⁴ ‘Maddari yi Maddarak: “Ku nacabtoolit ku ibih guba ten hayandah, yi mizgaako defee Maddara akko yerhxem?”’

⁴⁵ Amaydo, Dawud Maddara akko yerhxemko, aaginah kaa barha yakke?” akko yerhxe.

⁴⁶ Walaa inketti inki waanitta alle maadabbo, amaa maxko sarrah lel walaa inketti kaa essero mafdabo.